ନୂଆଦିଲ୍ଲୀ,୦୪/୦୭: ଭାରତ ଏବଂ ଏସିଆର ସବୁଠାରୁ ଧନୀ ବ୍ୟକ୍ତି ମୁକେଶ ଅମ୍ବାନିଙ୍କ କମ୍ପାନି ରିଲାଏନ୍ସ ଇଣ୍ଡଷ୍ଟ୍ରିଜ୍ ଲିମିଟେଡ୍ (ଆର୍ଆଇଏଲ୍) ଏକ ବଡ଼ ପରିବର୍ତ୍ତନ କରିବାକୁ ଯାଉଛି । ଏହି ପରିବର୍ତ୍ତନ ତାଙ୍କ ଏଫ୍ଏମ୍ସିଜି କାରବାରରେ ହେବ । ଆର୍ଆଇଏଲ୍ ଏହାର ସମସ୍ତ ଏଫ୍ଏମ୍ସିଜି ବ୍ରାଣ୍ଡ୍ଗୁଡ଼ିକୁ ଏକ ନୂଆ କମ୍ପାନିରେ ସାମିଲ କରିବ ।
ଏବେ ଏ ବ୍ରାଣ୍ଡ୍ଗୁଡ଼ିକ ରିଲାଏନ୍ସ ରିଟେଲ ଭେଞ୍ଚର୍ସ ଲିମିଟେଡ୍(ଆର୍ଆର୍ଭିଏଲ୍), ରିଲାଏନ୍ସ ରିଟେଲ୍ ଲିମିଟେଡ୍(ଆର୍ଆର୍ଏଲ୍) ଏବଂ ରିଲାଏନ୍ସ କଞ୍ଜ୍ୟୁମର ପ୍ରଡକ୍ଟ୍ସ ଲିମିଟେଡ୍(ଆର୍ସିପିଏଲ୍) ଅଧୀନରେ ରହିଛି । ନୂଆ କମ୍ପାନି ନାଁ ‘ନ୍ୟୁ ରିଲାଏନ୍ସ କଞ୍ଜ୍ୟୁମର ପ୍ରଡକ୍ଟ୍ସ ଲିମିଟେଡ୍’ ହେବ । ଏ କମ୍ପାନି ଜିଓ ପ୍ଲାଟ୍ଫର୍ମସ ଲିମିଟେଡ୍ ଭଳି ସିଧାସଳଖ ଭାବେ ଆର୍ଆଇଏଲ୍ର ସହାୟକ କମ୍ପାନି ହେବ । ଏହି ପରିବର୍ତ୍ତନର ଉଦ୍ଦେଶ୍ୟ ଏଫ୍ଏମ୍ସିଜି ବ୍ରାଣ୍ଡ୍ଗୁଡ଼ିକ ଉପରେ ଧ୍ୟାନ ଦେବା । ଏହାସହିତ ନିବେଶକଙ୍କୁ ଆକର୍ଷିତ କରିବା ପାଇଁ ଏ ଯୋଜନା ଉପରେ କାର୍ଯ୍ୟ ହେଉଛି ।
ଆର୍ସିପିଏଲ୍ର ନିର୍ଦ୍ଦେଶକ ଏବଂ ଗ୍ରୁପ୍ର ଏଫ୍ଏମ୍ସିଜି ମୁଖ୍ୟ ଟି. କୃଷ୍ଣକୁମାର କହିଛନ୍ତି ଯେ, ୬୦ କୋଟି ଉପଭୋକ୍ତାଙ୍କ ଉପରେ ଧ୍ୟାନକେନ୍ଦ୍ରିତ କରିବା ଏବଂ ପଡ଼ୋଶୀ ଦୋକାନଗୁଡ଼ିକ ସହ ମିଳିତ ହୋଇ କାର୍ଯ୍ୟ କରିବା ହେଉଛି ରଣନୀତି ।
