ଭୁବନେଶ୍ୱର,୦୭/୦୩: ହିନ୍ଦୋଳ ବ୍ଲକ କାରନ୍ଦା ଛକ ନିକଟରେ ସଡ଼କ ଦୁର୍ଘଟଣା । ଏକ ଅଜଣା ଗାଡ଼ି ଧକ୍କାରେ ସାଇକେଲ ଆରୋହୀଙ୍କ ମୃତ୍ୟୁ ହୋଇଛି । ମୃତ ବ୍ୟକ୍ତି ହେଲେ କାରନ୍ଦା ଗ୍ରାମର ପାର୍ଥ ବିଶ୍ୱାଳ । ଦୁର୍ଘଟଣା ପରେ ଉତ୍ୟକ୍ତ ଲୋକେ କାରନ୍ଦା ଛକଠାରେ ରାସ୍ତା ଅବରୋଧ କରିଥିଲେ । ସରକାରୀ ସହାୟତା ରାଶି ଘୋଷଣା ପରେ ଧାରଣାରୁ ଉଠିଲେ ସ୍ଥାନୀୟଲୋକେ । ଢେଙ୍କାନାଳ ଜିଲ୍ଲା ହିନ୍ଦୋଳ ବ୍ଲକ କାରନ୍ଦା ଛକ ନିକଟରେ ଏଭଳି ଘଟଣା ଘଟିଥିବାର ଖବର ସାମ୍ନାକୁ ଆସିଛି ।
ତେନ୍ତୁଲିପଦର ଗାଁରେ ଅଗ୍ନିକାଣ୍ଡ, ୨୦ ବଖରା ଘର ପୋଡ଼ି ପାଉଁଶ
ସୂଚନା ମୁତାବକ, ସାଇକେଲ ଯୋଗେ କାରନ୍ଦା ବଜାରକୁ ଆସୁଥିଲେ ପାର୍ଥ ବିଶ୍ୱାଳ । ଏହି ସମୟରେ ଏକ ଅଜଣା ଗାଡ଼ି ତାଙ୍କୁ ଧକ୍କା ଦେଇଥିଲା । ଫଳରେ ଘଟଣା ସ୍ଥଳରେ ପାର୍ଥଙ୍କର ମୃତ୍ୟୁ ହୋଇଥିଲା । ଏହି ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ଚାପା ଉତ୍ତେଜନା ସୃଷ୍ଟି ହୋଇଥିଲା । ଉତ୍ୟକ୍ତ ଲୋକମାନେ ଗୁଡ଼ିଆ କାଟେଣୀରୁ ହିନ୍ଦୋଳ ରାସ୍ତା ଯିବା ବାଟକୁ କାରନ୍ଦା ଛକଠାରେ ଅବରୋଧ କରିଥିଲେ । ଲୋକମାନେ ବଜାରର ଉଭୟ ପାର୍ଶ୍ଵରେ ହମ୍ପ୍ସ ନିର୍ମାଣ ଏବଂ ଲାଇଟ୍ ବ୍ୟବସ୍ଥା କରିବା ସହ ଭାରୀଯାନ ଚଳାଚଳ ଉପରେ ନିୟନ୍ତ୍ରଣ କରିବାକୁ ଦାବି ରଖିଥିଲେ । ଏନେଇ ଖବର ପାଇବା ପରେ ହିନ୍ଦୋଳ ତହସିଲଦାର ଘଟଣା ସ୍ଥଳରେ ପହଞ୍ଚିଥିଲେ । ସେଠାରେ ପହଞ୍ଚି ଲୋକମାନଙ୍କୁ ବୁଝାସୁଝା କରିଥିଲେ । ସରକାରଙ୍କ ତରଫରୁ ସହାୟତା ରାଶି ପ୍ରଦାନ ପାଇଁ ଘୋଷଣା କରିବା ପରେ ଲୋକମାନେ ଧାରଣାରୁ ଉଠିଥିଲେ । ଏହି ଘଟଣା ସମ୍ପର୍କରେ ଖବର ପାଇ ରାସୋଳ ଥାନା ପୋଲିସ ଘଟଣା ସ୍ଥଳରେ ପହଞ୍ଚି ମୃତଦେହ ଜବତ କରିଥିଲା ।
