ଧରାକୋଟ, ୦୨/୧୧: ଗାଁ କୋଠ ଜମିରେ ପାଣି ମଡାଇବାକୁ କେନ୍ଦ୍ର କରି ହତ୍ୟା । କୁସରାବ ଗ୍ରାମର ଯୁଧିଷ୍ଟିର ଗୌଡଙ୍କ ପୁଅ ପଞ୍ଚାନନ ଗୌଡ଼ (୫୨) ଙ୍କୁ ତାଙ୍କ ଗ୍ରାମର ସନ୍ତୋଷ ଗୌଡ଼, ଶିବ ଗୌଡ଼ ଓ ଶଙ୍କର ଗୌଡ଼ ହତ୍ୟା କରିଥିବା ନେଇ ଧରାକୋଟ ଥାନାରେ ଲିଖିତ ଅଭିଯୋଗ କରିଛନ୍ତି ପଞ୍ଚାନନ ଗୌଡଙ୍କ ସ୍ତ୍ରୀ ବୁଲି ଗୌଡ଼ । ଗଞ୍ଜାମ ଜିଲ୍ଲା ଧରାକୋଟ ଥାନା ଅନ୍ତର୍ଗତ କୁସରାବ ଗ୍ରାମରେ ଏହି ଜଘନ୍ୟ ହତ୍ୟାକାଣ୍ଡ ଘଟିଛି ।
ସୂଚତନା ମୁତାବକ, କୁସରାବ ଗାଁ କୋଠ ଜମିରୁ ପାଣି ଆଣିବାକୁ ନେଇ କିଛିଦିନ ଧରି ମୃତ ପଞ୍ଚାନନ ଓ ଅନ୍ୟ ମାନଙ୍କ ମଧ୍ୟରେ ଝଗଡ଼ା ଲାଗି ରହିଥିଲା । ଶୁକ୍ରବାର ସନ୍ଧ୍ୟା ୭ଟା ସମୟରେ ଗାଁ ନିକଟରେ ଥିବା କାନ୍ଦୁଲ ଘାଇ ପାହାଡ଼ ନିକଟରେ ଥିବା କୋଠ ବିଲକୁ ପାଣି ଦେଖିବା ପାଇଁ ଆସିଥିବା ପଞ୍ଚାନନ ବିଳମ୍ବିତ ରାତି ପର୍ଯ୍ୟନ୍ତ ଘରକୁ ଫେରି ନଥିଲେ । ଘରକୁ ନଫେରିବାରୁ ବଡ ଭାଇ ମନୁ ଗୌଡ଼, ସାନ ଭାଇ ପାଣ୍ଡବ ଗୌଡ଼ ବହୁ ଖୋଜା ଖୋଜି କରି ତାଙ୍କର ପତ୍ତା ପାଇନଥିଲେ । ଶନିବାର ଭୋର ସମୟରେ ଖୋଜା ଖୋଜି ବେଳେ କୋଠ ବିଲ ଅପେଶା ନିକଟରେ ପଞ୍ଚାନନଙ୍କ ମୃତଦେହ ପଡ଼ିଥିବା ଦେଖି ଧରାକୋଟ ପୋଲିସକୁ ଖବର ଦେଇଥିଲେ । ଖବର ପାଇ ଆସିକା ଉପଖଣ୍ଡ ପୋଲିସ ଅଧିକାରୀ ସଞ୍ଜୟ ମହାପାତ୍ର, ଧରାକୋଟ ଥାନା ଅଧିକାରୀ ଚନ୍ଦ୍ରିକା ସ୍ୱାଇଁ, ଏ ଏସ ଆଇ ଅଭିମନ୍ୟୁ ପାଣ୍ଡେ, ଅନିଲ ଶବର ପ୍ରମୁଖ ଘଟଣା ସ୍ଥଳରେ ପହଞ୍ଚି ଶବକୁ ଜବତ କରିବା ସହ ବ୍ୟବଚ୍ଛେଦ ପାଇଁ ପଠାଇଛନ୍ତି । ଏହା ସହ ଘଟଣାର ତଦନ୍ତ ଆରମ୍ଭ କରିଛନ୍ତି ।
