ନୂଆଦିଲ୍ଲୀ,୨୫/୦୭: ପ୍ରତିବର୍ଷ ଲକ୍ଷ ଲକ୍ଷ ଭାରତୀୟ ସେମାନଙ୍କର ନାଗରିକତା ଛାଡ଼ି ଅନ୍ୟ ଦେଶରେ ବସତି ସ୍ଥାପନ କରୁଛନ୍ତି। ଏତିକି ବେଳେ କେନ୍ଦ୍ର ସରକାର ସଂସଦରେ କହିଛନ୍ତି ଯେ ୨୦୨୪ରେ ମଧ୍ୟ ଦୁଇ ଲକ୍ଷରୁ ଅଧିକ ଲୋକ ଭାରତର ନାଗରିକତା ଛାଡ଼ିଛନ୍ତି। ତଥାପି, ଏହି ସଂଖ୍ୟା ୨୦୨୩ ବର୍ଷ ତୁଳନାରେ କମ୍। ସୂଚନାଥାଉକି ରାଜ୍ୟସଭାରେ ଏକ ପ୍ରଶ୍ନର ଉତ୍ତରରେ ଏହି ସଂଖ୍ୟା ବିଷୟରେ ସୂଚନା ଦେବା ସମୟରେ ସରକାର କହିଛନ୍ତି ଯେ ଏହି ସଂଖ୍ୟାରେ ଗତ ଛଅ ବର୍ଷର ତଥ୍ୟ ଅନ୍ତର୍ଭୁକ୍ତ। ତଥ୍ୟ ଦର୍ଶାଉଛି ଯେ ଗତ କିଛି ବର୍ଷ ମଧ୍ୟରେ ଭାରତୀୟ ନାଗରିକତା ଛାଡ଼ିବା ଲୋକଙ୍କ ସଂଖ୍ୟାରେ ବୃଦ୍ଧି ଘଟିଛି।
ସୂଚନା ଦେଲେ ବୈଦେଶିକ ରାଷ୍ଟ୍ର ମନ୍ତ୍ରୀ:
ସୂଚନାଥାଉକି ବୈଦେଶିକ ବ୍ୟାପାର ରାଷ୍ଟ୍ରମନ୍ତ୍ରୀ କୀର୍ତ୍ତି ବର୍ଦ୍ଧନ ସିଂହ ରାଜ୍ୟସଭାରେ ତଥ୍ୟ ଉପସ୍ଥାପନ କରି କହିଛନ୍ତି ଯେ ୨୦୨୪ ମସିହାରେ ୨ ଲକ୍ଷ ୬ ହଜାର ଲୋକ ଭାରତୀୟ ନାଗରିକତା ଛାଡିଛନ୍ତି, ୨୦୨୩ ରେ ୨ ଲକ୍ଷ ୧୬ ହଜାର ୨୧୯ ଜଣ ଭାରତୀୟ ନାଗରିକତା ଛାଡ଼ିଛନ୍ତି। ଏହା ବ୍ୟତୀତ ୨୦୨୨ ମସିହାରେ ମୋଟ ୨ ଲକ୍ଷ ୨୫ ହଜାର ଲୋକ ଭାରତୀୟ ନାଗରିକତା ଛାଡ଼ିଛନ୍ତି।
ଏହା ବ୍ୟତୀତ ୨୦୨୧ ରେ ୧ ଲକ୍ଷ ୬୩ ହଜାରରୁ ଅଧିକ ଲୋକ ଭାରତୀୟ ନାଗରିକତା ଛାଡ଼ିଛନ୍ତି। ୨୦୨୦ରେ ୮୫ ହଜାର ଲୋକ ନାଗରିକତା ଛାଡ଼ିଛନ୍ତି ଏବଂ ୨୦୧୯ ରେ ମୋଟ ୧ ଲକ୍ଷ ୪୪ ହଜାର ଲୋକ ଭାରତୀୟ ନାଗରିକତା ଛାଡ଼ିଛନ୍ତି। ରାଜ୍ୟସଭାରେ ଉପସ୍ଥାପିତ ତଥ୍ୟରେ କୁହାଯାଇଛି ଯେ ୨୦୨୩ ତୁଳନାରେ ୨୦୨୪ ମସିହାରେ ସାମାନ୍ୟ ହ୍ରାସ ଘଟିଛି। ସେହିପରି ଗତ ତିନି ବର୍ଷ ମଧ୍ୟରେ ଏହି ସଂଖ୍ୟା ଦୁଇ ଲକ୍ଷ ଉପରେ ରହିଛି।
