ନୂଆଦିଲ୍ଲୀ,୦୨/୦୬: ଭାରତୀୟ ନୌସେନାକୁ ଆହୁରି ବଳ ମିଳିଛି । ଆଧୁନିକ ଷ୍ଟିଲ୍ଥ ଯୁଦ୍ଧପୋତ ଆଇଏନ୍ଏସ୍ ଉଦୟଗିରି ଓ ତମାଲ ମଙ୍ଗଳବାର ନୌସେନାରେ ସାମିଲ ହୋଇଛି । ମୁମ୍ବାଇର ମାଜଗାଓଁ ଡକୟାର୍ଡରେ ଆଇଏନ୍ଏସ୍ ଉଦୟଗିରିକୁ ବିଧିବଦ୍ଧ ଭାବେ ନୌସେନାରେ ସାମିଲ କରାଯାଇଥିଲା ବେଳେ ଆଇଏନ୍ଏସ୍ ତମାଲକୁ ରୁଷର କାଲିନିନଗାର୍ଡରେ ନୌସେନାକୁ ହସ୍ତାନ୍ତର କରାଯାଇଛି ।
ଆଇଏନ୍ଏସ୍ ଉଦୟଗିରି ହେଉଛି ପ୍ରୋଜେକ୍ଟ ୧୭-ଏ ଅନ୍ତର୍ଗତ ଦ୍ୱିତୀୟ ଷ୍ଟିଲ୍ଥ ଯୁଦ୍ଧ ଜାହାଜ । ଦୀର୍ଘ ୩୦ ବର୍ଷ ଧରି ନୌସେନାରେ କାର୍ଯ୍ୟ କରିବା ପରେ ୨୦୦୭ରେ ଉଦୟଗିରି ଯୁଦ୍ଧପୋତକୁ ସେବାନିବୃତ୍ତ କରାଯାଇଥିଲା । ତେବେ ସେହି ନାମରେ ଏକ ନୂଆ ଯୁଦ୍ଧପୋତ ନିର୍ମାଣ ଆରମ୍ଭ ହୋଇଥିଲା । ମାତ୍ର ୩୭ ମାସ ଭିତରେ ଆଇଏନ୍ଏସ୍ ଉଦୟଗିରିର ନିର୍ମାଣ ଶେଷ ହୋଇ ନୌସେନାକୁ ହସ୍ତାନ୍ତର କରାଯାଇଛି । ଏଥିରେ ୮୦ ପ୍ରତିଶତରୁ ଅଧିକ ସ୍ୱଦେଶୀ ଜ୍ଞାନକୌଶଳ ଓ ଉପକରଣ ବ୍ୟବହାର କରାଯାଇଛି । ଏଥିରେ ଜାହାଜ ବିଧ୍ୱଂସୀ ସୁପରସୋନିକ ମିସାଇଲ, ମଧ୍ୟମ ଦୂରଗାମୀ ଭୂପୃଷ୍ଠରୁ ଆକାଶ ମାର୍ଗକୁ ନିକ୍ଷେପ କରାଯାଇପାରୁଥିବା ମିସାଇଲ ସିଷ୍ଟମ, ୭୬ ମି.ମି. ଗନ୍, ମଲ୍ଟିପୁଲ କ୍ଲୋଜ୍-ଇନ ୱିପନ ସିଷ୍ଟମ ଆଦି ମୁତୟନ କରାଯିବ । ଯାହାଫଳରେ ଉଭୟ ଜଳ ଓ ସ୍ଥଳ ପକ୍ଷରେ ଶତ୍ରୁର ମୁକାବିଲା କରାଯାଇପାରିବ ।
ରୁଷ ଠାରୁ ମିଳିଥିବା ଅଷ୍ଟମ ତଥା ତୁସିଲ ଶ୍ରେଣୀର ଦ୍ୱିତୀୟ ଯୁଦ୍ଧପୋତ ହେଉଛି ଆଇଏନ୍ଏସ୍ ତମାଲ । ୨୦୧୬ରେ ଭାରତ ଓ ରୁଷ ମଧ୍ୟରେ ହୋଇଥିବା ପ୍ରତିରକ୍ଷା ବୁଝାମଣାର ଏହା ଅଂଶବିଶେଷ । ଏହି ବୁଝାମଣା ଅନୁସାରେ ରୁଷରେ ୪ଟି ତଲୱାର ଶ୍ରେଣୀର ଷ୍ଟିଲଥ ଯୁଦ୍ଧପୋତ ନିର୍ମାଣ କରାଯାଉଛି । ସେଥିରୁ ୨ଟି ରୁଷର ୟନ୍ତର ଓ ଅନ୍ୟ ୨ଟି ଗୋଆର ସିପୟାର୍ଡରେ ନିର୍ମିତ ହେଉଛି । ଭାରତୀୟ ବିଶେଷଜ୍ଞଙ୍କ ତଦାରଖରେ ରୁଷର ୟନ୍ତର ସିପୟାର୍ଡରେ ଆଇଏନ୍ଏସ୍ ତମାଲ ନିର୍ମାଣ କରାଯାଇଛି । ଏଥିରେ ୨୬ ପ୍ରତିଶତ ସ୍ୱଦେଶୀ ଜ୍ଞାନକୌଶଳ ଉପଯୋଗ ହୋଇଛି । ଏହି ଯୁଦ୍ଧପୋତ ଘଣ୍ଟା ପ୍ରତି ୫୫ କି.ମି. ବେଗରେ ଗତି କରିପାରିବ । ସମୁଦ୍ର ଭିତରେ ଓ ଆକାଶ ମାର୍ଗରେ ଏହା ଲକ୍ଷ୍ୟଭେଦ କରିପାରିବ । ଏଥିରେ ବ୍ରହ୍ମୋସ ମିସାଇଲ ନିୟୋଜିତ କରାଯାଇଛି ଏବଂ ଏହା ରାଡାର ନଜରକୁ ଏଡାଇପାରିବ । ନୌସେନାର ପଶ୍ଚିମ ଫ୍ଲିଟ୍ରେ ଏହାକୁ ସାମିଲ କରାଯିବ । ଯାହା ପାକିସ୍ତାନ ଉପରେ କଡା ନଜର ରଖିବ । ପୁରାଣ ବର୍ଣ୍ଣିତ ଇନ୍ଦ୍ରଙ୍କ ଅସ୍ତ୍ର ତମାଲର ନାମ ଅନୁସାରେ ଏହି ଯୁଦ୍ଧପୋତର ନାମକରଣ ହୋଇଛି ।
