ନୂଆଦିଲ୍ଲୀ: କେନ୍ଦ୍ର ସରକାର ସୋନମ ୱାଙ୍ଗଚୁକଙ୍କ ଏନଜିଓର ଲାଇସେନ୍ସ ରଦ୍ଦ କରିଛନ୍ତି। ଲେହ ହିଂସା ପରେ ଗୃହ ମନ୍ତ୍ରଣାଳୟ ଏହି କାର୍ଯ୍ୟାନୁଷ୍ଠାନ ଗ୍ରହଣ କରିଛି । କେନ୍ଦ୍ର ସରକାର ବିଦେଶୀ ଅନୁଦାନ (ନିୟନ୍ତ୍ରଣ)ଆଇନ୍ ୨୦୧୦ ବା ଏଫସିଆରଏ ନିୟମ ଉଲ୍ଲଂଘନ କରିଥିବାରୁ SECMOLର ଏଫସିଆରଏ ପଞ୍ଜିକରଣ ରଦ୍ଦ କରିଛନ୍ତି । ୱାଙ୍ଗଚୁକଙ୍କ ଏନଜିଓର ଅନେକ ଅନିୟମିତତା ଥିବା ନେଇ ଗୃହ ମନ୍ତ୍ରଣାଳୟର ତଦନ୍ତରୁ ଜଣାପଡ଼ିଛି ।
ସୋନମ ୱାଙ୍ଗଚୁକଙ୍କ ସଂଗଠନ ବିଦେଶୀ ପାଣ୍ଠି ସମ୍ପର୍କରେ ସଠିକ୍ ସୂଚନା ପ୍ରଦାନ କରିବାରେ ବିଫଳ ହୋଇଛି । ଏପରିକି ଏଫସିଆରଏ ପାଳନ କରିବାରେ ବିଫଳ ହୋଇଥିବା ଅଭିଯୋଗ ରହିଛି। ଏହା ସୋନମ ୱାଙ୍ଗଚୁକଙ୍କ ସମସ୍ୟାକୁ ବୃଦ୍ଧି କରିପାରେ । ଇଡି ଖୁବ୍ ଶୀଘ୍ର ଫେମା ଆଇନ ଅନୁଯାୟୀ ୱାଙ୍ଗଚୁକଙ୍କ ଏନଜିଓ, ଏସଇସିଏମଓଏଲ୍ ବିରୁଦ୍ଧରେ ତଦନ୍ତ ଆରମ୍ଭ କରିପାରେ । ଏସଇସିଏମଓଏଲ୍ ବିଦେଶରୁ ୩.୩୫ ଲକ୍ଷ ଟଙ୍କା ପାଇଥିଲା ବୋଲି କହିଥିଲା । କିନ୍ତୁ ପରେ ଦାବି କରିଥିଲା ଯେ, ଏହି ଟଙ୍କା ଏକ ପୁରୁଣା ବସ୍ ବିକ୍ରି କରି ମିଳିଥିଲା । ଏହି ଟଙ୍କା ଏହାର ଏଫସିଆରଏ ଆକାଉଣ୍ଟରେ ପ୍ରତିଫଳିତ ହୋଇନଥିଲା କିମ୍ବା ସଠିକ୍ ସୂଚନା ଦିଆଯାଇ ନଥିଲା ।
୨୦୨୦-୨୧ରେ, ସ୍ଥାନୀୟ ପାଣ୍ଠିର ୫୪,୬୦୦ ଟଙ୍କା ଭୁଲବଶତଃ ଏହାର ଏଫସିଆରଏ ଆକାଉଣ୍ଟରେ ଜମା କରାଯାଇଥିଲା। ସଂଗଠନ ସ୍ୱୀକାର କରିଛି ଯେ, ଏହା ଖାଦ୍ୟ ଏବଂ ରହଣି ଖର୍ଚ୍ଚ ପାଇଁ ଭାରତୀୟ ସ୍ୱେଚ୍ଛାସେବକମାନଙ୍କଠାରୁ ସଂଗ୍ରହ କରାଯାଇଥିଲା । କିନ୍ତୁ ଏହାକୁ ଭୁଲ ଆକାଉଣ୍ଟକୁ ସ୍ଥାନାନ୍ତର କରାଯାଇଥିଲା ।
ସେପଟେ ଏକ ବିଦେଶୀ ସଂଗଠନ ୪.୯୩ ଲକ୍ଷ ଦେଇଥିଲା । କିନ୍ତୁ କରୋନା ଲକଡାଉନ୍ ଯୋଗୁଁ କାର୍ଯ୍ୟକ୍ରମ ବାତିଲ ହେବା ପରେ ଟଙ୍କା ଫେରାଇ ଦିଆଯାଇଥିଲା । କିନ୍ତୁ ମନ୍ତ୍ରଣାଳୟ କହିଛି ଯେ, ଏଫସିଆରଏ ଆଇନ ଅନୁଯାୟୀ, ବିଦେଶୀ ପାଣ୍ଠି ଫେରସ୍ତ କରିବାର ପ୍ରାବଧାନ ନାହିଁ । ୨୦୨୦-୨୧ରେ, ସଂଗଠନ ସିଧାସଳଖ ଦରମା ଏବଂ ଷ୍ଟାଇପେଣ୍ଡରୁ ୭୯,୨୦୦ ଟଙ୍କା କାଟି ‘ଖାଦ୍ୟ ଫି’ ଭାବରେ ଦର୍ଶାଇଥିଲା । ମନ୍ତ୍ରଣାଳୟ ଅନୁସାରେ, ଏହି ପଦ୍ଧତି ଭୁଲ ଥିଲା ଏବଂ ହିସାବରେ ସ୍ୱଚ୍ଛତା ନଥିଲା ।
ସୋନମ ୱାଙ୍ଗଚୁକଙ୍କ ଏନଜିଓ ଏଫସିଆରଏ ଧାରା ୮(୧)(ଏ), ୧୭, ୧୮, ଏବଂ ୧୯ ର ଉଲ୍ଲଂଘନ କରିଛି। ଫଳରେ ସଂଗଠନର ଏଫସିଆରଏ ପଞ୍ଜିକରଣ ରଦ୍ଦ କରାଯାଇଛି । ଏବେ
ସୋନମ ୱାଙ୍ଗଚୁକଙ୍କ ଏନଜିଓ ଆଉ ବିଦେଶରୁ ସହାୟତା ଗ୍ରହଣ କରିପାରିବ ନାହିଁ । ସଂଗଠନ କେବଳ ସ୍ଥାନୀୟ ପାଣ୍ଠି ପାଇପାରିବ ।
ସୂଚନାଯୋଗ୍ୟ, ଲଦାଖକୁ ପୂର୍ଣ୍ଣ ରାଜ୍ୟ ମାନ୍ୟତା ଦାବିରେ ଛାତ୍ରମାନେ ପ୍ରଦର୍ଶନ କରିଥିଲେ । ପ୍ରତିବାଦ ହିଂସାତ୍ମକ ରୂପ ନେଇଥିଲା । ଫଳରେ ଚାରି ଜଣଙ୍କର ମୃତ୍ୟୁ ହୋଇଥିଲା ଏବଂ ୭୦ ରୁ ଅଧିକ ଲୋକ ଆହତ ହୋଇଥିଲେ। ଛାତ୍ରମାନେ ସାମାଜିକ କର୍ମୀ ସୋନମ ୱାଙ୍ଗଚୁକଙ୍କ ସମର୍ଥନରେ ପ୍ରଦର୍ଶନ କରିଥିଲେ । ସେ ସେପ୍ଟେମ୍ବର ୧୦ ତାରିଖରୁ ଲଦାଖକୁ ରାଜ୍ୟ ମାନ୍ୟତା ଦାବି କରି ଅନଶନରେ ବସିଥିଲେ। ହିଂସା ପରେ ୱାଙ୍ଗଚୁକ ତାଙ୍କର ଅନଶନରୁ ଓହରିଥିଲେ ।
