ଭୁବନେଶ୍ୱର ୦୫/୧୦: ଜଣେ ଇନ୍ସପେକ୍ଟର ସରକାରୀ କ୍ୱାର୍ଟର୍ସରେ ଆଇପିଏସ୍ଙ୍କ ଉତ୍ପାତ ଘଟଣା ପୁଣି ଚର୍ଚ୍ଚାକୁ ଆସିଛି । ଜାତୀୟ ମାନବ ଅଧିକାର ଆୟୋଗ (ଏନ୍ଏଚ୍ଆର୍ସି) ଘଟଣାକୁ ଗୁରୁତର ସହ ନେଇଛନ୍ତି । ଏନେଇ ପୁଲିସ ମହାନିର୍ଦ୍ଦେଶକ (ଡିଜିପି) ୱାଇ ବି ଖୁରାନିଆଙ୍କୁ ରିପୋର୍ଟ ତଲବ କରିଛନ୍ତି । ଆସନ୍ତା ୮ ସପ୍ତାହ ଭିତରେ ଘଟଣାର ତଦନ୍ତ ସହ କାର୍ଯ୍ୟାନୁଷ୍ଠାନ ରିପୋର୍ଟ ଦେବାକୁ ନିର୍ଦ୍ଦେଶ ଦେଇଛନ୍ତି ।
ସୂଚନା ଅଧିକାର କର୍ମୀ ଜୟନ୍ତ ଦାସ ଏନେଇ ଏନ୍ଏଚ୍ଆରସିରେ ପିଟିସନ ଦାଖଲ କରିଥିଲେ । ଜୁଲାଇ ୨୭ ତାରିଖ ରାତିରେ ଆଇପିଏସ୍ଜଣକ ନିଶାସକ୍ତ ଅବସ୍ଥାରେ କ୍ୟାପିଟାଲ ଥାନା ଅଧୀନରେ ଥିବା ଜଣେ ମହିଳା ଇନ୍ସପେକ୍ଟରଙ୍କ ସରକାରୀ କ୍ୱାର୍ଟର୍ସକୁ ଯାଇଥିଲେ। କ୍ୱାର୍ଟର୍ସରୁ ମହିଳା ଅଧିକାରୀଙ୍କୁ ଘୋଷାଡି଼ ଆଣି ନାନା ପ୍ରକାର ଗାଳିଗୁଲଜ କରିଥିଲେ । ତାଙ୍କୁ ଜୋର୍ଜବରଦସ୍ତି ବିବାହ କରିବାକୁ ବାଧ୍ୟ କରିଥିଲେ । ମହିଳା ଅଧିକାରୀଙ୍କ ସ୍ୱାମୀ ଘଟଣାସ୍ଥଳରେ ପହଞ୍ଚି ବିରୋଧ କରିବାରୁ ତାଙ୍କୁ ମଧ୍ୟ ପିଟାମରା କରିଥିଲେ ଆଇପିଏସ୍ଜଣକ । କ୍ୟାପିଟାଲ ଥାନାରୁ ଏକ ପିସିଆର ଭ୍ୟାନ୍ ଘଟଣାସ୍ଥଳକୁ ଯାଇଥିଲା । କିନ୍ତୁ ଆଇପିଏସ୍ଙ୍କ ଭୟରେ କୌଣସି କାର୍ଯ୍ୟାନୁଷ୍ଠାନ ନ ନେଇ ପଳାଇ ଆସିଥିଲା । ଇନ୍ସପେକ୍ଟରଙ୍କ ସ୍ୱାମୀ ଚିକିତ୍ସା ପାଇଁ ଘରୋଇ ହସ୍ପିଟାଲରେ ଭର୍ତ୍ତି ହୋଇଥିଲେ । କିନ୍ତୁ ପୀଡି଼ତାଜଣକ ସମ୍ପୃକ୍ତ ଆଇପିଏସ୍ଙ୍କ ବିରୋଧରେ କୌଣସି ପଦକ୍ଷେପ ନେଇନଥିଲେ । ଆଇପିଏସଙ୍କ ଡରରେ ସେ କୌଣସି ଥାନାରେ ଅଭିଯୋଗ କରିନଥିଲେ । ଏହି ପିଟିସନର ଶୁଣାଣିରେ ଗତ ୧ ତାରିଖରେ ଏନ୍ଏଚ୍ଆରସି ଏହି ନିର୍ଦ୍ଦେଶ ଦେଇଛନ୍ତି ।
