ନୂଆଦିଲ୍ଲୀ,୧୧/୦୮: ପାର୍ଟି ଚାଲିଥିଲା । ସମସ୍ତେ ନାଚଗୀତରେ ଖୁସିରେ ମସଗୁଲ୍ ଥିଲେ । ଖୁସିର ମୂହୁର୍ତ୍ତକୁ ଉପଭୋଗ କରୁଥିଲେ । ହେଲେ ନିମିଷକେ ସବୁ କିଛି ସରିଗଲା । ନାଇଟ କ୍ଲବରେ ଲୋକମାନେ ଖୁସି ମନାଉଥିବା ବେଳେ ଅତର୍କିତ ଗୁଳିମାଡ଼ କରିଛନ୍ତି ଦୁର୍ବୃତ୍ତ । ଦକ୍ଷିଣ ଆମେରିକୀୟ ଦେଶ ଇକୁଏଡରରେ ଏକ ନାଇଟ କ୍ଲବରେ ଫାୟାରିଂରେ ୮ ଜଣଙ୍କର ମୃତ୍ୟୁ ହୋଇଛି । ୩ ଜଣ ଆହତ ହୋଇଛନ୍ତି ।
ଗୁଆୟାସ ପ୍ରଦେଶର ଗ୍ରାମୀଣ ଅଞ୍ଚଳ ସାନ୍ତା ଲୁସିଆରେ ଏହି ଗୁଳିମାଡ଼ ହୋଇଛି । ପୁଲିସ ସୂଚନା ଅନୁଯାୟୀ, ଆକ୍ରମଣର ଶିକାର ହୋଇଥିବା ୮ ଜଣଙ୍କ ବୟସ ୨୦ରୁ ୪୦ ବର୍ଷ ବୟସର ହେବ । ମୃତକଙ୍କ ମଧ୍ୟରୁ ୭ ଜଣ ଘଟଣାସ୍ଥଳରେ ହିଁ ଆଖିବୁଜିଥିଲେ । ଅନ୍ୟ ଜଣଙ୍କର ହସ୍ପିଟାଲରେ ମୃତ୍ୟୁ ହୋଇଥିଲା । ମାରଣାସ୍ତ୍ର ଧରି ଦୁର୍ବୃତ୍ତମାନେ ଦୁଇଟି ଗାଡ଼ିରେ ଆସି ଅତର୍କିତ ଗୁଳିଚଳାଇଥିଲେ । ଗୁଳିମାଡ଼ର କାରଣ ଜଣାପଡିନାହିଁ । ସଂଗଠିତ ଅପରାଧ ଏବଂ ଡ୍ରଗ୍ସ କାର୍ଟେଲ ବିବାଦ ସହିତ ଜଡିତ କାରଣରୁ ହିଂସାକାଣ୍ଡ ହୋଇଥିବା ଅନୁମାନ କରାଯାଉଛି ।
ଅଧିକ ପଢନ୍ତୁ...ସଂସଦରେ ଉପସ୍ଥାପନ ହେବ ସଂଶୋଧିତ ଆୟକର ବିଲ୍, ଆଜି ଆଗତ କରିବେ ଅର୍ଥମନ୍ତ୍ରୀ ନିର୍ମଳା ସୀତାରମଣ
ଇକୁଏଡରର ୪ଟି ଉପକୂଳ ରାଜ୍ୟ ଏଲ ଓରୋ, ଗୁଆୟାସ, ମାନାବୀ ଏବଂ ଲସ ରିଓସରେ ଗତ କିଛି ମାସରେ ଅନେକ ହିଂସାକାଣ୍ଡରେ ୧୨ରୁ ଅଧିକ ଲୋକଙ୍କର ମୃତ୍ୟୁ ହୋଇଛି । ଚଳିତ ବର୍ଷ ପ୍ରାୟ ୧୮ ନିୟୁତ ଜନସଂଖ୍ୟା ବିଶିଷ୍ଟ ଏହି ଦେଶରେ ୪,୬୦୦ରୁ ଅଧିକ ଲୋକଙ୍କୁ ହତ୍ୟା ହୋଇଛି। ଗତ ବର୍ଷ ପ୍ରାୟ ୭,୦୦୦ ହତ୍ୟା ରିପୋର୍ଟ ହୋଇଥିଲା। ୨୦୨୩ରେ ୮,୦୦୦ ହତ୍ୟା ମାମଲା ସାମ୍ନାକୁ ଆସିଥିଲା।
