ଉମରକୋଟ,୧୭/୧୧: ଓଡ଼ିଶାରୁ ଛତିଶଗଡ଼କୁ ଗଞ୍ଜେଇ ଚୋରା ଚାଲାଣ ବେଳେ ମାଡ଼ି ବସିଲା ଛତିଶଗଡ଼ ପୋଲିସ । ଦୁଇଟି ବ୍ୟାଗରୁ ୩୪କିଲୋ ୭୦ ଗ୍ରାମ ଗଞ୍ଜେଇ ଜବତ କରାଯାଇଛି । ଜବତ ଗଞ୍ଜେଇର ମୂଲ୍ୟ ୩ ଲକ୍ଷ ୪୦ ହଜାର ଟଙ୍କା ହେବ ବୋଲି ଜଣାପଡ଼ିଛି । ଏହି ଘଟଣାରେ ସମ୍ପୃକ୍ତ ଥିବା ବ୍ୟକ୍ତି ଲିଙ୍ଗରାଜ ସାହୁ (୩୫) ଗିରଫ ହୋଇଛନ୍ତି । ଏହି ଚଢ଼ାଉରେ ଦେଓଭୋଗ ଥାନା ଏଏସ୍‌ଆଇ, କୁମାର ଲାଲ ମହିଳାଙ୍ଗ, ହେଡ଼ କନେଷ୍ଟେବଲ ନିମିଚନ୍ଦ ପଟେଲ, କାପୁରଚନ୍ଦ ନେତାମ ପ୍ରମୁଖ ସାମିଲ ଥିଲେ । ନବରଙ୍ଗପୁର ଜିଲ୍ଲା ଉମରକୋଟ ଅଞ୍ଚଳରେ ଏଭଳି ଘଟଣା ଘଟିଛି । 

ସୂଚନା ମୁତାବକ, ଶନିବାର ସନ୍ଧ୍ୟାରେ ଲିଙ୍ଗରାଜ ସାହୁ ନିଜ ବାଇକ୍‌ରେ ଦୁଇଟି ବ୍ୟାଗରେ ୩୪କିଲୋ ୭୦ ଗ୍ରାମ ଗଞ୍ଜେଇ ନେଇ ଯାଉଥିଲେ । ସେ ଏହି ଗଞ୍ଜେଇକୁ ଛତିଶଗଡ଼ର ରାଜଧାନୀ ରାୟପୁରକୁ ଚୋରା ଚାଲାଣ କରୁଥିଲେ । ଏହି ସମୟରେ ଗୋହରାପଦର ଠାରେ ଦେଓଭୋଗ ପୋଲିସ ରାସ୍ତାରେ ଗାଡ଼ି ଅଟକାଇ ଯାଞ୍ଚ କରୁଥିଲା । ଏହି ଯାଞ୍ଚରେ ସେ ଧରା ପଡ଼ିଥିଲେ । ଧରା ପଡ଼ିବା ପରେ ଲିଙ୍ଗରାଜ ସାହୁଙ୍କ ନାମରେ ଏନଡିପିଏସ ମାମଲା ରୁଜୁ କରି ଗଞ୍ଜେଇ ବୋଝେଇ ବାଇକ୍‌କୁ ଜବତ କରିବା ସହ ତଦନ୍ତ ଜାରି ରଖିଛି ପୋଲିସ । ଜବତ ଗଞ୍ଜେଇର ମୂଲ୍ୟ ୩ ଲକ୍ଷ ୪୦ ହଜାର ଟଙ୍କା ହେବ ବୋଲି ପୋଲିସ ସୂଚନା ମିଳିଛି ।