ନୂଆଦିଲ୍ଲୀ,୩୦/୦୫: ପାକିସ୍ତାନ ସୀମାନ୍ତବର୍ତ୍ତୀ ରାଜ୍ୟରେ ଶୁକ୍ରବାର ଦ୍ୱିତୀୟ ନାଗରିକ ସୁରକ୍ଷା (ସିଭିଲ ଡିଫେନ୍ସ) ମକଡ୍ରିଲ ‘ଅପରେସନ ସିଲ୍ଡ’ ଅନୁଷ୍ଠିତ ହେବ । ଗୁରୁବାର ସ୍ୱରାଷ୍ଟ୍ର ମନ୍ତ୍ରଣାଳୟ ପକ୍ଷରୁ ଏହି ସୂଚନା ଦିଆଯାଇଛି । ଗତ ୨୯ ତାରିଖରେ ଏହି ମକ୍ଡ୍ରିଲ ହେବାକୁ ଥିବା ବେଳେ କେତେକ ପ୍ରଶାସନିକ ସମସ୍ୟା ଯୋଗୁ ଏହାକୁ ଘୁଞ୍ଚାଇ ଦିଆଯାଇଥିଲା ।
ଜମ୍ମୁ-କାଶ୍ମୀର, ପଞ୍ଜାବ, ରାଜସ୍ଥାନ ଓ ଗୁଜରାଟ ସମେତ ପାକିସ୍ତାନ ସୀମା ସଂଲଗ୍ନ ସମସ୍ତ ପଶ୍ଚିମାଞ୍ଚଳ ରାଜ୍ୟ ଓ କେନ୍ଦ୍ର ଶାସିତ ଅଞ୍ଚଳରେ ଏହି ମକଡ୍ରିଲ କରାଯିବ । ଭାରତ ଓ ପାକିସ୍ତାନ ମଧ୍ୟରେ ବର୍ତ୍ତମାନ ଲାଗି ରହିଥିବା ଉତ୍ତେଜନା ପରିପ୍ରେକ୍ଷୀରେ ଏହି ମକଡ୍ରିଲ କରାଯାଉଛି । ମିସାଇଲ କିମ୍ବା ଡ୍ରୋନ ଆକ୍ରମଣ ଭଳି ଜରୁରି ପରିସ୍ଥିତିରେ ଲୋକଙ୍କ ଧନଜୀବନର କିଭଳି ସୁରକ୍ଷା କରାଯାଇପାରିବ ତାହାର ପ୍ରସ୍ତୁତି ପ୍ରଦର୍ଶନ କରାଯିବ ।
ଏହା ପୂର୍ବରୁ ଗତ ମେ ୭ ତାରିଖରେ ଦେଶବ୍ୟାପୀ ମକଡ୍ରିଲ କରାଯାଇଥିଲା । ଦ୍ୱିତୀୟ ପର୍ଯ୍ୟାୟ ମକଡ୍ରିଲ ପାକିସ୍ତାନ ସୀମାନ୍ତବର୍ତ୍ତୀ ରାଜ୍ୟ ସମେତ କେନ୍ଦ୍ର ଶାସିତ ପ୍ରଦେଶ ଚଣ୍ଡିଗଡରେ ମେ ୨୯ରେ କରାଯିବ ବୋଲି ପୂର୍ବରୁ ଘୋଷଣା ହୋଇଥିଲା । କିନ୍ତୁ ପରେ ତାକୁ ବାତିଲ କରିଦିଆଯାଇଥିଲା । କାରଣ ସ୍ୱରୂପ କେବଳ ପ୍ରଶାସନିକ କାରଣ ବୋଲି ଦର୍ଶାଯାଇଥିଲା ।
