ଭୁବନେଶ୍ୱର,୦୨/୦୧: ଟୁଇନ୍ ସିଟିରେ ୨୦୨୩ ଅପେକ୍ଷା ୨୦୨୪ରେ ବିଭିନ୍ନ ଅପରାଧ ବଢ଼ିଛି । ପୂର୍ବ ବର୍ଷ ଅପେକ୍ଷା ୨୦୨୪ରେ ହତ୍ୟାର ହାର ୧୪% ବଢ଼ିଥିବା ବେଳେ ବଳାତ୍କାର ହାର ୩% କମିଛି ବୋଲି ପୁଲିସ୍ କମିଶନର ଏସ୍. ଦେବ ଦତ୍ତସିଂହ ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି । କଟକ ଅପେକ୍ଷା ଭୁବନେଶ୍ୱର ୟୁପିଡିରେ ଅପରାଧ ବଢ଼ିଛି ବୋଲି ସେ ସ୍ୱୀକାର କରିଛନ୍ତି ।
୨୦୨୩ରେ ଟୁଇନ୍ ସିଟିରେ ୭୮ଟି ହତ୍ୟା ମାମଲା ରୁଜୁ ହୋଇଥିଲା । ୨୦୨୪ରେ ଥିଲା ୮୯ଟି ହତ୍ୟା ମାମଲା । ଅର୍ଥାତ ୧୪.୧୦% ଅଧିକ । ତେବେ ପୂର୍ବ ବର୍ଷ ଅପେକ୍ଷା ୨୦୨୪ରେ ଟୁଇନ୍ ସିଟିରେ ବଳାତ୍କାର ହାର ୩.୮୮% କମିଛି । ୨୦୨୩ରେ କଟକ-ଭୁବନେଶ୍ୱର ୟୁପିଡିରେ ୨୩୨ଟି ବଳାତ୍କାର ମାମଲା ରୁଜୁ ହୋଇଥିଲା । ୨୦୨୪ରେ ୨୨୩ଟି ମାମଲା ରୁଜୁ ହୋଇଛି । ଏଥିରୁ ୮୬ଟି ମାମଲା କଟକର ବିଭିନ୍ନ ଥାନାରେ ରୁଜୁ ହୋଇଥିବା ବେଳେ ୧୩୭ଟି ବଳାତ୍କାର ମାମଲା ଭୁବନେଶ୍ୱର ରୁଜୁ ହୋଇଥିଲା । ଟୁଇନ୍ ସିଟିରେ ଡକାୟତି ମଧ୍ୟ କମିଛି । ୨୦୨୩ରେ ମୋଟ୍ ୧୮ଟି ଡକାୟତି ମାମଲା ରୁଜୁ ହୋଇଥିଲା । ୨୦୨୪ରେ ମାତ୍ର ୧୧ଟି ମାମଲା ରୁଜୁ ହୋଇଛି । ପୂର୍ବ ବର୍ଷ ଅପେକ୍ଷା ଏହା ୩୮.୮୯% କମ । ୨୦୨୪ରେ ଭୁବନେଶ୍ୱର ୟୁପିଡିରେ ୬ଟି ଓ କଟକରେ ୫ଟି ଡକାୟତି ମାମଲା ରୁଜୁ ହୋଇଥିଲା ।
୨୦୨୩ ତୁଳନାରେ ଗତବର୍ଷ ଚୋରି ହାର କଟକରେ ୧୧.୬୫% ବଢି଼ଥିବାବେଳେ ଭୁବନେଶ୍ୱରରେ ୬.୩୮% କମିଛି । ଯାହା ଭୁବନେଶ୍ୱର କମିଶନରେଟ୍ ପୁଲିସ୍ ଇତିହାସରେ ପ୍ରଥମ । ୨୦୨୩ରେ କଟକର ବିଭିନ୍ନ ଥାନାରେ ୭୦୪ଟି ଚୋରି ମାମଲା ରୁଜୁ ହୋଇଥିଲାବେଳେ ୨୦୨୪ରେ ୭୮୬ଟି ମାମଲା ରୁଜୁ ହୋଇଥିଲା । ଭୁବନେଶ୍ୱର ୟୁପିଡିରେ ୨୦୨୩ରେ ୧୯୪୩ଟି ଚୋରି ହୋଇଥିଲା । ୨୦୨୪ରେ ୧୮୧୯ଟି ଚୋରି ହୋଇଥିବା ପୁଲିସ୍ ରିପୋର୍ଟ କରୁଛି । ତେବେ ଚୋରି କ୍ଷେତ୍ରରେ ପୁଲିସ୍ ଚାର୍ଜସିଟ୍ ଦେବା ଓ ସମ୍ପତ୍ତି ଜବତ କରିବାରେ ସମ୍ପୂର୍ଣ୍ଣ ଫେଲ୍ ମାରିଛି । ଚୋରି ହୋଇଥିବା ସମ୍ପତ୍ତି ମଧ୍ୟରୁ ମାତ୍ର ୧୫% ଜବତ କରିବାରେ ସକ୍ଷମ ହୋଇଛି । ଠକେଇ ମାମଲାରେ ୨୦୨୪ ମସିହାରେ ସର୍ବକାଳୀନ ରେକର୍ଡ କରିଛି ଭୁବନେଶ୍ୱର । ୨୦୨୩ରେ ୧୦୦୫ଟି ଠକେଇ ମାମଲା ରୁଜୁ ହୋଇଥିଲା ।
୨୦୨୪ରେ ଏହି ସଂଖ୍ୟା ୧୩୧୪ରେ ଛୁଇଁଛି । ପୂର୍ବ ବର୍ଷ ଅପେକ୍ଷା ୩୦.୭୫% ବଢ଼ିଛି । ମାତ୍ର କଟକରେ ୨୦୨୩ ଅପେକ୍ଷା ୨୦୨୪ରେ ୧୦.୯୫% ଠକେଇ ହ୍ରାସ ପାଇଛି । ୨୦୨୪ରେ କଟକରେ ୨୩ଟି ହତ୍ୟା ମାମଲା ରୁଜୁ ହୋଇଥିଲା । ୨୦୨୩ରେ ୨୬ଟି ଥିଲା । ଭୁବନେଶ୍ୱରରେ ୨୦୨୩ରେ ୫୨ଟି ଓ ୨୦୨୪ରେ ୬୬ଟି ହତ୍ୟା ମାମଲା ରୁଜୁ ହୋଇଥିଲା । ୨୦୨୩ ଅପେକ୍ଷା ୨୦୨୪ରେ ୨୬.୨୯% ହତ୍ୟା ବଢ଼ିଛି । ସିନ୍ଧିଚୋରି (ବର୍ଗୁଲାରୀ) ମଧ୍ୟ ଟୁଇନ୍ ସିଟିରେ କମ୍ ରହିଛି । ୨୦୨୩ରେ ଟୁଇନ୍ ସିଟିରେ ୬୩୮ଟି ମାମଲା ରୁଜୁ ହୋଇଥିଲା । ୨୦୨୪ରେ ୫୩୫ଟି ସିନ୍ଧିଚୋରି ହୋଇଥିବା ନେଇ ବିଭିନ୍ନ ଥାନାରେ ଅଭିଯୋଗ ହୋଇଥିଲା । ଯାହା ୧୬.୧୪% କମ୍ । ୨୦୨୪ରେ କଟକ ୟୁପିଡିରେ ୧୬୬ଟି ଓ ଭୁବନେଶ୍ୱରରେ ୩୬୯ଟି ସିନ୍ଧିଚୋର ହୋଇଥିଲା ।
ଲୁଟ୍ ମଧ୍ୟ ଟୁଇନ୍ ସିଟିରେ କମିଛି । ୨୦୨୩ରେ ୬୮୨ଟି ମାମଲା ରୁଜୁ ହୋଇଥିଲାବେଳେ ୨୦୨୪ରେ ଥିଲା ୪୭୨ଟି ମାମଲା । ଯାହା ପୂର୍ବ ବର୍ଷ ତୁଳନାରେ ୩୦.୭୯% କମ୍ । ୨୦୨୪ରେ ଭୁବନେଶ୍ୱରରେ ୩୯୨ଟି ଲୁଟ୍ ଓ କଟକର ବିଭିନ୍ନ ଥାନାରେ ୮୦ଟି ଲୁଟ୍ ମାମଲା ରୁଜୁ ହୋଇଥିଲା । କଟକ ଅପେକ୍ଷା ଭୁବନେଶ୍ୱରରେ ଦୁର୍ଘଟଣା ଦେଢ ଗୁଣ ବଢ଼ିଛି । କଟକରେ ୨୦୨୪ରେ ୪୧୩ଟି ଦୁର୍ଘଟଣା ମାମଲା ରୁଜୁ ହୋଇଥିଲାବେଳେ ଭୁବନେଶ୍ୱରରେ ୮୬୬ ଦୁର୍ଘଟଣା ମାମଲା ରୁଜୁ ହୋଇଥିଲା । ୨୦୨୩ରେ ଭୁବନେଶ୍ୱରରେ ମୋଟ ୧୧୯୭୫ଟି ମାମଲା ରୁଜୁ ହୋଇଥିଲା । ୨୦୨୪ରେ ୧୪୩୯୨ଟି ମାମଲା ରୁଜୁ ହୋଇଥିଲା । ଯାହା ୨୦.୧୮% ଅଧିକା । ତେବେ କଟକରେ ୨୦୨୩ରେ ମୋଟ ୭୪୩୫ଟି ମାମଲା ରୁଜୁ ହୋଇଥିଲାବେଳେ ୨୦୨୪ରେ ୨.୮୮ ଧ ମାମଲା କମିଥିଲା ଅର୍ଥାତ ୭୨୨୧ ଟି ମାମଲା ରୁଜୁ ହୋଇଥିଲା ।
