ନୂଆଦିଲ୍ଲୀ: କମେଡିଆନ କୁନାଲ କାମରାଙ୍କ ଘରେ ପହଞ୍ଚିଲା ମୁମ୍ୱାଇ ପୋଲିସ। ମହାରାଷ୍ଟ୍ର ଉପ-ମୁଖ୍ୟମନ୍ତ୍ରୀ ଏକନାଥ ସିନ୍ଧେଙ୍କୁ ନେଇ କମେଡି କରିବା ପରେ ହୋଇଥିବା ବିବାଦକୁ ନେଇ ମୁମ୍ୱାଇ ପୋଲିସ ନିକଟରେ ଅନେକ ଅଭିଯୋଗ ହୋଇଥିଲା। ଖାର ପୋଲିସ ଥାନା ପକ୍ଷରୁ ଏନେଇ କାମରାଙ୍କୁ ସମନ ମଧ୍ୟ ପଠାଯାଇଥିଲା। ହେଲେ ସେ ଥାନାରେ ପହଞ୍ଚି ନପାରିବାରୁ ପୋଲିସ କାର୍ଯ୍ୟାନୁଷ୍ଠାନ ପାଇଁ ତାଙ୍କ ବାସଭବନରେ ପହଞ୍ଚିଥିଲା ବୋଲି ଜଣାପଡିଛି।
ପୋଲିସ କାମରାଙ୍କ ନିକଟକୁ ଦୁଇଟି ସମନ ପଠେଇଛି। ମାର୍ଚ୍ଚ ୨୪ ତାରିଖରେ ଶିବ ସେନା ବିଧାୟକ ମୁର୍ଜି ପଟେଲଙ୍କ ଦ୍ୱାରା କାମରାଙ୍କ ନାମରେ ଏକ ମାମଲା ରୁଜୁ କରାଯାଇଥିଲା। ଏହା ସହ କାମରାଙ୍କ ବିରୋଧରେ ଖାର ପୋଲିସ ଥାନାରେ ଆଉ ୩ଟି ମାମଲା ମଧ୍ୟ ରୁଜୁ ହୋଇଛି। ଏହା ମଧ୍ୟରୁ ଜଳଗାଓଁ ସହରର ମେୟରଙ୍କ ଦ୍ୱାରା ଗୋଟିଏ, ହୋଟେଲ ପକ୍ଷରୁ ଗୋଟିଏ ଓ ନାସିକର ଜଣେ ବ୍ୟବସାୟୀଙ୍କ ଦ୍ୱାରା ଗୋଟିଏ ମାମଲା ରୁଜୁ କରାଯାଇଛି ବୋଲି ମୁମ୍ୱାଇ ପୋଲିସ ସୂଚନା ପ୍ରଦାନ କରିଛି।
ସୂଚନା ମୁତାବକ, ଗତ ମାର୍ଚ୍ଚ ୨୩ ତାରିଖରେ କୁନାଲ କାମରାଙ୍କ ଏକ ନୂଆ ଶୋ ରିଲିଜ ହୋଇଥିଲା। ଯେଉଁଥିରେ କାମରା ଦିଲ୍ ତୋ ପାଗଲ ହେ ଜି ସ୍ୱରରେ ଗୀତ ଗାଇ ଏକନାଥ ସିନ୍ଧେଙ୍କୁ ନେଇ କମେଡି କରିଥିଲେ। ଏହି ଭିଡିଓ ବିଭିନ୍ନ ସାମାଜିକ ଗଣମାଧ୍ୟମରେ ଭାଇରାଲ ହେବା ପରେ କେତେକ ଶିବସେନା କାର୍ଯ୍ୟକର୍ତ୍ତା ଶୋ ସୁଟ ହୋଇଥିବା ହାବିଟାଟ ହୋଟେଲରେ ପହଞ୍ଚି ଭଙ୍ଗାରୁଜା ଆରମ୍ଭ କରିଦେଇ
ଥିଲେ। ଏହାର ଦିନକ ପରେ ବିଏମସି ମଧ୍ୟ ଏହି ଷ୍ଟୁଡିଓର କେତେକ ଅଂଶକୁ ଭାଙ୍ଗିଦେଇଥିଲା।
ଏହି ଘଟଣାକୁ ନେଇ ବିବାଦ ଆରମ୍ଭ ହେବା ପରେ କାମରା ଏହାକୁ ନେଇ କ୍ଷମା ପ୍ରର୍ଥନା କରିବେ ନାହିଁ ବୋଲି ସିଧାସଳଖ ମନା କରିଥିଲେ। ଏହା ସହ ଶିବସେନା କାର୍ଯ୍ୟକର୍ତ୍ତାମାନଙ୍କ ଦ୍ୱାରା ହୋଟେଲରେ ହୋଇଥିବା ଭଙ୍ଗାରୁଜା ପାଇଁ ସେ ଶିବସେନାକୁ କଡା ସମାଲୋଚନା କରିଥିଲେ। “ମୁଁ ଆଦୌ ଭୁଲ ମାଗିବି ନାହିଁ। ମୁଁ ହିଂସାକାରୀଙ୍କୁ ଭୟ କରେନା। ସେମାନଙ୍କୁ ଡରି ମୁଁ ଘରେ ଲୁଚିପାରିବି ନାହିଁ” ବୋଲି ସାମାଜିକ ଗଣମାଧ୍ୟମରେ ଏକ ପୋଷ୍ଟ ଉଲ୍ଲେଖ କରିଥିଲେ।
ତେବେ ଗତ ଶୁକ୍ରବାର ଦିନ ମଦ୍ରାସ ହାଇ କୋର୍ଟ କାମରାଙ୍କୁ ଅଗ୍ରୀମ ଜାମିନ ପ୍ରଦାନ କରିଥିଲେ। ତେବେ ମୁମ୍ୱାଇରୁ ଯାଇଥିବା ପୋଲିସ ଟିମକୁ ସେ ଅଗ୍ରୀମ ଜାମିନ ଅର୍ଡର ଦେଖୈାଇବାରୁ ସେମାନେ ସେଠାରୁ ଚାଲିଆସିଥିଲେ। ତେବେ ସେ ବର୍ତ୍ତମାନ କୋର୍ଟରେ ଟ୍ରାନ୍ଜିଟ ଆଣ୍ଟି ସିପେଟ୍ରି ଜାମିନ ପାଇଁ ଆବେଦନ କରିଥିବା ଜଣାପଡିଛି। ବର୍ତ୍ତମାନ ସୁଦ୍ଧା ତାଙ୍କୁ ଅନେକ ଧମକପୂର୍ଣ୍ଣ କଲ ଆସି ସାରିଥିବା ତାଙ୍କ ଓକିଲ କୋର୍ଟକୁ ଜଣାଇଛନ୍ତି।
