ନୂଆଦିଲ୍ଲୀ, ୨୦।୪: ଦେଶର ସବୁଠାରୁ ବଡ଼ ମେଡିକାଲ୍ ପ୍ରବେଶିକା ପରୀକ୍ଷା NEET UG ୨୦୨୬କୁ ନେଇ ଏବେ ସାରା ଦେଶରେ ଚର୍ଚ୍ଚା ଜୋର ଧରିଛି । ତେବେ ପରୀକ୍ଷା ପୂର୍ବରୁ ସୋସିଆଲ୍ ମିଡିଆରେ "ପେପର୍ ଲିକ୍" କୁ ନେଇ କିଛି ଭ୍ରମାତ୍ମକ ଖବର ପ୍ରଚାରିତ ହେଉଥିବାରୁ ଛାତ୍ରଛାତ୍ରୀ ଏବଂ ଅଭିଭାବକମାନେ ଚିନ୍ତାରେ ପଡ଼ିଯାଇଛନ୍ତି । ଏହି ପରିପ୍ରେକ୍ଷୀରେ ନ୍ୟାସନାଲ୍ ଟେଷ୍ଟିଂ ଏଜେନ୍ସି (NTA) ପକ୍ଷରୁ ଏକ କଡ଼ା ଚେତାବନୀ ଜାରି କରାଯାଇଛି । ଗତ କିଛି ଦିନ ହେବ ଟେଲିଗ୍ରାମ୍ ଏବଂ ହ୍ୱାଟ୍ସଆପ୍ ଭଳି ପ୍ଲାଟଫର୍ମରେ କିଛି ଅସାମାଜିକ ବ୍ୟକ୍ତି NEET UG ୨୦୨୬ର ପ୍ରଶ୍ନପତ୍ର ଲିକ୍ ହୋଇଥିବା ଦାବି କରୁଛନ୍ତି । ଖାଲି ସେତିକି ନୁହେଁ, ପରୀକ୍ଷା ପୂର୍ବରୁ ପ୍ରଶ୍ନପତ୍ର ଯୋଗାଇଦେବା ନାଁରେ ଛାତ୍ରଛାତ୍ରୀଙ୍କଠାରୁ ୧୦,୦୦୦ ଟଙ୍କା ପର୍ଯ୍ୟନ୍ତ ଦାବି କରାଯାଉଥିବା ଅଭିଯୋଗ ହୋଇଛି । ଏହି ଖବର ପରୀକ୍ଷାର୍ଥୀଙ୍କ ମଧ୍ୟରେ ଭୟ ଏବଂ ଦ୍ୱନ୍ଦ୍ୱ ସୃଷ୍ଟି କରିଛି ।
NTAର ସ୍ପଷ୍ଟୀକରଣ ଓ ଚେତାବନୀ:
ଏହି ଘଟଣାକୁ ଗୁରୁତ୍ୱର ସହ ନେଇ NTA ସ୍ପଷ୍ଟ କରିଛି ଯେ:
• ସମସ୍ତ ଦାବି ସମ୍ପୂର୍ଣ୍ଣ ମିଥ୍ୟା: ସୋସିଆଲ୍ ମିଡିଆରେ ଘୁରି ବୁଲୁଥିବା ପେପର୍ ଲିକ୍ ଖବରର କୌଣସି ଆଧାର ନାହିଁ ।
• ଆଇନଗତ କାର୍ଯ୍ୟାନୁଷ୍ଠାନ: ଏଭଳି ଗୁଜବ ସୃଷ୍ଟି କରୁଥିବା ବ୍ୟକ୍ତି ଏବଂ ଗ୍ରୁପ୍ ବିରୋଧରେ କଠୋର ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉଛି ।
• ଅଫିସିଆଲ୍ ୱେବସାଇଟ୍ ଉପରେ ଭରସା: ପରୀକ୍ଷା ସମ୍ପର୍କିତ ସମସ୍ତ ସୂଚନା କେବଳ NTAର ଅଧିକାରୀକ ୱେବସାଇଟ୍ neet.nta.nic.in ରୁ ହିଁ ଦେଖନ୍ତୁ ।
ପରୀକ୍ଷା ସୂଚନା ଓ ପୁରୁଣା ବିବାଦ:
ସୂଚନାଯୋଗ୍ୟ, ଆସନ୍ତା ୩ ମେ, ୨୦୨୬ରେ NEET UG ପରୀକ୍ଷା ଅନୁଷ୍ଠିତ ହେବାକୁ ଯାଉଛି । ଏ ପର୍ଯ୍ୟନ୍ତ ଆଡମିଟ୍ କାର୍ଡ ଜାରି ହୋଇନଥିବା ବେଳେ ଏଭଳି ଗୁଜବ ପରୀକ୍ଷା ପ୍ରକ୍ରିୟାକୁ ବ୍ୟାହତ କରିବାକୁ ଚେଷ୍ଟା ବୋଲି କୁହାଯାଉଛି । ୨୦୨୪ ମସିହାରେ ପେପର୍ ଲିକ୍ ବିବାଦ ପରେ ସୁପ୍ରିମକୋର୍ଟଙ୍କ ହସ୍ତକ୍ଷେପ ଏବଂ କଠୋର ନିୟମ ଯୋଗୁଁ ଚଳିତ ବର୍ଷ NTA ସୁରକ୍ଷା ବ୍ୟବସ୍ଥାକୁ ଅଧିକ କଡ଼ାକଡ଼ି କରିଛି ।
ଛାତ୍ରଛାତ୍ରୀଙ୍କ ପାଇଁ ପରାମର୍ଶ:
ଯଦି କେହି ଆପଣଙ୍କୁ ଟଙ୍କା ବଦଳରେ ପେପର୍ ଦେବାକୁ ପ୍ରତିଶ୍ରୁତି ଦେଉଛନ୍ତି, ତେବେ ତୁରନ୍ତ ସତର୍କ ହୋଇଯାଆନ୍ତୁ । ଏହା ଏକ ବଡ଼ ଧରଣର ସାଇବର ଠକେଇ ହୋଇପାରେ । ନିଜର ପାଠପଢ଼ା ଉପରେ ଧ୍ୟାନ ଦିଅନ୍ତୁ ଏବଂ କୌଣସି ଅଜଣା ବ୍ୟକ୍ତିଙ୍କୁ ଟଙ୍କା ଦିଅନ୍ତୁ ନାହିଁ ।
କିପରି ସତର୍କ ରହିବେ?
1. ଟେଲିଗ୍ରାମ୍ କିମ୍ୱା ହ୍ୱାଟ୍ସଆପ୍ର କୌଣସି "ସିକ୍ରେଟ୍ ଗ୍ରୁପ୍" ରେ ଯୋଗ ଦିଅନ୍ତୁ ନାହିଁ ।
2. କୌଣସି ବ୍ୟକ୍ତିଗତ ତଥ୍ୟ ବା ବ୍ୟାଙ୍କ ସୂଚନା ସେୟାର କରନ୍ତୁ ନାହିଁ ।
3. ସନ୍ଦେହଜନକ ଗୁଜବ ଦେଖିଲେ NTAର ହେଲ୍ପଲାଇନ୍ ନମ୍ବରରେ ସୂଚନା ଦିଅନ୍ତୁ ।
ଏହା ବି ପଢ଼ନ୍ତୁ... ଭାରତ-ରୁଷ ପ୍ରତିରକ୍ଷା ବୁଝାମଣା ଲାଗୁ, ଏଣିକି ଉଭୟେ ପରସ୍ପର ଦେଶରେ ମୁତୟନ କରିବେ ୩ ହଜାର ସୈନ୍ୟ
