ଗାଜା,୨୧/୧୧: ଇସ୍ରାଏଲ-ହମାସ୍ ଯୁଦ୍ଧ ଭିତରେ ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ୍ ନେତନ୍ୟାହୁ ମଙ୍ଗଳବାର ପ୍ରଥମ ଥର ଅଚାନକ ଗାଜା ଗସ୍ତ କରିଛନ୍ତି । ସେଠାରେ ସେ ଇସ୍ରାଏଲ ସୈନ୍ୟ ଆଡ୍ଡା ପରିଦର୍ଶନ କରିଥିଲେ । ସାଙ୍ଗରେ ପ୍ରତିରକ୍ଷା ମନ୍ତ୍ରୀ ଇସ୍ରାଏଲ କାଟ୍ଜ ମଧ୍ୟ ଯାଇଥିଲେ । ଏହି ଅବସରରେ ସେ ଇସ୍ରାଏଲ ବନ୍ଧକଙ୍କୁ ହମାସ୍ କବଳରୁ ମୁକୁଳାଇବାରେ ସହାୟତା ପାଇଁ ସମ୍ପୃକ୍ତ ବ୍ୟକ୍ତିଙ୍କୁ ୫ ନିୟୁତ ଡଲାର ବା ପ୍ରାୟ ୪୨ କୋଟି ଟଙ୍କା ପୁରସ୍କାର ରାଶି ଦିଆଯିବ ବୋଲି ଘୋଷଣା କରିଛନ୍ତି । ଏଥିସହ ସୂଚନା ଦେଇଥିବା ବ୍ୟକ୍ତିଙ୍କୁ ଯୁଦ୍ଧ ପ୍ରଭାବିତ ପାଲେଷ୍ଟାଇନରୁ ସୁରକ୍ଷିତ ଭାବେ ବାହାର କରାଯିବ ବୋଲି ନେତନ୍ୟାହୁ ଅଫର ଦେଇଛନ୍ତି । ହମାସ୍ ସହ କୌଣସି ପ୍ରକାର ଯୁଦ୍ଧବିରତିକୁ ସ୍ପଷ୍ଟ ଭାବେ ନେତନ୍ୟାହୁ ମନା କରିଦେଇଛନ୍ତି । ଯୁଦ୍ଧ ଶେଷ ହେବା ପରେ ହମାସ୍ ଆଉ କେବେ ପାଲେଷ୍ଟାଇନ ଉପରେ ଶାସନ କରିପାରିବନି ବୋଲି ସେ କହିଛନ୍ତି ।
ନେତନ୍ୟାହୁ କହିଛନ୍ତି, ଆଉ ହମାସ୍ର ପ୍ରତ୍ୟାବର୍ତ୍ତନ ହୋଇପାରିବନି । ଗାଜାରେ ବନ୍ଧକ ଥିବା ୧୦୧ ଇସ୍ରାଏଲ ନାଗରିକଙ୍କ ସନ୍ଧାନ ଜାରି ରହିବ । ଆମ ନାଗରିକଙ୍କୁ ଯିଏ ବି କ୍ଷତି ପହଞ୍ଚାଇବାକୁ ଚେଷ୍ଟା କରିବ ସେ ନିଜ ମୃତ୍ୟୁ ପାଇଁ ନିଜେ ଦାୟୀ ରହିବ । ଇସ୍ରାଏଲ ନାଗରିକଙ୍କୁ ଆମେ ଖୋଜି ବାହାର କରିବୁ । ଗାଜାରେ ନେତନ୍ୟାହୁ ସୈନ୍ୟଙ୍କ ଜ୍ୟାକେଟ, ହେଲ୍ମେଟ ପିନ୍ଧିଥିବା ଦେଖାଯାଇଛି । ବ୍ରାଜିଲରେ ଜି-୨୦ ଶିଖର ସମ୍ମିଳନୀ ଚାଲିଥିବାବେଳେ ନେତନ୍ୟାହୁ ଏହି ଗସ୍ତ କରିଛନ୍ତି । ସମ୍ମିଳନୀରେ ଗାଜାରେ ଯୁଦ୍ଧ ବନ୍ଦ କରାଇବା, ଗାଜାକୁ ଅଧିକ ମାନବୀୟ ସହାୟତା ପ୍ରଦାନ ଆଦି ଲାଗି ସଦସ୍ୟ ରାଷ୍ଟ୍ରଗୁଡ଼ିକ ଅପିଲ କରିଛନ୍ତି । ୧୩ ମାସ ଧରି ଗାଜାରେ ଚାଲିଥିବା ଯୁଦ୍ଧରେ ଗାଜାର ପ୍ରାୟ ୯୦ ପ୍ରତିଶତ ସମ୍ପୂର୍ଣ୍ଣ ଧ୍ୱଂସ ହୋଇସାରିଛି । ୪୪ ହଜାରରୁ ଊଦ୍ଧ୍ୱର୍ ନାଗରିକଙ୍କ ମୃତ୍ୟୁ ଘଟିଲାଣି।
