ନୂଆଦିଲ୍ଲୀ,୨୭/୧୧: ବଢ଼ିଚାଲିଛି ଆଦାନି ଗ୍ରୁପ୍ର ଅଡୁଆ । ଲଗାତର ଦ୍ୱିତୀୟ ଦିନ ପାଇଁ ଗ୍ରୁପ୍ର ସେୟାର ମୂଲ୍ୟ ହ୍ରାସ ପାଇଛି । ଏହା ମଧ୍ୟରେ ରେଟିଂ ଏଜେନ୍ସି ମୁଡିସ୍ ଆଦାନି ଗ୍ରୀନ୍ ଏବଂ ଆଦାନି ପୋର୍ଟସ ସହିତ ଗ୍ରୁପ୍ର ୭ କମ୍ପାନିଙ୍କ ପାଇଁ ରେଟିଂ ଆଉଟ୍ଲୁକ୍କୁ ‘ନେଗେଟିଭ୍’କୁ ଖସାଇଛି । ତେବେ ଏଥିମଧ୍ୟରେ ଆଦାନି ଗ୍ରୀନ୍ ଏନର୍ଜି ଏବଂ ଆଦାନି ଟ୍ରାନ୍ସମିଶନ୍ର ଦୁଇଟି ଲେଖାଏଁ ୟୁନିଟ୍, ଆଦାନି ଇଲେକ୍ଟ୍ରିସିଟି ମୁମ୍ବାଇ ଲିମିଟେଡ, ଆଦାନି ପୋର୍ଟସ ଏବଂ ଆଦାନି ଇଣ୍ଟର୍ନ୍ୟାସ୍ନାଲ କଣ୍ଟେନର ଟର୍ମିନାଲ ସାମିଲ ଥିବା ଜଣାପଡିଛି ।
ମୁଡିସ୍ର ରିପୋର୍ଟ ଅନୁଯାୟୀ, ଆମେରିକା ଆଟର୍ଣ୍ଣି କାର୍ଯ୍ୟାଳୟ ପକ୍ଷରୁ ଆଦାନି ଗ୍ରୀନ୍ ଏନର୍ଜି ଲିମିଟେଡ୍ର ଅଧ୍ୟକ୍ଷ ଗୌତମ ଆଦାନି ଏବଂ ଅନ୍ୟାନ୍ୟ ବରିଷ୍ଠ ଅଧିକାରୀମାନଙ୍କ ବିରୋଧରେ ଆପରାଧିକ ଅଭିଯୋଗ ଆସିବା ପରେ ମୁଡିସ୍ ଏ ପଦକ୍ଷେପ ନେଇଛି । ଗୌତମ ଆଦାନିଙ୍କ ବିରୋଧରେ ଆସିଥିବା ଅଭିଯୋଗ ଯୋଗୁ ଆଦାନି ଗ୍ରୁପ୍କୁ ଫଣ୍ଡିଂ ମିଳିବାରେ ସମସ୍ୟା ହୋଇପାରେ । ଫଳରେ ଗ୍ରୁପ୍ର ପୁଞ୍ଜିଗତ ବ୍ୟୟରେ ବୃଦ୍ଧି ଘଟିପାରେ । ମୁଡିସ୍ ଆଦାନି ଗ୍ରୀନ୍ ପାଇଁ ଏହାର ବିଏ୧ ରେଟିଂ ଏବଂ ଆଦାନି ଟ୍ରାନ୍ସମିଶନ୍, ଆଦାନି ଇଲେକ୍ଟ୍ରିସିଟି, ଆଦାନି ପୋର୍ଟସ ଏବଂ ଆଦାନି ଇଣ୍ଟର୍ନ୍ୟାସ୍ନାଲ କଣ୍ଟେନର ଟର୍ମିନାଲ ପାଇଁ ବିଏଏ୩ ରେଟିଂକୁ ବଳବତ୍ତର ରଖିଛି ।
ସେହିପରି ସମସ୍ତ ୭ କମ୍ପାନିଙ୍କ ଉପରେ ନେଗେଟିଭ୍ ଆଉଟ୍ଲୁକ୍କୁ ଦୃଷ୍ଟିରେ ରଖି ନିକଟ ଭବିଷ୍ୟତରେ ରେଟିଂରେ ସୁଧାର ସମ୍ଭାବନା ନାହିଁ । ତେବେ ଯଦି ଆଇନଗତ କାର୍ଯ୍ୟାନୁଷ୍ଠାନ ସ୍ପଷ୍ଟ ରୂପେ ବିନା କୌଣସି ନକାରାତ୍ମକ ପ୍ରଭାବରେ ସମାପ୍ତ ହୁଏ ତେବେ ଆମେ ରେଟିଂ ଆଉଟ୍ଲୁକ୍କୁ ସ୍ଥିରକୁ ବଦଳାଇପାରିବୁ । ଏହାପୂର୍ବରୁ ଫିଚ୍ ରେଟିଂ ବି ଆଦାନି ଗ୍ରୁପ୍ର ବିଭିନ୍ନ କମ୍ପାନି ଏବଂ ବଣ୍ଡ୍କୁ ନେଗେଟିଭ୍ ୱାଚ୍ଲିଷ୍ଟରେ ରଖିସାରିଛି । ଫିଚ୍ ପକ୍ଷରୁ ଆଦାନି ଏନର୍ଜି ସଲ୍ୟୁସନ୍ସ, ଆଦାନି ଇଲେକ୍ଟ୍ରିସିଟି ମୁମ୍ବାଇ ଏବଂ ଆଦାନି ପୋର୍ଟସର କିଛି ଟଙ୍କା ଓ ଡଲାର ବଣ୍ଡ୍କୁ ନେଗେଟିଭ୍ ୱାଚ୍ ଲିଷ୍ଟ୍ରେ ରଖାଯାଇଛି ।
ସୂଚନାଯୋଗ୍ୟ,ଆମେରିକା ପକ୍ଷରୁ ଆଦାନି ଗ୍ରୁପ୍ ବିରୋଧରେ ଆସିଛି ସଙ୍ଗୀନ ଅଭିଯୋଗ । ନିବେଶକଙ୍କୁ ମିଥ୍ୟା ସୂଚନା ଦେଇ ଆଦାନି ଗ୍ରୁପ୍ ସେମାନଙ୍କୁ ଭୁଆଁ ବୁଲାଇଛି । ସେମାନଙ୍କଠାରୁ ପାଣ୍ଠି ହାତେଇ ଉକ୍ତ ଟଙ୍କାକୁ ଭାରତରେ ଏକ ସୌର ଶକ୍ତି କଣ୍ଟ୍ରାକ୍ଟ ପାଇବା ନିମନ୍ତେ ଲାଞ୍ଚ ବାବଦ ବ୍ୟବହାର କରିଥିବା ଅଭିଯୋଗ ଆସିଛି । ୟୁନାଇଟେଡ୍ ଷ୍ଟେଟ୍ସ ଆଟର୍ଣ୍ଣି କାର୍ଯ୍ୟାଳୟ ମୁତାବକ, ଆଦାନି ଗ୍ରୁପ୍ ଭାରତରେ ସୌରଶକ୍ତି ସହ ଜଡ଼ିତ ଏହି କଣ୍ଟ୍ରାକ୍ଟ ହାସଲ କରିବା ପାଇଁ ଅଧିକାରୀମାନଙ୍କୁ ୨୬.୫ କୋଟି ଡଲାର ବା ପାଖାପାଖି ୨୨୦୦ କୋଟି ଟଙ୍କାର ଲାଞ୍ଚ ଦେଇଛି । ଏହି ଯୋଜନା ୨୦୧୯ ଡିସେମ୍ବରରୁ ୨୦୨୦ ଜୁଲାଇ ମଧ୍ୟରେ ପ୍ରସ୍ତୁତ ହୋଇଥିଲା ।
ଆମେରିକାର ପ୍ରତିଭୂତି ବିନିମୟ କମିଶନ ପକ୍ଷରୁ ହୋଇଥିବା ମାମଲା ଅନୁସାରେ, ଗୌତମ ଆଦାନିଙ୍କ ଉପରେ କଥିତ ଭାବେ ଆମେରିକୀୟ ନିବେଶକଙ୍କୁ ଠକିବା ଏବଂ ଅଧିକାରୀମାନଙ୍କୁ ଲାଞ୍ଚ ଦେଇଥିବା ଅଭିଯୋଗ ରହିଛି । ମିଥ୍ୟା ଏବଂ ବିଭ୍ରାନ୍ତିକର ତଥ୍ୟ ମାଧ୍ୟମରେ ଆଦାନି ଓ ଅନ୍ୟ ଅଭିଯୁକ୍ତମାନେ ଆମେରିକୀୟ ନିବେଶକ ଏବଂ ବିଶ୍ୱ ବିତ୍ତୀୟ ସଂସ୍ଥାନଗୁଡ଼ିକରୁ ପାଣ୍ଠି ନେଇଛନ୍ତି । ଏହାପରେ ଉକ୍ତ ରାଶିକୁ ଲାଞ୍ଚ ଦେବା ପାଇଁ ବ୍ୟବହାର କରିଛନ୍ତି । ଆମେରିକାରେ ମାମଲା ଏଥିପାଇଁ ଦାଏର ହୋଇଛି କାରଣ ପ୍ରୋଜେକ୍ଟରେ ଆମେରିକାର ନିବେଶକଙ୍କ ଅର୍ଥ ଲାଗିଥିଲା ଏବଂ ଆମେରିକା ଆଇନ ଅଧୀନରେ ଉକ୍ତ ଟଙ୍କାକୁ ଲାଞ୍ଚ ଆକାରରେ ବ୍ୟବହାର କରିବା ଅପରାଧ । ଏହି ମାମଲାରେ ଆଦାନିଙ୍କ ସହିତ ପୁତୁରା ସାଗର ଆଦାନିଙ୍କ ବିରୋଧରେ ଗିରଫ ପରୱାନା ଜାରି ହୋଇଛି ।
