ବାଣପୁର, ୨୭/୧୦: ବାଣପୁରରେ ଅଭାବନୀୟ ଘଟଣା । ଘରୋଇ କଳିରୁ ନିଜ ଜନ୍ମକଲା ଝିଅକୁ ଅକଥନୀୟ ନିର୍ଯାତନା ଦେବାକୁ ପଛେଇଲାନି ମା । ସ୍ୱାମୀ-ସ୍ତ୍ରୀ କଳିରେ ଶିଶୁକନ୍ୟାକୁ ତଣ୍ଟି ଚିପି ଜୀବନରୁ ମାରି ଦେବାକୁ ଉଦ୍ୟମ କଲା ମା । ଖୋର୍ଦ୍ଧା ଜିଲ୍ଲା ବାଣପୁର ଥାନା ଅଧିନସ୍ଥ କୁଲେଇ ପଞ୍ଚାୟତ ର ହରିଚନ୍ଦନପୁର ଗ୍ରାମରେ ଏଭଳି ଘଟଣା ଘଟିଛି ।
ସୂଚନା ମୁତାବକ, ହରିଚନ୍ଦନପୁର ଗ୍ରାମର ବିଚିତ୍ର ନାୟକ ଓ ତାଙ୍କ ପତ୍ନୀ ବନିତା ନାୟକ । ସ୍ୱାମୀ-ସ୍ତ୍ରୀଙ୍କ ମଧ୍ୟରେ କୈ।ଣସି କାରଣରୁ କଳିଝଗଡା ଲାଗି ରହିଥିଲା । ତେବେ ବର୍ତ୍ତମାନ ବିଚିତ୍ର ରାଜ୍ୟ ବାହାରେ ରହି କାମ କରୁଛନ୍ତି । ତାଙ୍କର ଗୋଟିଏ ଦେଢ଼ ବର୍ଷର ଶିଶୁ କନ୍ୟା ରହିଛି । ତେବେ ସ୍ୱାମୀଙ୍କ ସହ ହୋଇଥିବା ଝଗଡାରେ ବନିତା ନିଜ ରାଗକୁ ସମ୍ଭାଳି ନପାରି ନିଜର ଜନ୍ମିତ ଛୁଆକୁ ନିସ୍ତୁକ ଗୋଇଠା ମାଡ଼ ମାରିଥିଲେ । କେବଳ ସେତିକି ନୁହେଁ, ନିଜ ଝିଅକୁ ଖରାପ ଭାଷାରେ ଗାଳିଗୁଲଜ କରି ତଣ୍ଟି ଚିପି ଜୀବନରୁ ମାରି ଦେବାକୁ ଉଦ୍ୟମ କରି ମଧ୍ୟ କରିଥିଲେ । ମୁଁ ମୋର ଛୁଆକୁ ମାରି ଦେବି ଏବଂ ନିଜେ ଆତ୍ମହତ୍ୟା କରିବି ବୋଲି କହି ସେହି ସମୟର ଭିଡ଼ିଓ କରି ସ୍ୱାମୀଙ୍କ ପାଖକୁ ପଠାଇଥିଲେ । ଯାହା ବର୍ତ୍ତମାନ ଭାଇରାଲ ହେଉଛି ।
ଭିଡିଓ ଦେଖିବା ପରେ ପରିବାର ଲୋକେ ବାଣପୁର ଥାନାର ଦ୍ୱାରସ୍ଥ ହୋଇଥିଲେ । ଘଟଣା ସମ୍ପର୍କରେ ଜାଣି ବାଣପୁର ପୋଲିସ ଘଟଣାସ୍ଥଳରେ ପହଞ୍ଚି ନିର୍ଯାତିତ ଶିଶୁକୁ ଉଦ୍ଧାର କରିଛି । ଏହା ସହ ଅତ୍ୟାଚାରୀ ମାକୁ ଥାନାରେ ଅଟକ ରଖି ପଚରାଉଚରା କରୁଛି ପୋଲିସ ।
