ଭୁବନେଶ୍ୱର,୦୫/୧୦: କଟକ ରେଳ ଷ୍ଟେସନ ନବୀକରଣ କାମ ଶେଷ ପର୍ଯ୍ୟାୟରେ ପହଞ୍ଚିଲାଣି । ଡିସେମ୍ବର ସୁଦ୍ଧା ଏହାର ଉଦ୍ଘାଟନ କରାଯିବ । ଷ୍ଟେସନର ବଡ଼ ଷ୍ଟ୍ରକ୍ଚର ଆସନ୍ତା ବର୍ଷ ସୁଦ୍ଧା ସରିବ । ସାଂସଦ ଭର୍ତ୍ତୃହରି ମହତାବ ଏହି ସୂଚନା ଦେଇଛନ୍ତି ।
ଶୁକ୍ରବାର ପୂର୍ବତଟ ରେଳପଥ ମୁଖ୍ୟାଳୟରେ ଖୋର୍ଦ୍ଧା ରୋଡ୍ ରେଳ ମଣ୍ଡଳ ସାଂସଦ କମିଟି ବୈଠକ ପରେ ଶ୍ରୀ ମହତାବ କହିଲେ ଯେ ବୈଠକରେ କଟକର ଶିଖରପୁରରେ କୋଚ୍ ସଫେଇ ଓ ମରାମତି ଡିପୋ କରିବାକୁ ପ୍ରସ୍ତାବ ଦେଇଛି । ସେହିପରି ଆଗାମୀ ଦିନରେ ତୃତୀୟ ରେଳ ଲାଇନ ବାରଙ୍ଗରୁ କପିଳାସ ରୋଡ୍(ଟାଙ୍ଗି) ଭାୟା କଟକ ଦେଇ ହେବ । ଯାହା ଅନୁମୋଦନ ହୋଇସାରିଛି । ନିର୍ଗୁଣ୍ଡିରୁ ବାରଙ୍ଗ ୨୨ କିଲୋମିଟର ରେଳପଥରେ ୪ଟି ବଡ଼ ପୋଲର ଟେଣ୍ଡର ଆହ୍ୱାନ ହୋଇଛି । ଯାହା ବିରୂପା, ମହାନଦୀ, କାଠଯୋଡ଼ି ଓ କୁଆଖାଇ ଉପରେ ନିର୍ମାଣ କରାଯିବ । ରେଳମନ୍ତ୍ରୀଙ୍କୁ ଅନୁରୋଧ ପରେ ଗତ ଅଗଷ୍ଟ ୧୯ ତାରିଖରେ ଟେଣ୍ଡର ହୋଇଛି । କ୍ଷେତ୍ରୀୟ ଯାଞ୍ଚ ସରିଛି, ଶୀଘ୍ର କାମ ଆରମ୍ଭ ହେବ । ସେହିପରି ଖୋର୍ଦ୍ଧା ରୋଡରୁ ବିଜୟନଗରମ ୩୬୩ କିମି ତୃତୀୟ ରେଳ ଲାଇନ ମଧ୍ୟ ଅନୁମୋଦନ ସରିଛି ।
କଟକର ୩ଟି ରୋଡ୍ ଓଭର ବ୍ରିଜ୍ ହେବ । ସେଥିମଧ୍ୟରୁ ଗୋଟିଏ ଘଣ୍ଟିଖାଲ୍ ନରାଜ-ରାଜ ଆଠଗଡ଼ ଲାଇନରେ ଘଣ୍ଟିଖାଲ ନିକଟରେ ହେବ । ଯାହାର ଯୁଗ୍ମ ବିସ୍ତୃତ ଆକଳନ ରେଳ ବୋର୍ଡ ନିକଟରେ ଦାଖଲ ସରିଛି । କଟକ ସହରର ନୂଆବଜାର ରୋଡ୍ ଓଭରବ୍ରିଜ୍ ଡିସେମ୍ବର ସୁଦ୍ଧା ସରିବ । ଜଗତ୍ସିଂହପୁର ଯିବା ରାସ୍ତାରେ କନ୍ଦରପୁର ନିକଟରେ ରୋଡ୍ ଓଭରବ୍ରିଜ୍ ଜାଜୀୟ ରାଜପଥ ପ୍ରାଧିକରଣ କର୍ତ୍ତୃପକ୍ଷ(ଏନଏଚଏଆଇ) କରୁଛନ୍ତି । ଠିକାସଂସ୍ଥାକୁ କାମ ଦିଆଯାଇଛି । ଶୀଘ୍ର କାମ ଆରମ୍ଭ ହେବ ବୋଲି ଶ୍ରୀ ମହତାବ କହିଛନ୍ତି ।
