ବେତନଟୀ,୧୬/୦୭: ରକ୍ତ ସମ୍ପର୍କରେ ରକ୍ତ ଛିଟା । ପାରିବାରିକ କଳହର କରୁଣ ପରଣତି । ବୃଦ୍ଧ ବାପା ଓ ମାଆଙ୍କୁ ହାତୁଡିରେ ଛେଚି ନୃଶଂସ ଭାବରେ ହତ୍ୟା କଲା ମଦ୍ୟପ ପୁଅ । ତେବେ ମୟରୂଭଞ୍ଜ ଜିଲ୍ଲା ବେତନଟୀର ଧନାପାଳ ଗ୍ରାମରୁ ଏହି ଘଟଣା ସାମ୍ନାକୁ ଆସିଛି। ଅଭିଯୁକ୍ତ ଜଣକ ହିମାଂଶୁ ସାହୁ ବୋଲି ଜଣାପଡ଼ିଛି ।
ସୂଚନା ମୁତାବକ, ଅଭିଯୁକ୍ତ ପେଶାରେ ଅଟୋ ଚାଳକ । ଘରେ ୮୫ ବର୍ଷୀୟ ବୃଦ୍ଧ ବାପା ହାଡିବନ୍ଧୁ ସାହୁ ଏବଂ ୭୮ବର୍ଷୀୟା ବୃଦ୍ଧା ମା' ଶାନ୍ତିଲତା ସାହୁ ରହୁଥିଲେ । ପାରିବାରିକ ସମସ୍ୟା ପାଇଁ ଅଭିଯୁକ୍ତ ହିମାଂଶୁଙ୍କ ସ୍ତ୍ରୀ ଏବଂ ପିଲାଛୁଆ ଦୀର୍ଘଦିନ ହେବ ସ୍ୱାମୀ ଠାରୁ ଅଲଗା ରହିଆସୁଥିଲେ । ହେଲେ ଘଟଣା ଦିନ ଅର୍ଥାତ୍ ବୁଧବାର ସକାଳେ ହିମାଂଶୁଙ୍କ ବୃଦ୍ଧା ମା'ଙ୍କ କ୍ଷତାକ୍ତ ମୃତଦେହ ଘର ଅଗଣାରେ ପଡ଼ିଥିବା ବେଳେ ହିମାଂଶୁ ସ୍ୱାଭାବିକ ଭାବରେ ଦାଣ୍ଡପିଣ୍ଡାରେ ପଡ଼ିଥିବା ପଲଙ୍କ ଉପରେ ବସିଥିଲା । ଗ୍ରାମବାସୀଙ୍କ ମନରେ ସନ୍ଦେହ ହେବାରୁ ପୁଲିସକୁ ଖବର ଦେଇଥିଲେ । ମାଣତ୍ରୀ ଫାଣ୍ଡି ଅଧିକାରୀ ଘଟଣାସ୍ଥଳରେ ପହଞ୍ଚି ଅଭିଯୁକ୍ତ ପୁଅକୁ ଗିରଫ କରିବା ସହିତ ତଦନ୍ତ ଆରମ୍ଭ କରିଛନ୍ତି । ଖୋଦ ଜନ୍ମକଲା ପୁଅ ବୃଦ୍ଧ ବାପା, ମା'ଙ୍କୁ ଅତ୍ୟନ୍ତ ନୃଶଂସ ଭାବରେ ହାତୁଡିରେ ଛେଚି ହତ୍ୟା କରିବା ଘଟଣା ଗାଁରେ ଭୟର ବାତାବରଣ ଖେଳାଇ ଦେଇଛି । ଏଭଳି ଜଘନ୍ୟ ହତ୍ୟାରେ ବ୍ୟବହୃତ ହାତୁଡିକୁ ପୁଲିସ ଖୋଜୁଥିବା ବେଳେ ଅଧିକ ତଦନ୍ତ ଜାରି ରଖିଛି ।
