ନୂଆଦିଲ୍ଲୀ, ୨୧/୦୮ : ରେଳ ଯାତ୍ରୀଙ୍କୁ ପାର୍ବଣ ଭେଟି। ଦୀପାବଳି ଓ ଛଟ୍ ପୂଜା ଅବସରରେ ରେଳ ମନ୍ତ୍ରୀ ଅଶ୍ଵିନୀ ବୈଷ୍ଣବଙ୍କ ବଡ଼ ଘୋଷଣା। ଦୀପାବଳି ଓ ଛଟ୍ରେ ଚାଲିବ ୧୨ ହଜାରରୁ ଅଧିକ ସ୍ପେଶାଲ୍ ଟ୍ରେନ୍। ବିହାରରୁ ଚାଲିବ ଆଉ ୪ ଅମୃତ ଭାରତ ଏକ୍ସପ୍ରେସ୍ ଟ୍ରେନ୍। ସେହିପରି ପୂର୍ଣ୍ଣିଆରୁ ପାଟନା ମଧ୍ୟରେ ଚାଲିବ ବନ୍ଦେ ଭାରତ ଏକ୍ସପ୍ରେସ୍ ଟ୍ରେନ୍। ବିହାରର ଉପ-ମୁଖ୍ୟମନ୍ତ୍ରୀ ସମ୍ରାଟ ଚୌଧୁରୀ, ସାଂସଦ ସଞ୍ଜୟ ଜୟସୱାଲ, କେନ୍ଦ୍ର ମନ୍ତ୍ରୀ ଲଲନ ସିଂହ ଓ ସାଂସଦ ସଞ୍ଜୟ କୁମାର ଝାଙ୍କ ସହ ଆଲୋଚନା କରିବା ପରେ ଏହି ନିଷ୍ପତ୍ତି ନିଆଯାଇଛି।
ରେଳ ମନ୍ତ୍ରୀ କହିଛନ୍ତି ଯେ, ଆଗକୁ ଦୀପାବଳି ଓ ଛଟ୍ ଦୁଇଟି ବଡ଼ ପର୍ବ ଆସୁଥିବାରୁ ରେଳ ଯାତ୍ରୀଙ୍କ ପାଇଁ ସ୍ଵତନ୍ତ୍ର ବ୍ୟବସ୍ଥା କରାଯାଇଛି। ଯାତ୍ରୀଙ୍କ ସୁବିଧାକୁ ଦୃଷ୍ଟିରେ ରଖି ୧୨ ହଜାରରୁ ଅଧିକ ସ୍ପେଶାଲ୍ ଟ୍ରେନ୍ ଚାଲିବ। ଅକ୍ଟୋବର ୧୩ ରୁ ୨୬ ମଧ୍ୟରେ ଯେଉଁ ଯାତ୍ରୀମାନେ ଅନୱାର୍ଡ ଜର୍ଣ୍ଣି କରିବେ ଓ ନଭେମ୍ଵର ୧୭ ରୁ ଡିସେମ୍ଵର ୧ ମଧ୍ୟରେ ଯେଉଁମାନେ ରିଟର୍ଣ୍ଣ ଜର୍ଣ୍ଣି କରିବେ ସେମାନଙ୍କୁ ରିଟର୍ଣ୍ଣ ଜର୍ଣ୍ଣିରେ ୨୦ ପ୍ରତିଶତ ଡିସକାଉଣ୍ଟ ସୁବିଧା ମିଳିବ। ଏହାଦ୍ଵାରା ରେଳଯାତ୍ରୀମାନେ ଉପକୃତ ହେବେ।
ଏହା ବ୍ୟତୀତ ଗୟାରୁ ଦିଲ୍ଲୀ, ସହରସାରୁ ଅମୃତସର, ଛପରାରୁ ଦିଲ୍ଲୀ ଓ ମୁଜାଫରପୁରରୁ ହାଇଦ୍ରାବାଦ ମଧ୍ୟରେ ୪ଟି ଅମୃତ ଭାରତ ଏକ୍ସପ୍ରେସ୍ ଟ୍ରେନ୍ ଦୌଡ଼ିବ। ଭଗବାନ ବୁଦ୍ଧଙ୍କ ପବିତ୍ର ସ୍ଥାନ ଦେଇ ମଧ୍ୟବିତ୍ତ ପରିବାର ପାଇଁ ଏକ ନୂଆ ସର୍କିଟ୍ ଗାଡି ଚାଲିବ। ଯାହାକି ବୈଶାଳି, ହାଜିପୁର, ସୋନପୁର, ପାଟନା, ରାଜଗିର, ଗୟା, କୋଡରମା ଦେଇ ଯାତ୍ରା କରିବ। ଏହା ବ୍ୟତୀତ, ବକ୍ସରରୁ ଲଖିସରାଇ ରେଳ ସେକ୍ସନକୁ ଚାରି ଲାଇନ ବିଶିଷ୍ଟ କରାଯିବ ଯାହା ଦ୍ଵାରା ଅଧିକ ଟ୍ରେନ ଚାଲିପାରିବ। ପାଟନାର ଚାରିପାଖରେ ରିଙ୍ଗ ରେଲୱେ ବ୍ୟବସ୍ଥା କରାଯିବ। ସୁଲତାନଗଞ୍ଜ ଓ ଦେବଘରକୁ ଯୋଡ଼ିବ। ପାଟନାରୁ ଅଯୋଧ୍ୟା ପାଇଁ ନୂଆ ଟ୍ରେନ୍ ଚାଲିବ। ବିହାରରେ ଅନେକ ନୂତନ ରାସ୍ତା ଓଭରବ୍ରିଜ୍ ପାଇଁ ଅନୁମୋଦନ କରାଯାଇଛି, ଏହା ଉପରେ ମଧ୍ୟ କାର୍ଯ୍ୟ କରାଯିବ ବୋଲି ରେଳ ମନ୍ତ୍ରୀ ଅଶ୍ଵିନୀ ବୈଷ୍ଣବ କହିଛନ୍ତି।
