ନୂଆଦିଲ୍ଲୀ: ବାଂଲାଦେଶ ସେନାରେ ଦେଖାଦେଇଛି ବିଦ୍ରୋହ। ଜଣେ ବରିଷ୍ଠ ବଂଲାଦେଶୀ ସେନା ଅଧିକାରୀ ବର୍ତ୍ତମାନର ସେନାମୁଖ୍ୟଙ୍କୁ ଗାଦିରୁ ହଟାଇବା ପାଇଁ ଚେଷ୍ଚା କରୁଥିବା ବେଳେ ଧରାପଡିଛନ୍ତି। ଖବର ମୁତାବକ, ପାକିସ୍ତାନକୁ ଦୃଢ ସମର୍ଥନ କରୁଥିବା ବାଂଲାଦେଶୀ ଲିଉଟିନେଣ୍ଟ ଜେନେରାଲ ଫୈଜୁର ରେହମାନ ସେନାମୁଖ୍ୟ ୱାକର-ଉଜ-ଜମାନଙ୍କୁ ଗାଦିରୁ ହଟାଇବା ପାଇଁ ଷଡଯନ୍ତ୍ର କରୁଥିବା କଥା ସାମ୍ନାକୁ ଆସିଛି। ତେବେ ଏ କଥା ଜଣାପଡିବା ପରେ ତାଙ୍କୁ ନଜର ବନ୍ଦୀ କରି ରଖାଯାଇଛି ବୋଲି ସୂଚନା ମିଳିଛି।
ୱାକର-ଉଜ-ଜମାନଙ୍କ ବିନା ଅନୁମତିରେ ଲିଉଟିନେଣ୍ଟ ଫୈଜୁର ରେହମାନ ଏକ ବୈଠକର ଆୟୋଜନ କରିଥିଲେ। ଏହି ବୈଠକରେ ୱାକରଙ୍କ ବିରୁଦ୍ଧରେ ଆଲୋଚନା ହୋଇଥବା ନେଇ ତାଙ୍କ ସଚିବ ତାଙ୍କୁ ଅବଗତ କରାଇବା ପରେ ସେ ଫୈଜୁର ରେହମାନଙ୍କୁ ନଜର ବନ୍ଦୀରେ ରଖିଥିବା ଜଣାପଡିଛି। ଫୈଜୁରଙ୍କୁ ପାକିସ୍ତାନର ସମର୍ଥନ ଥିବା ବେଳେ ଜମାତ ପ୍ରତି ତାଙ୍କର ସମବେଦନା ରହିଛି। ତେବେ ଏନେଇ ଏକ ରିପୋର୍ଟ ଜାତୀୟ ଗଣମାଧ୍ୟମ ଇଣ୍ଡିଆ ଟୁଡେରେ ପ୍ରକାଶ ପାଇଛି।
ସୂଚନା ମୁତାବକ, ବାଂଲାଦେଶର କାର୍ଯ୍ୟକାରୀ ସେନାମୁଖ୍ୟଙ୍କ ବିରୁଦ୍ଧରେ ସମର୍ଥନ ହାସଲ ପାଇଁ ଫୈଜୁର ସମସ୍ତ ଡିଭିଜନାଲ କମାଣ୍ଡର ମାନଙ୍କୁ ନେଇ ମାର୍ଚ୍ଚ ମାସ ପ୍ରଥମ ସପ୍ତାହରେ ଏକ ବୈଠକ ଡାକିଥିଲେ। ତେବେ ତାଙ୍କୁ ଏହି ବୈଠକରେ ପୂର୍ଣ୍ଣ ସମର୍ତନ ମିଳିପାରି ନଥିଲା। ଏ ଖବର ସେନା ମୁଖ୍ୟଙ୍କ ସଚିବଙ୍କ ନିକଟରେ ପହଞ୍ଚିବା ପରେ ସେ ସମସ୍ତ ଉଚ୍ଚ ଅଧିକାରୀମାନଙ୍କୁ ଚେତାବନୀ ପଠାଇଥିଲେ। ଚେତାବନୀ ମିଳିବା ପରେ ସମସ୍ତ ଅଧିକାରୀ ଏ ମାମଲାରୁ ପଛକୁ ହଟିଯାଇଥିଲେ।
୨୦୨୫ ମସିହାର ପ୍ରଥମ ଦୁଇମାସରେ ଫୈଜୁର ରେହମାନ ଜମାତର ବିଭିନ୍ନ ମୁଖିଆ ଓ ବିଭିନ୍ନ ପାକିସ୍ତାନି କୂଟନୀତିଜ୍ଞମାନଙ୍କ ସହ ଅନେକ ବୈଠକ କରିଥିଲେ। ବାଂଲାଦେଶ ସେନାମୁଖ୍ୟଙ୍କୁ ଏ ସମ୍ପର୍କରେ ଖବର ମିଳିବା ପରେ ସେ ସତର୍କ ହେବା ସହ ତାଙ୍କ ଉପରେ ନିଜର ରଖିଥିଲେ।
ବିଗତ କିଛି ମାସ ମଧ୍ୟରେ ବଂଲାଦେଶରେ ବ୍ୟପକ ହିଂସା, ଭଙ୍ଗାରୁଜା ଓ ଦଙ୍ଗା ଦେଖିବାକୁ ମିଳିଛି। କିଚିଦ୍ନ ତଳେ ବାଂଲାଦେଶର ପୂର୍ବତନ ପ୍ରଧାନମନ୍ତ୍ରୀ ଶେଖ ହସିନାଙ୍କ ପାରିବାରିକ ସମ୍ପତ୍ତିରେ ଭଙ୍ଗାରୁଜା କରାଯିବା ସହ ନିଆଁ ଲଗାଇ ଦିଆଯାଇଥିଲା। ଏଭଳି ରାଜନୈତିକ ଅସ୍ଥିରତା ଯୋଗୁଁ ଦେଶରେ ଆଇନ ଶୃଙ୍କଳା ପରିସ୍ଥିତି ବିଗୁଡୁଛି ବୋଲି ଗତ ମାସରେ ସେନା ମୁଖ୍ୟ ୱାକର-ଉଜ-ଜମାନ କହିଥିଲେ। ଏହା ସହ ସେ ସମସ୍ତ ସେନାଧ୍ୟକ୍ଷଙ୍କୁ ଏକତା ଓ ଶାନ୍ତିର ସହ କାମ କରିବା ପାଇଁ ନିବେଦନ ମଧ୍ୟ କରିଥିଲେ।
