ନୂଆଦିଲ୍ଲୀ: ୟୁକ୍ରେନ୍ ଯୁଦ୍ଧରେ ବିଜୟ ନମିଳିବା ଯାଏଁ ଋଷକୁ ଉତ୍ତର କୋରିଆ ସମର୍ଥନ ଦେବ ବୋଲି କିମ୍ ଜଙ୍ଗଙ୍କ ବୈଦେଶିକ ମନ୍ତ୍ରୀ ଚୋ ସନ ହୁଇ କହିଛନ୍ତି । ଶୁକ୍ରବାର ଏନେଇ ମସ୍କୋରେ ଚୋ ସନ୍ ଋଷର ବୈଦେଶିକ ମନ୍ତ୍ରୀ ସର୍ଗେଇ ଲାଭରୋଭଙ୍କୁ କହିଛନ୍ତି । ସେ କହିଛନ୍ତି, ‘ଆମର ପାରମ୍ପରିକ, ଐତିହାସିକ ବନ୍ଧୁତ୍ବ ଏକ ନୂତନ ସମୟରେ ପହଞ୍ଚିଛି । ସୈନ୍ୟ ସହଭାଗିତା ଦିଗରେ ଏହା ଜାରି ରହିବ ।’ ବନ୍ଧୁତା ସ୍ଥାପନ ଦିଗରେ କିମ ଜଙ୍ଗ ଉନ ଏବଂ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କ ପଦକ୍ଷେପକୁ ଚୋ ସନ ହୁଇ ପ୍ରଶଂସା କରିଛନ୍ତି ।
ପୁଟିନଙ୍କ ବିଜ୍ଞ ନେତୃତ୍ବ ଯୋଗୁଁ ଋଷ ସେନା ଏବଂ ଦେଶବାସୀ ଏକ ବଡ଼ ବିଜୟ ହାସଲ କରିବେ, ଏଥିରେ ପୋଙ୍ଗୟାଙ୍ଗର କୌଣସି ଦ୍ବିମତ ନାହିଁ । ଆମେ ପ୍ରତିଶ୍ରୁତି ଦେଉଛୁ, ବିଜୟ ଲାଭ ନକରିବା ଯାଏଁ ଆମେ ଋଷ ପାଖରେ ଛିଡ଼ା ହେବୁ ବୋଲି ଉତ୍ତର କୋରିଆର ବୈଦେଶିକ ମନ୍ତ୍ରୀ କହିଛନ୍ତି । ସେପଟେ ତାଙ୍କୁ ଶୁଭେଚ୍ଛା ଜଣାଇବା ସହ ଲାଭରୋଭ କହିଛନ୍ତି ଯେ, ଦୁଇ ଦେଶ ମଧ୍ୟରେ ଗଭୀର ସଂପର୍କ ରହିଛି । ଯେକୌଣସି ସୁରକ୍ଷା ସମ୍ବନ୍ଧୀୟ ସମସ୍ୟାର ମିଳିତ ଭାବେ ସମାଧାନ କରିବୁ ।
ସେପଟେ ଋଷ ସେନାରେ ଉତ୍ତର କୋରିଆର ପ୍ରାୟ ୧୦ ହଜାର ସୈନିକ ସାମିଲ ହୋଇଛନ୍ତି ବୋଲି ଆମେରିକା ସମେତ ଦକ୍ଷିଣ କୋରିଆ ଏବଂ ନାଟୋ ଅଭିଯୋଗ କରିଛି । ଏହା ଉପରେ ଶୁକ୍ରବାର କ୍ରେମଲିନ ମୁଖପାତ୍ର ଦିମିତ୍ରି ପେସକୋଭ୍ କହିଛନ୍ତି ଯେ, ପୂର୍ବରୁ ଆମେ ଦେଇଥିବା ପ୍ରତିକ୍ରିୟାରେ ଅଧିକ କିଛି ଯୋଗ କରିବାର ଆବଶ୍ୟକତା ନାହିଁ ।
ଏହା ପୂର୍ବରୁ ଗୁରୁବାର ଆମେରିକାର ବୈଦେଶିକ ମନ୍ତ୍ରୀ ଆଣ୍ଟୋନି ବ୍ଲିଙ୍କେନ ଦାବି କରିଥିଲେ ଯେ, ଉତ୍ତର କୋରିଆର ୮୦୦୦ ସୈନିକ କେବଳ କୁର୍ସକ କ୍ଷେତ୍ରରେ ମୁତୟନ ହୋଇଛନ୍ତି । ଅନ୍ୟପଟେ ଫେବୃଆରୀ ୨୦୨୨ରେ ୟୁକ୍ରେନରେ ଯୁଦ୍ଧ ଆରମ୍ଭ କରିଥିବା ଋଷ ଉତ୍ତର କୋରିଆ ସୈନିକଙ୍କ ଉପସ୍ଥିତି ସଂପର୍କରେ କୌଣସି ସ୍ପଷ୍ଟ ସୂଚନା ଦେଇନାହିଁ ।
