କଟକ,୨୭/୧୨: ପାରାଦୀପ ବନ୍ଦରରେ ଆସି ଲାଗିଥିବା ଜାହାଜ ଏମ୍ଭି ଦ’ ପାର୍ଟନକୁ ଗିରଫ ପାଇଁ ହାଇକୋର୍ଟ ନିର୍ଦ୍ଦେଶ ଦେଇଛନ୍ତି । ଶୀତ ଅବକାଶ ଲାଗି ହାଇକୋର୍ଟ ଛୁଟି ରହିଥିଲେ ମଧ୍ୟ ଘଟଣାର ଗୁରୁତ୍ୱ ଦୃଷ୍ଟିରୁ ଶୁକ୍ରବାର ଏହି ମାମଲାର ଜରୁରି ଶୁଣାଣି ହୋଇଥିଲା । ହାଇକୋର୍ଟର ବିଚାରପତି ଜଷ୍ଟିସ୍ ଏମ୍.ଏସ୍. ରମଣ ଏହି ମାମଲାର ଶୁଣାଣି କରି ଜାହାଜକୁ ୨୪ଘଣ୍ଟା ମଧ୍ୟରେ ଗିରଫ ପାଇଁ ପଦକ୍ଷେପ ନେବାକୁ ନିର୍ଦ୍ଦେଶ ଦେଇଛନ୍ତି । ଏଥିରେ ପ୍ରତିପକ୍ଷଙ୍କୁ ନୋଟିସ୍ କରାଯାଇଛି । ମାମଲାର ଶୁଣାଣି ଜାନୁଆରୀ ୫ତାରିଖ ପରକୁ ଧାର୍ଯ୍ୟ ହୋଇଛି ।
ଜଳଧି ଓଭରସିଜ୍ ପିଟିଇ ଲିମିଟେଡ୍ ପକ୍ଷରୁ ଏହି ମାମଲା ରୁଜୁ କରାଯାଇଥିଲା । ଏଥିରେ ଆବେଦନକାରୀଙ୍କ ପକ୍ଷରୁ ଜାହାଜ ଏମ୍ଭି ଦ’ ପାର୍ଟନ ଉପରେ ୧କୋଟି ୮୦ଲକ୍ଷ ଟଙ୍କା ଦାବି କରାଯାଇଥିଲା । ଏହି ଜାହାଜ ଏବେ ପାରାଦୀପ ବନ୍ଦରରେ ପହଞ୍ଚିଛି । ଯଦି ବର୍ତ୍ତମାନ ଅଦାଲତ ଏହି ଜାହାଜକୁ ଗିରଫ ପାଇଁ ଅନୁମତି ନଦିଅନ୍ତି ତାହେଲେ ଜାହାଜଟି ଅଳ୍ପଦିନ ମଧ୍ୟରେ ବନ୍ଦର ଛାଡ଼ି ଚାଲିଯିବ । ତେଣୁ ଅଦାଲତ ଏହି ମାମଲାକୁ ତ୍ୱରିତ ଭାବେ ବିଚାର କରି ଜାହାଜକୁ ଗିରଫ ପାଇଁ ନିର୍ଦ୍ଦେଶ ଦେଇଛନ୍ତି । ତେବେ ଜାହାଜରେ ଥିବା କୌଣସି ସାମଗ୍ରୀ କାଢ଼ିବାରେ କୌଣସି ପ୍ରକାର ପ୍ରତିବନ୍ଧକ ନାହିଁ ବୋଲି ହାଇକୋର୍ଟ ତାଙ୍କ ଅନ୍ତରୀଣ ଆଦେଶରେ ସ୍ପଷ୍ଟ କରିଛନ୍ତି ।
