କୋକସରା,୦୮/୦୬: ବାସ୍ତବତା ମାଟିରେ ଲୋଟି ପଡ଼ିଛି, ସ୍ବପ୍ନ ସମାଧି ନେଇଛି । ଅସରନ୍ତି ସୁଖକୁ ସାଉଁଟିବା ପୂର୍ବରୁ ଚିର ନିଦ୍ରାରେ ଶୋଇପଡ଼ିଛି । ସଂସାର ପଥରେ ସଂଘର୍ଷ କରିବା ବଦଳରେ ଶ୍ମଶାନ ତାକୁ ଡାକିନେଇଛି । ଭାବିଥିଲା ଦୁଇ କୁଳକୁ ହିତ ହୋଇ ସ୍ବପ୍ନକୁ ବାସ୍ତବତାର ରୂପ ଦେବ । ବୋହୂ ଭାବେ ସୁଖ-ଦୁଃଖ-ଦାୟିତ୍ୱ ବହନ କରି ବାଟ ଚାଲିବ । ହେଲେ ବିବାହକୁ ୩ ମାସ ନପୁରୁଣ ନିର୍ଯାତନାର ଶିକାର ହେଲା । ଅଗ୍ନିକୁ ସାକ୍ଷୀ ରଖି ସାତ ଜନ୍ମ ପାଇଁ ସାଥି କରିବାର ଶପଥ ନେଇଥିବା ସ୍ୱାମୀ ଶେଷରେ ହାତ ଛାଡ଼ି ଦେଲା । ଶାଶୁ ଘର ଲୋକଙ୍କ ଶାରୀରିକ ଓ ମାନସିକ ନିର୍ଯାତନାର ଶିକାର ହୋଇ ଶେଷରେ ଚିର ନିଦ୍ରାରେ ଶୋଇଛି ପଡ଼ିଛି ମାଳତୀ । ଦୁଃଖ ଲୁହକୁ ବଳି ଯାଇଛି ସାଂଘାତିକ୍ ଅଭିଯୋଗ ।
ମାର୍ଚ୍ଚ ୮ ତାରିଖ ୨୦୨୫ରେ ପଡ଼ିଥିଲା ହାତଗଣ୍ଠି । କଳାହାଣ୍ଡି କୋକସରା ବ୍ଲକ୍ କାଉଡୋଲି ଗାଁର ମାଳତୀ ଛତ୍ରିଆ, ବୈଦିକ ରାତିନୀତିରେ ଲଡୁଗାଁ ପଞ୍ଚାୟତ ଆଇଲି ଗାଁର ଲିଙ୍ଗରାଜ ବାଗଙ୍କୁ ବିବାହ କରିଥିଲେ । ତିନି ମାସ ପର୍ଯ୍ୟନ୍ତ ସୁରୁଖୁରୁରେ ଚାଲିଥିଲା ସଂସାର । ସ୍ବାମୀ ଲିଙ୍ଗରାଜଙ୍କୁ ନେଇ ମେଞ୍ଚା ମେଞ୍ଚା ସ୍ବପ୍ନକୁ ଆଞ୍ଜୁଳା ଆଞ୍ଜୁଳା କରି ସାଇଥିଲା ମାଳତୀ । ମାତ୍ର ତାହା ବାସ୍ତବ ରୂପ ପାଇବା ପୂର୍ବରୁ ଜୀବନ ଦୀପ ଲିଭିଯାଇଛି । ଲିଙ୍ଗରାଜ କୌଣସି କାରଣରୁ ପ୍ରଥମେ ଗାଳିଗୁଲଜ ପରେ ବାରମ୍ବାର ନିର୍ଯାତନା ଦେଉଥିଲେ । ମାଳତୀଙ୍କ ପରିବାର ଲୋକଙ୍କ ଅଭିଯୋଗ ଅନୁଯାୟୀ, ଅତ୍ୟାଚାର ଧୀରେ ଧୀରେ ସୀମା ଲଙ୍ଘିଥିଲା । ଆଉ ଗତକାଲି ବାଇକ ଯୋଗେ ମାଳତୀଙ୍କୁ ହସ୍ପିଟାଲ ନେବା ରାସ୍ତାରେ ହୋଇଥିଲା ଦୁର୍ଘଟଣା । ଭବାନୀପାଟଣା ମେଡିକାଲରେ ପ୍ରାଥମିକ ଚିକିତ୍ସା ପରେ ବୁର୍ଲା ନେବା ରାସ୍ତାରେ ପ୍ରାଣ ହରାଇଛନ୍ତି ମାଳତୀ ।
ଏହା ଦୁର୍ଘଟଣା ନୁହେଁ ଯୋଜନା ବଦ୍ଧ ହତ୍ୟା ବୋଲି ଅଭିଯୋଗ କରି କୋକସରା ଥାନାରେ ଏତଲା ଦେଇଥିଲେ ମାଳତୀଙ୍କ ପରିବାର ଲୋକ । କୋକସରା ପୋଲିସ, ମାଜିଷ୍ଟ୍ରେଟ୍ ଓ ସାଇଣ୍ଟିଫିକ୍ ଟିମ୍ ପହଞ୍ଚି ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇଛନ୍ତି । ପୋଷ୍ଟମର୍ଟମ୍ ରିପୋର୍ଟ ଆସିବା ପରେ ପ୍ରକୃତ ସତ ସାମ୍ନାକୁ ଆସିବ ବୋଲି ପୁଲିସ ପକ୍ଷରୁ କୁହାଯାଇଛି । କିନ୍ତୁ ସତର ପର୍ଦ୍ଦାଫାସ୍ ହେବ ତ ? ମାଳତୀଙ୍କ ମୃତ୍ୟୁ-ଅଭିଯୋଗ-ସତ୍ୟାସତ୍ୟ ସବୁକିଛି ସ୍ପଷ୍ଟ ହେବତ ? ଏସବୁ ପ୍ରଶ୍ନ ଭିତରେ ମାଳତୀଙ୍କ ପରିବାର କିନ୍ତୁ ଚାହାନ୍ତି ନ୍ୟାୟ ।
