ଭୁବନେଶ୍ୱର, ୦୩/୦୫ : କଟକ ସହରବାସୀଙ୍କ ପାଇଁ ବଡ଼ ଖବର । ଆଗକୁ କଟକ ସହରରୁ ଭୁବନେଶ୍ୱରକୁ ଦୌଡ଼ିବ ମେଟ୍ରୋ । ତ୍ରିଶୁଳିଆରେ ଅଟକିଯିବନି ମେଟ୍ରୋ ଟ୍ରେନ୍ । ଏଭଳି ଯୋଜନା ଚଳାଇଛନ୍ତି ରାଜ୍ୟ ସରକାର । ଭୁବନେଶ୍ୱରରୁ ବାହାରି ମେଟ୍ରୋ ଟ୍ରେନ୍ ଯିବ କଟକ ସହର ଭିତରକୁ । ତ୍ରିଶୁଳିଆ ପରେ ନେତାଜୀ ସେତୁ ପାର୍ କରି ଖାନନଗରସ୍ଥିତ ନେତାଜୀ ବସ ଟର୍ମିନାଲକୁ ଯିବ । ତା’ପରେ ଏସ୍ସିବି ବଡ଼ ମେଡିକାଲ ପର୍ଯ୍ୟନ୍ତ ଯିବ ମେଟ୍ରୋ । ମେଟ୍ରୋ ପ୍ରକଳ୍ପର ସମ୍ପ୍ରସାରଣ ନେଇ ରାଜ୍ୟ ସରକାର ଏମିତି ଯୋଜନା ଚଳାଇଛନ୍ତି । ଖୋଦ୍ ନଗର ଉନ୍ନୟନ ମନ୍ତ୍ରୀ କୃଷ୍ଣଚନ୍ଦ୍ର ମହାପାତ୍ର ଏ ନେଇ ସୂଚନା ଦେଇଛନ୍ତି ଗଣମାଧ୍ୟମକୁ ।
ଏହି ଯୋଜନା ସାକାର ରୂପ ନେଲେ ଟ୍ୱିନ୍ ସିଟିରେ ଗମନାଗମନର ଏକ ନୂଆ ଅଧ୍ୟାୟ ଆରମ୍ଭ ହେବ । ଦୁଇ ସହର ଭିତରେ ଦୂରତା କମିବା ସହ ଟ୍ରାଫିକ ଭିଡ଼ ବି କମିଯିବ । ଭୁବନେଶ୍ୱର ବିମାନବନ୍ଦରରୁ କଟକର ତ୍ରିଶୁଳିଆ ଯାଏଁ ମେଟ୍ରୋ ପ୍ରକଳ୍ପ ଯୋଜନା ପୂର୍ବରୁ ରହିଛି । ୨୬ କିମି ମେଟ୍ରୋ ରେଳ ପଥରେ ୨୦ଟି ଷ୍ଟେସନ ନିର୍ମାଣ ଯୋଜନା ଅଛି । ବର୍ତ୍ତମାନ ସରକାର ଏହାକୁ କଟକ ସହର ଭିତରକୁ ସମ୍ପ୍ରସାରଣ କରିବାକୁ ବିଚାର ଚଳାଇଛନ୍ତି । ଏ ନେଇ ଏକ କମିଟି ଗଢ଼ାଯାଇଛି । ଏହି କମିଟି ଦେଶର ବିଭିନ୍ନ ସହରରେ ଚାଲିଥିବା ମେଟ୍ରୋ ପ୍ରକଳ୍ପ ପରିଦର୍ଶନ କରିବା ସହ ଏହାର ବ୍ୟବସ୍ଥାକୁ ଅନୁଧ୍ୟାନ କରୁଛନ୍ତି । ସେହିପରି ମେଟ୍ରୋ ପ୍ରକଳ୍ପ ନେଇ ନୂଆ ଡିପିଆର୍ ପ୍ରସ୍ତୁତି ଚୂଡ଼ାନ୍ତ ପର୍ଯ୍ୟାୟରେ ଅଛି । ଖୁବଶୀଘ୍ର ଡିପିଆର୍ ରିପୋର୍ଟ ଆସିବ । ତା’ପରେ ମେଟ୍ରୋ ରେଳ ପ୍ରକଳ୍ପର ନୂଆ ରୂପରେଖ ପ୍ରସ୍ତୁତ ହେବ ବୋଲି ଜଣାପଡ଼ିଛି ।
ମନ୍ତ୍ରୀଙ୍କ ସୂଚନା ଅନୁସାରେ ମେଟ୍ରୋ ପ୍ରକଳ୍ପ କେବଳ ରାଜ୍ୟ ସରକାରଙ୍କ ପାଣ୍ଠିରେ ହେବନି, ଏଥିପାଇଁ କେନ୍ଦ୍ର ସରକାରଙ୍କ ସହଯୋଗ ମଧ୍ୟ ରହିବ । ମେଟ୍ରୋ ପ୍ରକଳ୍ପ ପାଇଁ ୨୦୨୪ ଜାନୁଆରୀ ୧ ତାରିଖରେ ତ୍ରିଶୁଳିଆ ନିକଟରେ ଶିଳାନ୍ୟାସ ଦିଆଯାଇଥିଲା । ତତ୍କାଳୀନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏହି ପ୍ରକଳ୍ପର ଶିଳାନ୍ୟାସ ଦେଇଥିଲେ । ରାଜ୍ୟରେ ସରକାର ବଦଳିବା ପରେ ମଧ୍ୟ ନୂଆ ସରକାର ଏହି ପ୍ରକଳ୍ପକୁ ବେଶ୍ ଗୁରୁତ୍ୱ ଦେଇଛନ୍ତି । ବଜେଟରେ ଏଥିପାଇଁ ଅନୁଦାନ ବ୍ୟବସ୍ଥା କରାଯାଇଛି । ମେଟ୍ରୋ ପ୍ରକଳ୍ପର କାମ ମଧ୍ୟ ଆରମ୍ଭ କରାଯାଇଛି ।
