ନୂଆଦିଲ୍ଲୀ,୧୦।୪: ନାଇଜେରିଆରେ ଦ୍ରୁତ ଗତିରେ ବ୍ୟାପିଥିବା ମେନିଞ୍ଜାଇଟିସ୍ ରୋଗ ଯୋଗୁଁ ଏପର୍ଯ୍ୟନ୍ତ ୧୫୧ ଜଣଙ୍କର ମୃତ୍ୟୁ ହୋଇସାରିଛି। ସେଠାକାର ସ୍ୱାସ୍ଥ୍ୟ ଅଧିକାରୀମାନେ ଏହି ରୋଗର ପ୍ରକୋପକୁ ନିୟନ୍ତ୍ରଣ କରିବା ପାଇଁ ଲଗାତାରର ସଂଘର୍ଷ ଜାରି ରଖିଛି। ଏହି ରୋଗରେ ମୃତ୍ୟୁ ହୋଇଥିବା ଅଧିକାଂଶ ଲୋକ ଉତ୍ତର ଅଞ୍ଚଳର ଦୂରଦୂରାନ୍ତ ଅଞ୍ଚଳରୁ ଆସିଥିଲେ। ଏଥିରେ ସର୍ବାଧିକ ସଂଖ୍ୟକ ପିଲା ପ୍ରଭାବିତ ହୋଇଛନ୍ତି।

ନାଇଜେରିଆ ରୋଗ ନିୟନ୍ତ୍ରଣ କେନ୍ଦ୍ର (NCDC) କହିଛି, ଏହି ରୋଗ ପ୍ରଥମେ ଗତ ବର୍ଷ ଅକ୍ଟୋବରରେ ଚିହ୍ନଟ ହୋଇଥିଲା। ଏବେ ପରିସ୍ଥିତି ଏପରି ଯେ ଏହା ନାଇଜେରିଆର ୩୬ଟି ରାଜ୍ୟ ମଧ୍ୟରୁ ୨୩ ଟି ରାଜ୍ୟକୁ ବ୍ୟାପିସାରିଛି। ଚଳିତ ବର୍ଷ ଏହି ରୋଗରେ ପ୍ରାୟ  ୭୪ ଜଣଙ୍କ ମୃତ୍ୟୁ ରେକର୍ଡ କରାଯାଇଛି।  

ଏନସିଡିସିର ମୁଖପାତ୍ର ସାନି ଦତ୍ତି କହିଛନ୍ତି, ଏହି ରୋଗ ଯୋଗୁଁ ଅଧିକାଂଶ ମୃତ୍ୟୁ ମୁଖ୍ୟତଃ ସଂକ୍ରମିତ ବ୍ୟକ୍ତିଙ୍କୁ ଠିକ୍ ସମୟ ମଧ୍ୟରେ ସ୍ୱାସ୍ଥ୍ୟକେନ୍ଦ୍ରରେ ନ ପହଞ୍ଚିବା କିମ୍ବା ବିଳମ୍ବରେ ପହଞ୍ଚିବା ଯୋଗୁଁ ଘଟିଛି। ଏହି ପ୍ରକୋପ ବର୍ତ୍ତମାନ ଆଫ୍ରିକାର ସର୍ବାଧିକ ଜନସଂଖ୍ୟା ବିଶିଷ୍ଟ ଦେଶକୁ ପ୍ରଭାବିତ କରିଛି। ନାଇଜେରିଆରେ ସ୍ୱାସ୍ଥ୍ୟ ସେବା ବର୍ତ୍ତମାନ ଖରାପ ଅବସ୍ଥାରେ ଅଛି। ଫେବୃଆରୀ ମାସରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ପ୍ରଶାସନ ଆମେରିକାର ସହାୟତା ହ୍ରାସ କରିବା ପରେ ନାଇଜେରିଆରେ ସଙ୍କଟ ଆହୁରି ଖରାପ ହୋଇଛି। ଟ୍ରମ୍ପଙ୍କ ଏହି ନିର୍ଦ୍ଦେଶନାମା କେବଳ ନାଇଜେରିଆ ନୁହେଁ ବରଂ ଅନ୍ୟ ଆଫ୍ରିକୀୟ ଦେଶକୁ ମଧ୍ୟ ପ୍ରଭାବିତ କରିଛି।