ଭୁବନେଶ୍ଵର, ୨୧/୦୧ : କଣାସରେ ଝାଡ଼ାବାନ୍ତିରେ ଯାଇଛି ଜଣଙ୍କ ଜୀବନ। ଏନେଇ ସ୍ପଷ୍ଟ କଲା ସ୍ଵାସ୍ଥ୍ୟ ବିଭାଗ। ଜନସ୍ବାସ୍ଥ୍ୟ ନିର୍ଦ୍ଦେଶକ ଡାକ୍ତର ନୀଳକଣ୍ଠ ମିଶ୍ର ଏନେଇ ସୂଚନା ଦେଇଛନ୍ତି। ସେ କହିଛନ୍ତି ଯେ, କଣାସ ଅଞ୍ଚଳରେ ୭ ରୁ ୮ ଦିନ ହେଲା ଝାଡ଼ାବାନ୍ତି ବ୍ୟାପିଛି। ଏଥିରେ ମୋଟ ୩ ଜଣଙ୍କର ମୃତ୍ୟୁ ହୋଇଥିବା ସୂଚନା ଆସିଥିଲା। ସେମାନଙ୍କ ମଧ୍ୟରୁ ଜଣେ ଡାଇରିଆରେ ମରିଥିବା ସ୍ପଷ୍ଟ ହୋଇଛି। ଅନ୍ୟ ଦୁଇ ଜଣଙ୍କର ରିପୋର୍ଟକୁ ଅପେକ୍ଷା କରାଯାଇଛି।
ଜନସ୍ବାସ୍ଥ୍ୟ ନିର୍ଦ୍ଦେଶକ କହିଛନ୍ତି ଯେ, କଣାସରେ ପ୍ରଥମେ ଏକ ଭୋଜିରୁ ଝାଡ଼ାବାନ୍ତି ଆରମ୍ଭ ହୋଇଥିଲା। ତାପରେ ଆଖପାଖ ୫ଟି ଗାଁକୁ ବ୍ୟାପିଛି। ବର୍ତ୍ତମାନ ସୁଦ୍ଧା ଏହି ଗାଁ ଗୁଡ଼ିକର ୭୧ ଜଣ ସଂକ୍ରମିତ ହେଇଛନ୍ତି। ଦୟା ନଦୀରୁ ଦୂଷିତ ଜଳ ବ୍ୟବହାର ଯୋଗୁଁ ଡାଇରିଆ ବ୍ୟାପିଥିବା ଜଣାପଡିଛି। ନମୁନା ପରୀକ୍ଷାରୁ ଇ-କୋଲି ବ୍ୟାକ୍ଟେରିଆ ଚିହ୍ନଟ ହୋଇଛି। ବର୍ତ୍ତମାନ ସ୍ଥିତି ନିୟନ୍ତ୍ରଣରେ ଅଛି। ସେହି ଅଞ୍ଚଳରେ ଭୁବନେଶ୍ଵରରୁ ୨ଟି ଟିମ୍ ସହ ସ୍ବାସ୍ଥ୍ୟ ବିଭାଗର ମୋଟ ୮ଟି ଟିମ୍ ନିୟୋଜିତ ହୋଇଛନ୍ତି । ନଦୀର ସବୁ ଘାଟକୁ ସୁପର କ୍ଲୋରିନେସନ୍ ବା ବିଶୋଧନ କରାଯାଉଛି। ସରକାରଙ୍କ ପକ୍ଷରୁ ବିଶୁଦ୍ଧ ଜଳ ଯୋଗାଇ ଦିଆଯାଉଛି।
ଏହି ଖବରଟିକୁ ପଢନ୍ତୁ-କରୋନା ଗଲା ପରେ କୋଭିଡ ସାମଗ୍ରୀ ବେକାର: ଲକ୍ଷାଧିକ ଟଙ୍କା ପିପିଇ କିଟ୍ ଫିଙ୍ଗିଦେଲା ସିଏମ୍ସି, ମେୟର କହିଲେ ତଦନ୍ତ ହେବ..
ସୂଚନାନୁଯାୟୀ, ଭୁବନେଶ୍ୱରର ବିଭିନ୍ନ ସ୍ୱେରେଜ ୱେଷ୍ଟ ଗଙ୍ଗୁଆ ନାଳ ଦେଇ ଦୟା ନଦୀରେ ମିଶିଯିବାରୁ ଦୟା ସମେତ ତାର ସମସ୍ତ ଶାଖାନଦୀ ପ୍ରଦୁଷିତ ହେଉଛି। ଦୟାନଦୀର ପ୍ରଦୂଷିତ ଜଳ ଯୋଗୁ ତଳିଆ ଅଂଚଳରେ ଝାଡ଼ାବାନ୍ତି ବ୍ୟାପୁଛି। ଏହାର ପ୍ରଭାବ କେବଳ ମଣିଷମାନଙ୍କ ଉପରେ ପଡୁନି। ନଦୀରେ ଥିବା ମାଛ, ଚୁଙ୍ଗୁଡ଼ି ଉପରେ ମଧ୍ୟ ଅଧିକ ମାତ୍ରାରେ ପଡୁଛି । କୁଇଣ୍ଟାଲ କୁଇଣ୍ଟାଲ ମାଛ ନଦୀରେ ମରି ଭାସୁଛନ୍ତି । ଏ ସମସ୍ୟା ପ୍ରତି ବର୍ଷ ଦେଖା ଦେଉଥିବା ବେଳେ ଏହାର ସମାଧାନ ପାଇଁ କେବେ ଟ୍ରିଟମେଣ୍ଟ ପ୍ଲାଣ୍ଟ ତିଆରି ହେବ ତାହା ପ୍ରଶ୍ନବାଚୀ ସୃଷ୍ଟି କରିଛି। ପ୍ରତିବର୍ଷ ଗଡିଶାଗୋଦା, ଗୋପୀନାଥପୁର, କାଦୁଆ ପଞ୍ଚାୟତର ଲୋକମାନେ ଅଧିକ ପ୍ରଭାବିତ ହେଇଥିବା ବେଳେ ଚୁପୁରିଙ୍ଗି, ବଡାଲ, ବଳଭଦ୍ରପୁର, ଗଡ଼ସାହି,କଣାସ, ଦୋକନ୍ଦା, ପାଣ୍ଡିଆକେରା ଆଦି ବିଭିନ୍ନ ପଞ୍ଚାୟତ ମଧ୍ୟ ଅନେକାଂଶରେ ପ୍ରଭାବିତ ହେଉଛି । କେବଳ ସେତିକି ନୁହେଁ ନଦୀକୂଳରେ ଥିବା ପମ୍ପ ହାଉସରୁ ଯୋଗାଣ ହେଉଥିବା ଜଳ ଯୋଗୁ ବିନ୍ଧଣ, ଖଣ୍ଡହତା, ଜାମଳଗୋଦା ଆଳିବାଡ ଆଦି ବିଭିନ୍ନ ପଞ୍ଚାୟତର ଲୋକ ମଧ୍ୟ ସମଦଶା ଭୋଗୁଛନ୍ତି । ଦୟାନଦୀ ପ୍ରଦୁଷଣମୁକ୍ତ ନହେଲେ ଆହୁରି ମୁଣ୍ଡ ଗଡ଼ିବ ବୋଲି ଆଶଙ୍କା କରାଯାଉଛି।
