ଭୁବନେଶ୍ୱର,୧୫/୧୦: କେନ୍ଦ୍ର ଜଳ ଶକ୍ତି ମନ୍ତ୍ରଣାଳୟ ତରଫରୁ ସୋମବାର ପଞ୍ଚମ ଜାତୀୟ ଜଳ ପୁରସ୍କାର-୨୦୨୩ ଘୋଷଣା କରାଯାଇଛି । ଏଥିରେ ଓଡ଼ିଶାକୁ ଅପୂର୍ବ ସଫଳତା ମିଳିଛି । ଜଳ ସଂରକ୍ଷଣ ଦିଗରେ ବ୍ୟାପକ କାମ କରୁଥିବା ଯୋଗୁ ଓଡ଼ିଶାକୁ ଶ୍ରେଷ୍ଠ ରାଜ୍ୟ ଭାବେ ମାନ୍ୟତା ମିଳିଛି । ସେହିପରି ବଲାଙ୍ଗିରକୁ ଶ୍ରେଷ୍ଠ ଜିଲ୍ଲା, ପୁରୀକୁ ଶ୍ରେଷ୍ଠ ସହରାଞ୍ଚଳ ସଂସ୍ଥା ଓ ମୟୂରଭଞ୍ଜର ଖଇରବାଣି ଆଶ୍ରମ ସ୍କୁଲକୁ ଶ୍ରେଷ୍ଠ ବିଦ୍ୟାଳୟ ଭାବେ ମନୋନୀତ କରାଯାଇଛି । ଏହି ୪ଟି ବର୍ଗରେ ଓଡ଼ିଶା ଜାତୀୟ ଜଳ ପୁରସ୍କାର ପାଇବ ।
ଗତ କିଛିବର୍ଷ ମଧ୍ୟରେ ଜଳ ସଂରକ୍ଷଣକୁ ନେଇ ଓଡ଼ିଶା ଆଖିଦୃଶିଆ କାମ କରିଛି । ସେଥିମଧ୍ୟରେ ୫୩ହଜାର ଜଳ ସଂରକ୍ଷଣ ଓ ବର୍ଷା ଜଳ ଅମଳ ପ୍ରକଳ୍ପ, ୧୧ହଜାର ଜଳାଶୟରେ ପ୍ରାୟ ୧୦,୮୦୦ଟି ଜଳ ଅମଳ ଭିତ୍ତିଭୂମି, ୬୮୭୦୦ ଜଳ ବିକାଶ ପ୍ରକଳ୍ପ, ୨୧ହଜାର ବର୍ଜ୍ୟଜଳ ଟ୍ରିଟମେଣ୍ଟ ପ୍ଲାଣ୍ଟ ତିଆରି ହୋଇଛି । ସେହିପରି ୧୮ଶହ କିମି ଡ୍ରେନେଜ ଚ୍ୟାନେଲ୍ ନିର୍ମାଣ କରାଯାଇଛି । ୩୯ହଜାର ହେକ୍ଟର ଚାଷଜମିକୁ ଜଳବନ୍ଦୀରୁ ଉଦ୍ଧାର କରାଯାଇଥିବା ବେଳେ ୯୦,୯୦୦ ହେକ୍ଟରରୁ ଅଧିକ ଜମିକୁ ଜଳସେଚନ ଅଞ୍ଚଳରେ ପରିଣତ କରାଯାଇଛି । ଯଦ୍ଦ୍ୱାରା ରାଜ୍ୟର ୮୭ହଜାର କୃଷକ ଲାଭାନ୍ୱିତ ହୋଇଛନ୍ତି । ଏଥିସହ କ୍ଷୁଦ୍ର ଜଳସେଚନ ଓ ଚେକଡ୍ୟାମ୍ର ବିକାଶ ପାଇଁ ମୁଖ୍ୟମନ୍ତ୍ରୀ ଆଡ଼ିବନ୍ଧ ତିଆରି ଯୋଜନା କାର୍ଯ୍ୟକ୍ଷମ ହେଉଛି । ପୁରୀ ପ୍ରଥମ ପୌର ସଂସ୍ଥା ଭାବେ ସହରସାରା ୨୪ଘଣ୍ଟିଆ ଜଳ ଯୋଗାଣ କରିଛି । ବଲାଙ୍ଗିରରେ ମଧ୍ୟ ଜଳ ସଂରକ୍ଷଣକୁ ନେଇ ପାଣି ପଞ୍ଚାୟତ, ଜଳାଶୟ ଖନନ ଭଳି ଅନେକ କାମ ହୋଇଥିବା କୁହାଯାଇଛି । ଆସନ୍ତା ୨୨ ତାରିଖରେ ଦିଲ୍ଲୀ ବିଜ୍ଞାନଭବନରେ ରାଜ୍ୟକୁ ପୁରସ୍କୃତ କରାଯିବ ।
