ଶିଲଙ୍ଗ: ମେଘାଳୟର ପୂର୍ବ ଖାସୀ ହିଲ୍ସ ଜିଲ୍ଲା ପ୍ରଶାସନ ପର୍ଯ୍ୟଟକଙ୍କ ସୁରକ୍ଷାକୁ ଦୃଷ୍ଟିରେ ରଖି ଏକ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନେଇଛି। ରାଜା ରଘୁବଂଶୀ ହତ୍ୟାକାଣ୍ଡ ଏବଂ ଚଳିତ ବର୍ଷ ସୋହରାରେ ଘଟିଥିବା ଦୁଇଟି ମର୍ମନ୍ତୁଦ ଘଟଣା ପରେ, ରାଜ୍ୟରେ ଟ୍ରେକିଂ କରୁଥିବା ପର୍ଯ୍ୟଟକଙ୍କୁ ସ୍ଥାନୀୟ ଗାଇଡ୍ ନିଯୁକ୍ତ କରିବା ବାଧ୍ୟତାମୂଳକ କରାଯାଇଛି। ଏହି ନିୟମ ଜିଲ୍ଲା ଟୁରିଜମ୍ ପ୍ରମୋସନ ସୋସାଇଟି ଦ୍ୱାରା ଜାରି କରାଯାଇଛି।
ଏହି ନିଷ୍ପତ୍ତି ପଛରେ ମୁଖ୍ୟ କାରଣ ହେଉଛି ଇନ୍ଦୋରର ବ୍ୟବସାୟୀ ରାଜା ରଘୁବଂଶୀଙ୍କ ହତ୍ୟାକାଣ୍ଡ। ଯିଏକି ଚଳିତ ବର୍ଷ ମେ ମାସ ୨୩ ତାରିଖରେ ତାଙ୍କ ହନିମୁନ୍ ସମୟରେ ସୋହରା ଅଞ୍ଚଳରେ ନିଖୋଜ ହୋଇଥିଲେ। ତାଙ୍କ ବିବାହ ମେ ୧୧ ତାରିଖରେ ସୋନମ୍ ରଘୁବଂଶୀଙ୍କ ସହିତ ହୋଇଥିଲା। ତେବେ ଜୁନ୍ ୨ରେ ସୋହରାର ଏକ ଗଭୀର ଖାଇରେ ତାଙ୍କର ମୃତଦେହ ଉଦ୍ଧାର କରାଯାଇଥିଲା। ପୁଲିସ ଅନୁସନ୍ଧାନରୁ ଜଣାପଡ଼ିଛି ଯେ ଏହି ହତ୍ୟାକାଣ୍ଡ ସୋନମ୍ ଏବଂ ତାଙ୍କ ପ୍ରେମିକ ରାଜ କୁଶୱାହାଙ୍କ ଦ୍ୱାରା ଯୋଜନାବଦ୍ଧ ଭାବେ କରାଯାଇଥିଲା।
ପୂର୍ବ ଖାସୀ ହିଲ୍ସ ଜିଲ୍ଲାର ଡେପୁଟି କମିଶନର ତଥା ଜିଲ୍ଲା ଟୁରିଜମ୍ ପ୍ରମୋସନ ସୋସାଇଟିର ଅଧ୍ୟକ୍ଷା ରୋଜେଟା ଏମ୍ କୁର୍ବାହ କହିଛନ୍ତି ଯେ, ପଞ୍ଜୀକୃତ ଗାଇଡ୍ଙ୍କୁ ନିଯୁକ୍ତ କରିବା ଦ୍ୱାରା ପର୍ଯ୍ୟଟକଙ୍କୁ ନିରାପଦ ରଖାଯାଇପାରିବ ଏବଂ ସେମାନେ ରାସ୍ତା ଦେଖାଇବା, ଆହତ ହେବା କିମ୍ବା ଅପରାଧର ଶିକାର ହେବାଠାରୁ ରକ୍ଷା ପାଇପାରିବେ। ଏହା ସହିତ ସ୍ଥାନୀୟ ଲୋକଙ୍କ ପାଇଁ ଏହା ରୋଜଗାରର ସୁଯୋଗ ମଧ୍ୟ ସୃଷ୍ଟି କରିବ।
ଏହି ଘଟଣା ପରେ ମେଘାଳୟରେ ପର୍ଯ୍ୟଟନ ସୁରକ୍ଷା ନେଇ ଚିନ୍ତା ବଢ଼ିଛି। ସୋହରାରେ ଚଳିତ ବର୍ଷ ଆଉ ଏକ ଘଟଣାରେ ହଙ୍ଗେରୀୟ ପର୍ଯ୍ୟଟକ ପୁସ୍କାସ ଜୋଲ୍ଟଙ୍କ ମୃତ୍ୟୁ ଘଟିଥିଲା। ଯାହାକୁ ନେଇ ମଧ୍ୟ ସୁରକ୍ଷା ପ୍ରଶ୍ନ ଉଠାଯାଇଛି। ଏହି ନୂଆ ନିୟମ ମେଘାଳୟକୁ ଏକ ନିରାପଦ ପର୍ଯ୍ୟଟନ ଗନ୍ତବ୍ୟସ୍ଥଳୀ ଭାବେ ଗଢ଼ିବାରେ ସହାୟକ ହେବ ବୋଲି ଆଶା କରାଯାଉଛି।
