ମୁମ୍ବାଇ ୦୩/୧୦: ଆସନ୍ତା ୬ ତାରିଖରୁ ଆରମ୍ଭ ହେବାକୁ ଯାଉଛି ଟେଲିଭିଜନ୍ ଜଗତର ଲୋକପ୍ରିୟ ଶୋ’ ‘ବିଗ୍ ବସ୍-୧୮’ । ଏଥିରେ ଭାଗ ନେବା ପାଇଁ ଅନେକ ପ୍ରତିଯୋଗୀଙ୍କ ନାଁ ଲଗାତାର ଚର୍ଚ୍ଚାକୁ ଆସୁଛି । ଏ ସିଜନ୍ର ଅନ୍ୟତମ ପ୍ରତିଯୋଗୀ ହେଉଛନ୍ତି ନିୟା ଶର୍ମା, ଯାହାଙ୍କ ନାଁରେ ପ୍ରଥମେ ମୋହର ବାଜିଛି । ‘ସୁହାଗନ୍ ଚୁଡ଼ୈଲ୍’, ‘ଏକ୍ ହଜାରୋଁ ମେଁ ମେରୀ ବହ୍ନା ହୈ’ ଓ ‘ନାଗିନ୍’ ଭଳି ଧାରାବାହିକ ପାଇଁ ଲୋପ୍ରିୟତା ପାଇଛନ୍ତି ନିୟା ।
ସଦ୍ୟ ରିପୋର୍ଟ ଅନୁସାରେ, ନିୟା ଚଳିତ ସିଜନ୍ର ସବୁଠୁ ମହଙ୍ଗା ପ୍ରତିଯୋଗୀ ହେବାକୁ ଯାଉଛନ୍ତି । ବିଗ୍ ବସ୍ ଘରେ ନିୟା ବିତାଇବାକୁ ଯାଉଥିବା ପ୍ରତ୍ୟେକ ଦିନ ପାଇଁ ଶୋ’ର ନିର୍ମାତା ତାଙ୍କୁ ୫ ଲକ୍ଷ ୪୦ ହଜାର ଟଙ୍କା ଦେବେ । ଅର୍ଥାତ୍ ସପ୍ତାହକୁ ସେ ୩୭ ଲକ୍ଷ ୮୦ ହଜାର ଟଙ୍କା ପାରିଶ୍ରମିକ ନେବେ ।
ରିପୋର୍ଟ ଅନୁସାରେ, ନିର୍ମାତା ନିୟାଙ୍କ ସହ ମାତ୍ର ୧୫ ଦିନର କଣ୍ଟ୍ରାକ୍ଟ ସାଇନ୍ କରିଛନ୍ତି । ନିକଟରେ ‘ଖତ୍ରୋଁ କେ ଖିଲାଡ଼ି-୧୪’ ଫିନାଲେରେ ରୋହିତ ଶେଟ୍ଟୀ ନିୟାଙ୍କ ବିଗ୍ ବସ୍ ଏଣ୍ଟ୍ରି ବିଷୟରେ ସ୍ପଷ୍ଟ କରିଥିଲେ । ସେ ମଞ୍ଚରେ ଘୋଷଣା କରିଥିଲେ, ଉକ୍ତ ସିଜନ୍ର ଚୂଡ଼ାନ୍ତ ପ୍ରତିଯୋଗୀଙ୍କ ମଧ୍ୟରେ ଜଣେ ବିଗ୍ ବସ୍କୁ ଯିବେ । ତା’ପରେ ନିୟାଙ୍କୁ ଏଥିପାଇଁ ଅଭିନନ୍ଦନ ଜଣାଇଥିଲେ ।
ନିୟା ମଧ୍ୟ ଶୋ’ରେ ଯୋଗ ଦେବାକୁ ରାଜି ହୋଇଥିଲେ । ଏହା ପୂର୍ବରୁ ନିୟା ବିଗ୍ ବସ୍ ଓଟିଟିରେ ମାତ୍ର କିଛି ଘଣ୍ଟା ପାଇଁ ଭାଗ ନେଇଥିଲେ । ଲୋକପ୍ରିୟ ସିରିଏଲ ‘କୁଣ୍ଡଲୀ ଭାଗ୍ୟ’ ଅଭିନେତା ଧୀରଜ ଧୂପରଙ୍କ ବିଗ୍ ବସ୍ ଏଣ୍ଟ୍ରି ନିଶ୍ଚିତ ବୋଲି ଚର୍ଚ୍ଚା ହେଉଛି । ଅଭିନେତ୍ରୀ ସୁରଭି ଜ୍ୟୋତି, ଶହଜାଦ ଧାମୀ, ଶୋଏବ ଇବ୍ରାହିମ ଓ ନାୟରା ବାନାର୍ଜୀ ମଧ୍ୟ ଶୋ’ରେ ଏଣ୍ଟ୍ରି କରିପାରନ୍ତି । ବଲିଉଡ୍ ଅଭିନେତ୍ରୀ ସମୀରା ରେଡ୍ଡୀ, ଉର୍ମିଲା ମାତୋଣ୍ଡକର ଓ ଶିଳ୍ପା ଶିରୋଡକରଙ୍କ ନାଁ ବି ଚର୍ଚ୍ଚାକୁ ଆସିଛି ।
