ନୂଆଦିଲ୍ଲୀ,୨୫/୦୫: ବାଂଲାଦେଶରେ ଦେଖାଦେଇଛି ରାଜନୈତିକ ଅସ୍ଥିରତା । ଆଉ ଏହାରି ମଧ୍ୟରେ ବାଂଲାଦେଶର ପୂର୍ବତନ ପ୍ରଧାନମନ୍ତ୍ରୀ ଶେଖ୍ ହସିନା ମଧ୍ୟବର୍ତ୍ତୀକାଳୀନ ସରକାରଙ୍କ ମୁଖ୍ୟ ମହମ୍ମଦ ୟୁନୁସଙ୍କ ବିରୋଧରେ ଆଣିଛନ୍ତି ଗମ୍ଭୀର ଅଭିଯୋଗ । ସେ କହିଛନ୍ତି ଯେ, ୟୁନୁସ ଆତଙ୍କବାଦୀଙ୍କ ସହାୟତାରେ ବାଂଲାଦେଶରେ କ୍ଷମତା ଦଖଲ କରିଛନ୍ତି । ଏଥିମଧ୍ୟରୁ ଏଭଳି ଅନେକ ଆତଙ୍କବାଦୀ ସଂଗଠନ ଅଛି ଯାହା ଉପରେ ଅନ୍ତରାଷ୍ଟ୍ରୀୟ ସ୍ତରରେ ବ୍ୟାନ୍ ହୋଇଛି ।
ପୂର୍ବତନ ପ୍ରଧାନମନ୍ତ୍ରୀ ଶେଖ୍ ହସିନା ତାଙ୍କ ଫେସବୁକ୍ ପୋଷ୍ଟରେ କହିଛନ୍ତି ଯେ, ୟୁନୁସ କ୍ଷମତା ଦଖଲ କରିବା ପାଇଁ ନିଷିଦ୍ଧ ଲୋକଙ୍କ ସାହାଯ୍ୟ ନେଇଛନ୍ତି, ଯେଉଁମାନଙ୍କଠାରୁ ଆମେ ଏପର୍ଯ୍ୟନ୍ତ ବାଂଲାଦେଶର ନାଗରିକମାନଙ୍କୁ ସୁରକ୍ଷା ଦେଇ ଆସିଥିଲୁ। କେବଳ ଗୋଟିଏ ଆତଙ୍କବାଦୀ ଆକ୍ରମଣ ପରେ ଆମେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିଥିଲୁ। ଅନେକ ଲୋକଙ୍କୁ ଗିରଫ କରାଯାଇଥିଲା, କିନ୍ତୁ ଏବେ ବାଂଲାଦେଶର ଜେଲ୍ଗୁଡ଼ିକ ଖାଲି ପଡ଼ିଛି। ଆଉ ଏବେ ଆତଙ୍କବାଦୀମାନେ ବାଂଲାଦେଶରେ ଶାସନ କରୁଛନ୍ତି।
ସେ ଆହୁରି ମଧ୍ୟ କହିଛନ୍ତି ଯେ, ବଙ୍ଗୀୟ ରାଷ୍ଟ୍ରର ସମ୍ବିଧାନକୁ ଆମେ ଏକ ଦୀର୍ଘ ସଂଘର୍ଷ ଏବଂ ମୁକ୍ତି ସଂଗ୍ରାମ ମାଧ୍ୟମରେ ହାସଲ କରିଛୁ। ବେଆଇନ ଭାବରେ କ୍ଷମତା ଦଖଲ କରିଥିବା ଏହି ଉଗ୍ରବାଦୀ ନେତାଙ୍କୁ ସମ୍ବିଧାନକୁ ସ୍ପର୍ଶ କରିବାର ଅଧିକାର କିଏ ଦେଲା? ସେମାନଙ୍କ ପାଖରେ ଲୋକଙ୍କର ଜନାଦେଶ ନାହିଁ, ସେମାନଙ୍କର କୌଣସି ସାମ୍ବିଧାନିକ ଆଧାର ନାହିଁ। ସେ କହିଛନ୍ତି ଯେ, ୟୁନୁସଙ୍କୁ ମୁଖ୍ୟ ପରାମର୍ଶଦାତା ପଦବୀରେ ରହିବାର କୌଣସି ଆଧିକାର ନାହିଁ ଏବଂ ଏହାର କୌଣସି ଅସ୍ତିତ୍ୱ ନାହିଁ। ଏପରି ପରିସ୍ଥିତିରେ, ସେ ସଂସଦ ବିନା ଆଇନ କିପରି ପରିବର୍ତ୍ତନ କରିପାରିବେ, ଏହା ବେଆଇନ। ସେ ଦେଶରେ ଅବାମୀ ଲିଗ୍ ଉପରେ ପ୍ରତିବନ୍ଧତା ଲଗାଇଛନ୍ତି ।
ବାଂଲାଦେଶର ପୂର୍ବତନ ପ୍ରଧାନମନ୍ତ୍ରୀ ଶେଖ୍ ହସିନା ତାଙ୍କ ପିତାଙ୍କ ସମୟକୁ ମନେ ପକାଇ କହିଥିଲେ ଯେ ଯେତେବେଳେ ଆମେରିକା ସେଣ୍ଟ ମାର୍ଟିନ୍ ଦ୍ୱୀପ ଚାହୁଁଥିଲା, ମୋ ପିତା ଶେଖ୍ ମୁଜିବୁର ରହମାନ ଏଥିରେ ରାଜି ହୋଇନଥିଲେ। ତାଙ୍କୁ ନିଜ ଜୀବନ ବଳିଦାନ ଦେବାକୁ ପଡିଲା ଏବଂ ତାହା ହିଁ ମୋର ଭାଗ୍ୟ ଥିଲା। କାରଣ ମୋ ମନରେ କେବେ ଆସିନଥିଲା ଯେ କ୍ଷମତାରେ ରହିବା ପାଇଁ ଦେଶକୁ ବିକ୍ରି କରିଦିଆଯିବ ଏବଂ ଜାତିର ପିତା ବଙ୍ଗବନ୍ଧ ଶେଖ ମୁଜିବୁର ରହମାନଙ୍କ ଡାକରାରେ ଅସ୍ତ୍ର ଧରିଥିବା ଦେଶର ଲୋକମାନେ ୩୦ଲକ୍ଷ ଲୋକଙ୍କୁ ମୁକ୍ତ କରିବା ପାଇଁ ଲଢ଼ିଥିଲେ ଏବଂ ନିଜ ଜୀବନ ବଳିଦାନ ଦେଇଥିଲେ। ସେହି ଦେଶର ଗୋଟିଏ ଇଞ୍ଚ ମଧ୍ୟ କାହାକୁ ଦେବା କାହାର ଉଦ୍ଦେଶ୍ୟ ହୋଇପାରେ ନାହିଁ। କିନ୍ତୁ ଆଜି ୟୁନୁସ ବାଂଲାଦେଶକୁ ଆମେରିକାକୁ ବିକ୍ରି କରୁଛନ୍ତି।
ତେବେ ବାଂଲାଦେଶରେ ମଧ୍ୟବର୍ତ୍ତୀକାଳୀନ ସରକାରଙ୍କୁ ହଟାଇବା ପାଇଁ ପ୍ରସ୍ତୁତି ଚାଲିଛି। ସେନା ଏବଂ ବାଂଲାଦେଶ ନ୍ୟାସନାଲିଷ୍ଟ ପାର୍ଟି ଡିସେମ୍ବର ସୁଦ୍ଧା ନିର୍ବାଚନ କରିବାକୁ ଦାବି କରୁଛନ୍ତି। ଏହା ଉପରେ, ଅନ୍ତରୀଣ ସରକାର ମୁଖ୍ୟ ମହମ୍ମଦ ୟୁନୁସ୍ କହିଛନ୍ତି ଯେ, ଯଦି ତାଙ୍କ ଉପରେ ନିର୍ବାଚନ କରିବା ପାଇଁ କିମ୍ବା ଅନ୍ୟ କୌଣସି ପ୍ରସଙ୍ଗରେ ଅନାବଶ୍ୟକ ଚାପ ପକାଯାଏ, ତେବେ ସେ ଜନସାଧାରଣଙ୍କ ସହିତ ମିଶି ପ୍ରତିଶୋଧ ନେବେ।
