କଟକ, ୨୧/୦୬: ଡାଇରିଆକୁ ନେଇ ପ୍ରଶାସନିକସ୍ତରରେ ତତ୍ପରତା ଲାଗିରହିଥିବା ବେଳେ ଏପଟେ ରୋଗକୁ ଡାକୁଛି ତାଳଦଣ୍ଡା କେନାଲ୍ । ସିଏମ୍ସିର ଅବହେଳା ମନୋଭାବ ପାଇଁ ଗୋଟିଏ ପଟେ କେନାଲ୍ ପାଣି ବିଷାକ୍ତ ହେଉଛି, ଅନ୍ୟପଟେ ଡ୍ରେନ୍ରୁ ବାହାରୁଥିବା ଭାସମାନ ଆବର୍ଜନା ଓ ପଙ୍କକୁ ଆଣି ରାସ୍ତା କଡ଼ରେ ଗଦା କରାଯାଉଛି । ସବୁଠୁ ବଡ଼ କଥା ହେଉଛି ଯେ, ଯେଉଁଠି ରାସ୍ତା କଡ଼ରେ ସିଏମ୍ସି ନିଜେ ଆବର୍ଜନା ପକାଇବା ଉପରେ କଟକଣା ସମ୍ପର୍କିତ ବୋର୍ଡ ଲଗାଇଛି ସେଠାରେ ସିଏମ୍ସି ଆବର୍ଜନା ଗଦା କରୁଥିବା ଦେଖିବାକୁ ମିଳିଛି । ଫଳରେ କେନାଲ୍ ରାସ୍ତା ଓ ପାଣି ଏବେ ସହରବାସୀଙ୍କ ପାଇଁ ବିପଦ ପାଲଟିଛି ।
ତାଳଦଣ୍ଡା କେନାଲ୍କୁ ସୌନ୍ଦର୍ଯ୍ୟକରଣ କରିବା ପାଇଁ କୋଟିକୋଟି ଟଙ୍କା ଖର୍ଚ୍ଚ ହେଉଛି । କିନ୍ତୁ ପ୍ରଶାସନର ଅବହେଳା ପାଇଁ ଏବେ ବିପର୍ଯ୍ୟସ୍ତ ହେବାକୁ ଲାଗିଛି । ରାସ୍ତାରୁ ନେଇ ପାଣି ସବୁକିଛି ନଷ୍ଟ ହେବାରେ ଲାଗିଛି । ତେବେ କେନାଲ୍ରେ ବାରମ୍ବାର ଆବର୍ଜନା ପକାଇବା ଉପରେ ରୋକ୍ ଲଗାଇବାକୁ ସିଏମ୍ସି ଲୁହା ବାଡ ଘୁରାଇ ଥିଲେ ମଧ୍ୟ ଏହା ସମ୍ଭବ ହୋଇପାରୁନି । ସବୁଠୁ ବଡ କଥା ହେଉଛି ଯେ, କେନାଲ୍ ପାଶ୍ୱର୍ରେ ଥିବା ବିଭିନ୍ନ ମେଡିକାଲ୍ରୁ ବାହାରୁଥିବା ଆବର୍ଜନା କେନାଲ୍ରେ ଭାସୁଥିବା ଦେଖିବାକୁ ମିଳିଛି । ଫଳରେ ଉକ୍ତ ପାଣିରୁ ନାକଫଟା ଗନ୍ଧ ବାହାରୁଛି । ଏମିତିକି ଉକ୍ତ ପାଣି ମଧ୍ୟ ବିଷାକ୍ତ ପାଲଟିଛି । ସେହିଭଳି ତାଳଦଣ୍ଡା କେନାଲ୍ ପାଶ୍ୱର୍ ତଥା ମାଲଗୋଦାମ ପଛ ପାଶ୍ୱର୍ରେ ଆବର୍ଜନା ଗଦାଇବାକୁ ନେଇ ପୂର୍ବରୁ ମାନ୍ୟବର ହାଇକୋର୍ଟ ଅସନ୍ତୋଷ ପ୍ରକାଶ କରିଥିଲେ । ଏହାପରେ ସିଏମ୍ସି ତାର ବାଡ ବୁଲାଇବା ସହିତ ସେଠାରେ ଆବର୍ଜନା ନ ପକାଇବାକୁ ବୋର୍ଡ ମଧ୍ୟ ଲଗାଇଛି । କିନ୍ତୁ ସିଏମ୍ସି ଦ୍ୱାରା ଡ୍ରେନ୍ରୁ ଭାସମାନ ଆବର୍ଜନା ଓ ପଙ୍କକୁ କାଢି ଆଣି ଟ୍ରାକ୍ଟର ଯୋଗେ ଏଠାରେ ଗଦା କରାଯାଉଛି । ଆବର୍ଜନା ଗଦା ହେବା ସହିତ ସେଥିରୁ ନିର୍ଗତ ପାଣି ଓ ପଙ୍କ ବର୍ଷା ପାଣିରେ ମିଶି ରାସ୍ତାରେ ଲହଡ଼ି ମାରୁଛି । ଯାହାଦ୍ୱାରା ଏବେ କେନାଲ୍ ରାସ୍ତାରେ ଯା’ଆସ କରିବା କଷ୍ଟସାଧ୍ୟ ହୋଇପଡୁଥିବା ସାଧାରଣ ଲୋକମାନେ ଅଭିଯୋଗ କରିଛନ୍ତି ।
