ନୂଆଦିଲ୍ଲୀ,୨୮/୦୫: ଭାରତ ଏବଂ ଆମେରିକା ଜୁନ୍ ୨୫ ସୁଦ୍ଧା ଏକ ମଧ୍ୟବର୍ତ୍ତୀକାଳୀନ ବାଣିଜ୍ୟ ଚୁକ୍ତି ଉପରେ ସହମତ ହୋଇପାରନ୍ତି। ସୂତ୍ର ଅନୁସାରେ, ଆଲୋଚନା ସଠିକ ଦିଗରେ ଅଗ୍ରସର ହେଉଛି ଏବଂ ଆମେରିକୀୟ ଅଧିକାରୀଙ୍କ ଏକ ଦଳ ବାଣିଜ୍ୟିକ ଆଲୋଚନା ପାଇଁ ଆସନ୍ତା ମାସରେ ଭାରତ ଗସ୍ତ କରିବାର କାର୍ଯ୍ୟକ୍ରମ ରହିଛି। ଭାରତର ମୁଖ୍ୟ ଆଲୋଚନାକାରୀ ଏବଂ ବାଣିଜ୍ୟ ବିଭାଗର ସ୍ୱତନ୍ତ୍ର ସଚିବ ରାଜେଶ ଅଗ୍ରୱାଲ ଗତ ସପ୍ତାହରେ ୱାଶିଂଟନକୁ ତାଙ୍କର ଚାରି ଦିନିଆ ଗସ୍ତ ଶେଷ କରିଛନ୍ତି।
ସେ ପ୍ରସ୍ତାବିତ ଚୁକ୍ତିନାମା ଉପରେ ତାଙ୍କର ଆମେରିକୀୟ ପ୍ରତିପକ୍ଷଙ୍କ ସହ ଆଲୋଚନା କରିଛନ୍ତି। ଆମେରିକା ଦ୍ୱାରା ଭାରତ ଉପରେ ଲାଗୁ କରାଯାଇଥିବା ୨୬ ପ୍ରତିଶତ ଶୁଳ୍କ ଜୁଲାଇ ୯ ତାରିଖରେ ଶେଷ ହେବା ପୂର୍ବରୁ ଉଭୟ ପକ୍ଷ ପ୍ରସ୍ତାବିତ ଦ୍ୱିପାକ୍ଷିକ ବାଣିଜ୍ୟ ଚୁକ୍ତିନାମା ଉପରେ ଏକ ମଧ୍ୟବର୍ତ୍ତୀକାଳୀନ ସହମତିରେ ପହଞ୍ଚିବାକୁ ଚାହୁଁଛନ୍ତି। ଆମେରିକା ଏପ୍ରିଲ ୨ ରେ ଭାରତ ଉପରେ ୨୬ ପ୍ରତିଶତ ପାଲଟା ଶୁଳ୍କ ଲାଗୁ କରିଥିଲା କିନ୍ତୁ ଏହାକୁ ଜୁଲାଇ ୯ ପର୍ଯ୍ୟନ୍ତ ସ୍ଥଗିତ ରଖିଥିଲା।
ତଥାପି, ଭାରତୀୟ ସାମଗ୍ରୀଗୁଡ଼ିକ ଉପରେ ଏବେ ବି ଆମେରିକା ଦ୍ୱାରା ଲାଗୁ ହୋଇଥିବା ୧୦ ପ୍ରତିଶତ ମୌଳିକ ଶୁଳ୍କ ଲାଗୁ ହେଉଛି। ମଧ୍ୟବର୍ତ୍ତୀକାଳୀନ ବାଣିଜ୍ୟ ଚୁକ୍ତିନାମାରେ, ଭାରତ ଘରୋଇ ସାମଗ୍ରୀ ଉପରେ ୨୬ ପ୍ରତିଶତ ପ୍ରତିଶୋଧମୂଳକ ଶୁଳ୍କରୁ ସମ୍ପୂର୍ଣ୍ଣ ଛାଡ଼ ପାଇଁ ଚାପ ପକାଉଛି। ପ୍ରସ୍ତାବିତ ବିଟିଏର ପ୍ରଥମ ପର୍ଯ୍ୟାୟ ଶେଷ କରିବା ପାଇଁ ଦୁଇ ଦେଶ ଚଳିତ ବର୍ଷ ଶରତ ୠତୁ (ସେପ୍ଟେମ୍ବର-ଅକ୍ଟୋବର) ପର୍ଯ୍ୟନ୍ତ ଏକ ସମୟସୀମା ଧାର୍ଯ୍ୟ କରିଛନ୍ତି।
୨୦୨୪-୨୫ ଆର୍ଥିକ ବର୍ଷରେ କ୍ରମାଗତ ଚତୁର୍ଥ ଥର ପାଇଁ ଆମେରିକା ଭାରତର ସବୁଠାରୁ ବଡ଼ ବାଣିଜ୍ୟିକ ଅଂଶୀଦାର ହୋଇ ରହିଛି। ଉଭୟଙ୍କ ମଧ୍ୟରେ ଦ୍ୱିପାକ୍ଷିକ ବାଣିଜ୍ୟ ୧୩୧.୮୪ ବିଲିୟନ ଡଲାର ଥିଲା। ଭାରତର ମୋଟ ପଣ୍ୟଦ୍ରବ୍ୟ ରପ୍ତାନିରେ ଆମେରିକାର ଅଂଶ ପ୍ରାୟ ୧୮ ପ୍ରତିଶତ, ଆମଦାନୀରେ ୬.୨୨ ପ୍ରତିଶତ ଏବଂ ଦେଶର ମୋଟ ପଣ୍ୟଦ୍ରବ୍ୟ ବାଣିଜ୍ୟରେ ୧୦.୭୩ ପ୍ରତିଶତ ଥିଲା। ୨୦୨୪-୨୫ ରେ ସାମଗ୍ରୀ ଦୃଷ୍ଟିରୁ ଆମେରିକା ସହିତ ଭାରତର ବାଣିଜ୍ୟ ବଳକା (ଆମଦାନୀ ଏବଂ ରପ୍ତାନି ମଧ୍ୟରେ ପାର୍ଥକ୍ୟ) ୪୧.୧୮ ବିଲିୟନ ଡଲାର ଥିଲା।
୨୦୨୩-୨୪ରେ ଏହା ୩୫.୩୨ ବିଲିୟନ ଡଲାର, ୨୦୨୨-୨୩ରେ ୨୭.୭ ବିଲିୟନ ଡଲାର, ୨୦୨୧-୨୨ରେ ୩୨.୮୫ ବିଲିୟନ ଡଲାର ଏବଂ ୨୦୨୦-୨୧ରେ ୨୨.୭୩ ବିଲିୟନ ଡଲାର ଥିଲା। ଏହି ବର୍ଦ୍ଧିତ ବିତ୍ତିୟ ନିଅଣ୍ଟ ଉପରେ ଆମେରିକା ଚିନ୍ତା ପ୍ରକାଶ କରିଛି। ଉଭୟ ବାଣିଜ୍ୟିକ ଅଂଶୀଦାର ୨୦୩୦ ସୁଦ୍ଧା ଦ୍ୱିପାକ୍ଷିକ ବାଣିଜ୍ୟକୁ ଦୁଇଗୁଣରୁ ଅଧିକ କରି ୫୦୦ ବିଲିୟନ ଆମେରିକୀୟ ଡଲାର କରିବାକୁ ଲକ୍ଷ୍ୟ ରଖିଛନ୍ତି।
