ଭୁବନେଶ୍ୱର,୧୧/୦୯: ଜଗତ୍ଜନନୀ ମା’ ଦୁର୍ଗାଙ୍କ ପ୍ରତିମୂର୍ତ୍ତି ପାଇଁ ପବିତ୍ର ଗଙ୍ଗାକୂଳରୁ ଆସିଛି ମାଟି । ଏ ପରମ୍ପରା ଆଜିର ନୁହେଁ, ୨୫ବର୍ଷ ଧରି ଚାଲିଛି । ପଶ୍ଚିମବଙ୍ଗର ମୂର୍ତ୍ତି କାରିଗରମାନେ ବସ୍ରେ ମାଟି ଆଣି ଦେବୀଙ୍କ ସୁଉଚ୍ଚ ମୂର୍ତ୍ତି ଗଢିଥାନ୍ତି । ସେଥିପାଇଁ ଏଠାକାର ମୂର୍ତ୍ତି ସ୍ୱତନ୍ତ୍ର । ନୂଆପଲ୍ଲୀ ଦୁର୍ଗା ମଣ୍ଡପରେ ଏଭଳି ଦୃଶ୍ୟ ଦେଖିବାକୁ ମିଳିଛି ।
ଚଳିତବର୍ଷ ନୂଆପଲ୍ଲୀର ପ୍ରସିଦ୍ଧ ଦୁର୍ଗାପୂଜା ୩୮ବର୍ଷରେ ପଦାର୍ପଣ କରିଛି । ଏଥରକ ନୂଆପଲ୍ଲୀ ଦୁର୍ଗାପୂଜା ସମିତି ରାଜଧାନୀବାସୀଙ୍କ ପାଇଁ କେରଳର ଶସ୍ତ୍ରୀୟ ନୃତ୍ୟ କୁଚିପୁଡ଼ିର ଝଲକ ଥିବା ଏକ ବିଶାଳ ତୋରଣ ନିର୍ମାଣ କରୁଛି । ଦକ୍ଷିଣ ଭାରତର ଏହି ଲୋକପ୍ରିୟ ନୃତ୍ୟ କେବଳ ଭାରତ ନୁହେଁ ସାରା ବିଶ୍ୱରେ ପ୍ରସିଦ୍ଧି ଲାଭ କରିଛି । ତେଣୁ କୁଚିପୁଡ଼ି ଶୈଳୀ ତୋରଣ ଭକ୍ତଙ୍କ ଆକର୍ଷଣ ପାଲଟିବ ବୋଲି ସମିତି ଆଶା ରଖିଛି ।
ମଣ୍ଡପରେ ଶୋଭାପାଇବେ ୧୬ଫୁଟ ଉଚ୍ଚତାର ଦେବୀ ଜଗତ୍ଜନନୀଙ୍କ ପ୍ରତିମୂର୍ତ୍ତି । ସେହିପରି ୭୫ଫୁଟ ଉଚ୍ଚତା ଓ ୧୨୦ ଫୁଟ ଚଉଡ଼ାର ତୋରଣ ଓ ୨୨ଫୁଟ ଉଚ୍ଚତାର ଜରି ମେଢ଼ ମଧ୍ୟ ଶୋଭାପାଇବ । ରାଜ୍ୟ ବାହାରୁ ମୋଟ୍ ୪୦ଜଣ କାରିଗର ଆସି ବର୍ତ୍ତମାନ ତୋରଣ ନିର୍ମାଣରେ ଲାଗିପଡ଼ିଛନ୍ତି । ପୂଜା ପୂର୍ବରୁ ଏସବୁ କାମ ସରିବ ବୋଲି ସମିତି ପକ୍ଷରୁ ନିଷ୍ପତ୍ତି ନିଆଯାଇଛି ।
ମଣ୍ଡପକୁ ସୁସଜ୍ଜିତ ଓ ଆକର୍ଷଣ କରିବା ପାଇଁ ୧୦ଟି ବଡ଼ ରଙ୍ଗାରଙ୍ଗ ଲାଇଟ୍ ଗେଟ୍ ସହ ରାସ୍ତା ପାଶ୍ୱର୍ରେ ଭଳିକିଭଳି ଡିଜାଇନର ଲାଇଟ୍ ଖଞ୍ଜାଯିବ । ଆଇଡି ମାର୍କେଟରୁ ଜୟଦେବ ବିହାର ରୋଡ୍ ଏବଂ ଆରପଟ କଳିଙ୍ଗ ଷ୍ଟାଡିୟମ ରାସ୍ତାରୁ ନୂଆପଲ୍ଲୀ ପର୍ଯ୍ୟନ୍ତ ରାସ୍ତାରେ ମଧ୍ୟ ଆଲୋକ ଝଲସିବ । ପୂଜାକୁ ଆହୁରି ଆକର୍ଷଣୀୟ କରିବା ପାଇଁ ମୀନା ବଜାରର ପସରା ଖୋଲିବ । ମୀନା ବଜାରରେ ୧୨୦ଟି ଷ୍ଟଲ ରହିବା ସହ ରାଜ୍ୟର ହସ୍ତତନ୍ତରକୁ ସମୃଦ୍ଧ କରିବା ପାଇଁ ନାବାର୍ଡର ୯ଟି ଷ୍ଟଲ ରହିବ । ଷଷ୍ଠୀରୁ ବିଜୟା ଦଶମୀ ପର୍ଯ୍ୟନ୍ତ ମେଲୋଡି, ଭଜନ ସଂଧ୍ୟା, ରେକର୍ଡ ଡ୍ୟାନ୍ସ ଆଦି ଶ୍ରଦ୍ଧାଳୁଙ୍କୁ ମନୋରଞ୍ଜନର ଖୋରାକ ଯୋଗାଇବ ବୋଲି ସମିତି ପକ୍ଷରୁ ସୂଚନା ମିଳିଛି ।
ମହିଳାଙ୍କ ହାତରେ ସୁରକ୍ଷା ଭାର
ପୂଜା ଏଥରକ ଭବ୍ୟ ଭାବେ ଆୟୋଜନ କରୁଛୁ । ଆମର ବିଶେଷତ୍ୱ ହେଲା ଆମ ପୂଜାରେ ସୁରକ୍ଷା ଦାୟିତ୍ୱ ନିଅନ୍ତି ସ୍ୱୟଂ ସହାୟକ ଗୋଷ୍ଠୀର ମହିଳା । ଏଥିସହ ୨୦୦ରୁ ଅଧିକ ସ୍ୱେଚ୍ଛାସେବୀ, ପୁଲିସ ମିତ୍ର ମଧ୍ୟ ସୁରକ୍ଷା ଦେବେ । ମଣ୍ଡପରେ ୭୦ଟି ସିସିଟିଭି ଲାଗିବ । ପୂଜାକୁ ଯେପରି ଶୃଙ୍ଖଳିତ କରିବୁ ସେ ଉପରେ ଧ୍ୟାନ ଦେଇଛୁ । ଭକ୍ତଙ୍କ ପାଇଁ ପ୍ରସାଦସେବନ, ସାଂସ୍କୃତିକ କାର୍ଯ୍ୟକ୍ରମର ଆୟୋଜନ ହେବ । ଭସାଣୀରେ ଆମେ ପାରମ୍ପରିକ ବାଦ୍ୟକୁ ଗୁରୁତ୍ୱ ଦେଇଛୁ ।
