ନୂଆଦିଲ୍ଲୀ: ପ୍ରଧାନମନ୍ତ୍ରୀ ମୋଦୀଙ୍କ ଅଧ୍ୟକ୍ଷତାରେ ଆୟୋଜିତ କ୍ୟାବିନେଟ ବୈଠକରେ ଅନେକ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନିଆଯାଇଛି। କ୍ୟାବିନେଟ ବୈଠକ ସଂପର୍କରେ ସୂଚନା ଦେଇ କେନ୍ଦ୍ରମନ୍ତ୍ରୀ ଅଶ୍ୱିନୀ ବୈଷ୍ଣବ କହିଛନ୍ତି ଯେ, ସରକାର ଜାତିଗତ ଜନଗଣନା କରିବାକୁ ନିଷ୍ପତ୍ତି ନେଇଛନ୍ତି। ଏହା ସହିତ ବୈଠକରେ ଚାଷୀଙ୍କ ପାଇଁ ମଧ୍ୟ ବଡ଼ ନିଷ୍ପତ୍ତି ନିଆଯାଇଛି।
ମୋଦୀ ସରକାର ଆଖୁ ଚାଷୀମାନଙ୍କୁ ଏକ ବଡ଼ ଉପହାର ମଧ୍ୟ ଦେଇଛନ୍ତି । ଆଖୁର FRP(ଉଚିତ ଓ ଲାଭଦାୟକ ମୂଲ୍ୟ) ବୃଦ୍ଧି କରାଯାଇଛି । କେନ୍ଦ୍ରମନ୍ତ୍ରୀ ଅଶ୍ୱିନୀ ବୈଷ୍ଣବ କହିଛନ୍ତି, ‘୨୦୨୫-୨୬ ଚିନି ଋତୁ ପାଇଁ ଆଖୁର ଉଚିତ ଏବଂ ଲାଭଦାୟକ ମୂଲ୍ୟ କ୍ୱିଣ୍ଟାଲ ପ୍ରତି ୩୫୫ ଟଙ୍କା ସ୍ଥିର କରାଯାଇଛି। ଏହା ହେଉଛି ବେଞ୍ଚମାର୍କ ମୂଲ୍ୟ, ଯାହା ତଳେ ଏହାକୁ କିଣାଯାଇପାରିବ ନାହିଁ।’
ଏହା ବ୍ୟତୀତ ମୋଦୀଙ୍କ କ୍ୟାବିନେଟ୍ ଶିଲଂରୁ ସିଲଚର ଜାତୀୟ ରାଜପଥକୁ ମଞ୍ଜୁରି ଦେଇଛି । ଏଥିପାଇଁ ଖର୍ଚ୍ଚ ହେବ ୨୨, ୮୬୪ କୋଟି ଟଙ୍କା । ଏହି କରିଡରର ବିକାଶ ଦ୍ୱାରା ଗୌହାଟିରୁ ତ୍ରିପୁରା, ମିଜୋରାମ, ମଣିପୁର ଏବଂ ଆସାମର ବାରାକ ଉପତ୍ୟକା ଅଞ୍ଚଳକୁ ସଂଯୋଗୀକରଣରେ ଉନ୍ନତି ଆସିବ । ଯାତ୍ରା ଦୂରତା ଏବଂ ଯାତ୍ରା ସମୟ ହ୍ରାସ ପାଇବ । ଏହା ଦେଶର ମାଲ ପରିବହନ କ୍ଷମତା ବୃଦ୍ଧିରେ ସହାୟକ ହେବ।
କେନ୍ଦ୍ର କ୍ୟାବିନେଟ୍ରେ ଅନ୍ୟ ଏକ ଗୁରୁତ୍ବପୂର୍ଣ୍ଣ ନିଷ୍ପତ୍ତି ହୋଇଛି । ଦେଶରେ ଜାତିଗତ ଜନଗଣନା କରିବେ ମୋଦୀ ସରକାର । କେନ୍ଦ୍ରମନ୍ତ୍ରୀ ଅଶ୍ୱିନୀ ବୈଷ୍ଣବ କଂଗ୍ରେସକୁ ଟାର୍ଗେଟ କରି କହିଛନ୍ତି, କଂଗ୍ରେସ ସରକାର ଜାତିଗତ ଜନଗଣନାକୁ ବିରୋଧ କରିଆସିଛି । ୧୯୪୭ ପରଠାରୁ ଜାତିଗତ ଜନଗଣନା କରାଯାଇନାହିଁ । କଂଗ୍ରେସ ଜାତିଗତ ଜନଗଣନା ବଦଳରେ ଜାତି ସର୍ଭେ କରିଥିଲା । ୟୁପିଏ ସରକାରରେ ଅନେକ ରାଜ୍ୟ ରାଜନୈତିକ ଦୃଷ୍ଟିକୋଣରୁ ଜାତି ସର୍ଭେ କରିଥିଲେ ।
କେନ୍ଦ୍ରମନ୍ତ୍ରୀ କହିଛନ୍ତି, ‘ଜାତିଗତ ଜନଗଣନାକୁ ମୂଳ ଜନଗଣନାରେ ଅନ୍ତର୍ଭୁକ୍ତ କରାଯିବା ଉଚିତ । ପ୍ରଧାନମନ୍ତ୍ରୀ ମୋଦୀଙ୍କ ନେତୃତ୍ୱରେ ରାଜନୈତିକ ବ୍ୟାପାର କ୍ୟାବିନେଟ (ସିସିପିଏ) ନିଷ୍ପତ୍ତି ନେଇଛି ଯେ, ଆଗାମୀ ଜନଗଣନାରେ ଜାତିଗତ ଜନଗଣନାକୁ ସାମିଲ କରାଯିବ ।’ ଜାତି ଭିତ୍ତିକ ଜନଗଣନାକୁ କଂଗ୍ରେସ ଏବଂ ଇଣ୍ଡି ମେଣ୍ଟ କେବଳ ନିଜସ୍ୱ ଲାଭ ପାଇଁ ସୀମିତ ରଖିଛନ୍ତି ବୋଲି ଅଶ୍ୱିନୀ ବୈଷ୍ଣବ ଅଭିଯୋଗ କରିଛନ୍ତି ।
