ନୂଆଦିଲ୍ଲୀ,୨୯।୧୦: ଚୀନ୍ ଯାତ୍ରାରେ ଯିବେ ନେପାଳ ପ୍ରଧାନମନ୍ତ୍ରୀ କେପି ସିଂ ଓଲି। ନେପାଳ ପ୍ରଧାନମନ୍ତ୍ରୀ କାର୍ଯ୍ୟାଳୟର ଏକ ଉଚ୍ଚସ୍ତରୀୟ ସୁତ୍ରରୁ ଏହି ସୂଚନା ମିଳିଛି। ’ମାଇ ରିପବ୍ଲିକା’ ଖବରକାଗଜରେ ମଧ୍ୟ ଏହି ଖବର ପ୍ରକାଶ ପାଇଛି। କୁହାଯାଉଛି ଯେ, ନେପାଳର ବୈଦେଶିକ ମନ୍ତ୍ରଣାଳୟ ପ୍ରଧାନମନ୍ତ୍ରୀ ଓଲିଙ୍କ ଚୀନ୍ ଯାତ୍ରାର ପ୍ରସ୍ତୁତି କରୁଛି। ସରକାରଙ୍କ ନୂତନ କାର୍ଯ୍ୟକାଳର ୧୦୦ ଦିନ ପୂରଣ ହେବା ପୂର୍ବରୁ ଚୀନ୍ ଯାତ୍ରା ପ୍ରସ୍ତାବିତ କରାଯାଇଛି।ଚୀନ୍ ଯାତ୍ରାରେ ଓଲି ଯିବେ ବୋଲି ଯଦିଓ ନେପାଳ ବୈଦେଶିକ ମନ୍ତ୍ରଣାଳୟ ସ୍ପଷ୍ଟ କରିନି, ତେବେ ମନ୍ତ୍ରଣାଳୟର ଉଚ୍ଚସ୍ତରୀୟ ସୁତ୍ରରୁ ସୂଚନା ମିଳିଛି। କେପି ଓଲି ପ୍ରଧାନମନ୍ତ୍ରୀ ପଦଗ୍ରହଣ କରିବା ପରେ ତାଙ୍କୁ ଏପର୍ଯ୍ୟନ୍ତ ଭାରତ କିମ୍ବା ଚୀନ୍ ପକ୍ଷରୁ ଗସ୍ତ ପାଇଁ ନିମନ୍ତ୍ରଣ କରାଯାଇ ନାହିଁ। ତେବେ ପ୍ରଧାନମନ୍ତ୍ରୀ ଓଲି ପ୍ରସ୍ତାବିତ ଚୀନ୍ ଯାତ୍ରା ପଦଭାର ଗ୍ରହଣ କରିବା ପରେ ପଡୋଶୀ ଦେଶର ପ୍ରଥମ ଯାତ୍ରା ହେବ।
କେପି ଓଲି ଗତ ମାସ ଜାତିସଂଘର ମହାସଭା ବେଳେ ନ୍ୟୁୟର୍କରେ ପ୍ରଧାନମନ୍ତ୍ରୀ ମୋଦିଙ୍କୁ ଭେଟିଥିଲେ। ଏହି ସମୟରେ ମୋଦିଙ୍କୁ ଓଲି ନେପାଳ ଯିବାକୁ ନିମନ୍ତ୍ରଣ କରିଥିଲେ। ‘ମାଇଁ ରିପବ୍ଲିକା’ ସୂଚନା ଅନୁସାରେ, ନମ୍ବେରରେ ଓଲି ଚୀନ୍ ଗସ୍ତରେ ଯାଇପାରନ୍ତି। ତେବେ ଏପର୍ଯ୍ୟନ୍ତ କୌଣସି ତାରିଖ ଧାର୍ଯ୍ୟ କରାଯାଇ ନାହିଁ। ତେବେ ଓଲିଙ୍କ ଚୀନ୍ ଯାତ୍ରାକୁ ସଫଳ କରିବାକୁ ପ୍ରସ୍ତୁତି କରାଯାଉଛି। ଓଲିଙ୍କ ଚୀନ୍ ଯାତ୍ରା ଗୁରୁତ୍ବପୂର୍ଣ୍ଣ ରହିପାରେ। କାରଣ ନେପାଳ ଓ ଚୀନ୍ ବେଲ୍ଟ ଆଣ୍ଡ ରୋଡ୍ ପ୍ରୋଜେକ୍ଟ ସଫଳ କାର୍ଯ୍ୟ ପାଇଁ ଏକ ଚୁକ୍ତି ସାକ୍ଷର କରିପାରନ୍ତି। ୨୦୧୭ ରେ ନେପାଳ ଓ ଚୀନ୍ ଭିତରେ ଚୁକ୍ତି ହେବା ପରେ ଏହାର କାର୍ଯ୍ୟ ଆଗକୁ ବଢିପାରିନି।
