ମୁମ୍ବାଇ,୩।୪: ଉଦ୍ୟୋଗପତି ଅନିଲ ଅମ୍ବାନୀଙ୍କ ଏକ ମାମଲାର ତୁରନ୍ତ ଶୁଣାଣି କରିବାକୁ ମନା କରିଛନ୍ତି ବମ୍ବେ ହାଇକୋର୍ଟ । ଏହା ସହ କୋର୍ଟ ଅନିଲ ଅମ୍ବାନୀଙ୍କ ଅନୁରୋଧକୁ କେବଳ ଅସ୍ବୀକାର କରିଛନ୍ତି ତାହା ନୁହେଁ, ବଂର ତାଙ୍କ ଉପରେ ୨୫ ହଜାର ଟଙ୍କାର ଜରିମାନା ଲଗାଇଛନ୍ତି। ଏହି ଜରିମାନା ୧୨ ଅପ୍ରେଲ ୨୦୨୨ ରେ ଇନକମ୍ ଟ୍ୟାକ୍ସ ବିଭାଗ ଦ୍ବାରା ପଠାଯାଇଥିଲା। ଏହି ନୋଟିସ୍କୁ ଚ୍ୟାଲେଞ୍ଜ ଦେଇ ମାମଲାର ତୁରନ୍ତ ଶୁଣାଣି କରିବା ନେଇ ଦାବି କରିଥିଲେ ଅମ୍ବାନୀ।
୨୭ ମାର୍ଚ୍ଚରେ ଅନିଲ ଅମ୍ବାନୀ ହାଇକୋର୍ଟରେ ଆବେଦନ କରି ମାମଲାର ତୁରନ୍ତ ଶୁଣାଣି କରିବାକୁ ଦାବି କରିଥିଲେ। ତେବେ ନ୍ୟାୟମୂର୍ତ୍ତି ଏମ୍.ଏସ୍ ସୋନକେ ଓ ନ୍ୟାୟମୂର୍ତ୍ତି ଜିତେନ୍ଦ୍ର ଜୈନଙ୍କ ଖଣ୍ଡପୀଠ ଏହାକୁ ‘ବିନା କାରଣରେ ତରବର ଶୁଣାଣି ଅନୁରୋଧ’ ବୋଲି କହିବା ସହ ଅସନ୍ତୋଷ ପ୍ରକାଶ କରିଛନ୍ତି।
କୋର୍ଟ କହିଛନ୍ତି, ଏହା କେବଳ ଏକ କାରଣ ଦର୍ଶାଅ ନୋଟିସ୍କୁ ଚ୍ୟାଲେଞ୍ଜ ଦେବାର ମାମଲା। ଆବେଦନକାରୀ ଅନ୍ତିମ ସମୟରେ କୋର୍ଟଙ୍କ ଦ୍ବାରସ୍ତ ହୋଇଛନ୍ତି। ତେଣୁ ଏହି ଅନୁରୋଧକୁ ଖାରଜ କରାଯାଉଛି। ଆବେଦନକାରୀଙ୍କୁ ଟାଟା ମେମୋରିଆଲ ହସ୍ପିଟାଲକୁ ଦୁଇ ସପ୍ତାହ ଭିତରେ ୨୫,୦୦୦ ଟଙ୍କାର ଜରିମାନା ରାଶି ଦେବାକୁ ହେବ।
କୋର୍ଟଙ୍କ ଏହି ନିର୍ଦେଶ ୨୭ ମାର୍ଚ୍ଚରେ ଜାରି କରାଯାଇଥିଲା। ଯାହାକି ୨ ଅପ୍ରେଲ ୨୦୨୫ ରେ ଉପଲବ୍ଧ କରାଯାଇଥିଲା। ଆବେଦନର ଶୁଣାଣି ୧ ଅପ୍ରେଲରେ ହେବାର ଥିଲା, କିନ୍ତୁ ଅନିଲ ଅମ୍ବାନୀଙ୍କ ଓକିଲ ରଫିକ୍ ଦାଦା କୋର୍ଟଙ୍କୁ ସୁନିଶ୍ଚିତ କରିଥିଲେ ଯେ, ଏହାକୁ ଫେରାଇ ନିଆଯାଉଛି, କାରଣ ଇନକମ୍ ଟ୍ୟାକ୍ସ ବିଭାଗ ୨୭ ମାର୍ଚ୍ଚରେ ସେ ସମ୍ପର୍କିତ ଆକଳନ ବର୍ଷ ପାଇଁ ନିଜର ନିର୍ଦେଶ ପାସ୍ କରିଦେଇଥିଲେ। ସେ ଏହା ମଧ୍ୟ କହିଥିଲେ ଯେ, କୋର୍ଟଙ୍କ ଦ୍ବାରା ଲଗାଯାଇଥିବା ଜରିମାନା ଦିଆଯାଇ ସାରିଛି। ଏହାପରେ ହାଇକୋର୍ଟ ମଙ୍ଗଳବାର ମାମଲାର ସମାଧାନ କରିଦେଇଥିଲେ।
