ଭଞ୍ଜନଗର,୦୯/୧୦: ଗଞ୍ଜାମ ଜିଲ୍ଲା ସୋରଡ଼ା ଥାନା ଅନ୍ତର୍ଗତ ଗୋଛା ପଞ୍ଚାୟତ ସ୍ଵର୍ଗଦ୍ଵାର ଗାଁରେ ଅମାନୁଷିକ ଘଟଣା । ଜଣେ ଅର୍ଦ୍ଧ ପାଗଳ ଭିକ୍ଷୁକଙ୍କୁ ଠେଙ୍ଗାରେ ପିଟି ପିଟି ହତ୍ୟା କରାଯାଇଥିବା ଅଭିଯୋଗ । ମୃତକ ଧରାକୋଟ ବ୍ଲକ୍ ସିଙ୍ଗପୁର ଗ୍ରାମର ଶିଶିର ମୁନି (୫୫ ବର୍ଷ) ବୋଲି ଜଣାପଡ଼ିଛି। ପୁଲିସ ୨ ଅଭିଯୁକ୍ତଙ୍କୁ ଥାନାରେ ଅଟକ ରଖି ପଚରା ଉଚରା କରୁଛି ।
ସୂଚନା ମୁତାବକ, ମୃତ ବୃଦ୍ଧ ଜଣକ ଅର୍ଦ୍ଧ ପାଗଳ ଓ ସେ ଭିକ୍ଷା ବୃତ୍ତି କରୁଥିଲେ। ବୁଧବାର ବିଳମ୍ବିତ ରାତିରେ କିଛି ମଦ୍ୟପ ଭିକାରୀଙ୍କୁ ଠେଙ୍ଗାରେ ପିଟି ପିଟି ହତ୍ୟା କରିଥିଲେ । ଗୁରୁବାର ଭୋରୁ ସ୍ଥାନୀୟ ଲୋକ ସୂଚନା ଦେବା ପରେ ଘଟଣାସ୍ଥଳରେ ସୋରଡ଼ା ପୁଲିସ ପହଞ୍ଚି ମୃତଦେହକୁ ଜବତ କରିଛି । ଏହା ସହ ଦୁଇ ଜଣଙ୍କୁ ଥାନାରେ ରଖି ପଚରା ଉଚରା କରୁଥିବା ନେଇ ସୂଚନା ମିଳିଛି । ହେଲେ କେଉଁ କାରଣରୁ ତାଙ୍କୁ ହତ୍ୟା କରାଯାଇଛି ତାହା ବର୍ତ୍ତମାନ ସୁଦ୍ଧା ଅସ୍ପଷ୍ଟ ରହିଛି।
