ତିହିଡି,୧୫/୬: ପାରିବାରିକ କଳହର କରୁଣ ପରିଣତି । ସ୍ୱାମୀର ଗୋଇଠା ମାଡ଼ରେ ଗର୍ଭବତୀ ସ୍ତ୍ରୀର ମୃତ୍ୟୁ ହୋଇଥିବା ଅଭିଯୋଗ। ତେବେ ଏଭଳି ଅଭାବନୀୟ ଘଟଣା ଘଟିଛି ଭଦ୍ରକ ଜିଲ୍ଲା ତିହିଡି ଥାନା ତାଳପଦା ଗାଁରେ। ଅଭିଯୋଗ ପରେ ଅଭିଯୁକ୍ତ ସ୍ୱାମୀକୁ ଡାକ୍ତରଖାନାରୁ ପୁଲିସ ଉଠାଇ ନେଇଥିବା ସୂଚନା ମିଳିଛି।
ତେବେ ତିହିଡି ଥାନା ତାଳପଦା ଗ୍ରାମର ଶଙ୍କର୍ଷଣ ଜେନା ୫ବର୍ଷ ପୂର୍ବରୁ ସେହି ଗାଁର ପଞ୍ଚାନନ ଜେନାଙ୍କ ଝିଅ ମୋନାଲିସା ଜେନାଙ୍କୁ ବିବାହ କରିଥିଲେ। ତାଙ୍କର ଗୋଟିଏ ୩ ବର୍ଷର ଝିଅ ମଧ୍ୟ ଅଛନ୍ତି । ଏପରି ସ୍ଥଳେ ସ୍ୱାମୀ ଶଙ୍କର୍ଷଣ ବିଭିନ୍ନ ସମୟ ମଦ୍ୟପାନ କରି ତାଙ୍କ ସ୍ତ୍ରୀ ଏବଂ ଶଶୁର ଘର ଲୋକଙ୍କୁ ଗାଳି ଗୁଲଜ କରେ। ହେଲେ ଗତକାଲି ଶଙ୍କର୍ଷଣଙ୍କ ଶ୍ବଶୁର ରଜରେ ମିଠା ଭାର ନେଇ ଝିଅକୁ ଯାଇ ସେଠାରେ ଫେରିଥିଲା। ହେଲେ ରାତିରେ ଶଙ୍କର୍ଷଣ ନିଶାସକ୍ତ ଅବସ୍ଥାରେ ସାମାନ୍ୟ ଘଟଣାକୁ ନେଇ ଝଗଡ଼ା କରିଥିଲେ ଏବଂ ଗର୍ଭବତୀ ସ୍ତ୍ରୀକୁ ଗୋଇଠା ମାରିଥିଲେ। ଫଳରେ ସେ ଚିତ୍କାର କରି ଚେତାଶୂନ୍ୟ ହୋଇ ପଡ଼ିଥିଲେ। ଏନେଇ ତୁରନ୍ତ ତାଙ୍କୁ ତିହିଡି ମେଡିକାଲରେ ଭର୍ତ୍ତି କରାଯାଇଥିଲା। ସେଠାରେ ତାଙ୍କ ସ୍ବାସ୍ଥ୍ୟବସ୍ଥା ଗୁରୁତର ହେବାରୁ ତାଙ୍କୁ ଭଦ୍ରକ ଡାକ୍ତରଖାନାକୁ ଅଣା ଯାଇଥିଲା । ମାତ୍ର ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ସେପଟେ ମୃତ ମୋନାଲିସାଙ୍କ ବାପଘର ଲୋକ ତିହିଡି ଥାନାରେ ହତ୍ୟା ଅଭିଯୋଗ କରିଥିଲେ । ଏତଲା ଆଧାରରେ ପୁଲିସ ଶଙ୍କର୍ଷଣକୁ ମେଡିକାଲରୁ ଉଠାଇ ନେଇ ଅଧିକ ତଦନ୍ତ ଆରମ୍ଭ କରୁଛି।
