ନୂଆଦିଲ୍ଲୀ,୨୭/୧୧: ଚଳିତ ବର୍ଷ ଜାନୁଆରୀ ୨୨ରେ ରାମ ମନ୍ଦିରର ଗର୍ଭଗୃହରେ କରାଯାଇଥିଲା ରାମଲାଲାଙ୍କ ମୂର୍ତ୍ତିର ପ୍ରାଣ-ପ୍ରତିଷ୍ଠା । ଏନେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଗର୍ଭଗୃହରେ ଉପସ୍ଥିତ ଥିଲେ। ତେବେ ପ୍ରାଣ ପ୍ରତିଷ୍ଠା ପରଠୁ ରାମଲାଲାଙ୍କ ଦର୍ଶନ ପାଇଁ ଆସୁଛନ୍ତି ଲକ୍ଷାଧିକ ଶ୍ରଦ୍ଧାଳୁ । ତେବେ ରାମଲାଲାଙ୍କ ମୂର୍ତ୍ତିର ପ୍ରାଣ-ପ୍ରତିଷ୍ଠା ଆସନ୍ତା ୨୨ ତାରିଖ ପୂରିବ ବର୍ଷେ। ହେଲେ ରାମ ମନ୍ଦିର ପ୍ରାଣ-ପ୍ରତିଷ୍ଠାର ବାର୍ଷିକୀ ବା ଦିବସକୁ ଜାନୁଆରୀ ୧୧ ତାରିଖ ଅର୍ଥାତ ପୌଷ ଶୁକ୍ଳ ଦ୍ବାଦଶୀରେ ପାଳନ କରାଯିବା ବୋଲି ଶ୍ରୀରାମ ଜନ୍ମଭୂମି ତୀର୍ଥ କ୍ଷେତ୍ର ନ୍ୟାସର ବୈଠକରେ ନିଷ୍ପତ୍ତି ହୋଇଛି ।
ତେବେ ସୋମବାର ଦିନ ଶ୍ରୀରାମ ଜନ୍ମଭୂମି ତୀର୍ଥ କ୍ଷେତ୍ର ନ୍ୟାସର ବୈଠକ ମଣିରାମ ଦାସ ଛାବନୀରେ ହୋଇଥିଲା। ବୈଠକରେ ସନ୍ଥଙ୍କଠାରୁ ପରାମର୍ଶ ନିଆଯାଇ ଏହା ଧାର୍ଯ୍ୟ ହୋଇଥିଲା ଯେ, ଯେଉଁ ଭଳି ସମସ୍ତ ହିନ୍ଦୁ ଉତ୍ସବ ଏବଂ ପର୍ବ ହିନ୍ଦୀ ତିଥି ଏବଂ ପଞ୍ଚାଙ୍ଗ ଅନୁସାରେ ପାଳନ କରାଯାଉଛି। ସେହିପରି ପ୍ରଭୁ ଶ୍ରୀରାମଲାଲା ସରକାରଙ୍କ ପ୍ରାଣ ପ୍ରତିଷ୍ଠାର ଦିବସ ତିଥି ଅନୁଯାୟୀ, ପୌଷ ଶୁକ୍ଳ ଦ୍ୱାଦଶୀ ଅର୍ଥାତ କୁର୍ମା ଦ୍ୱାଦଶୀରେ ପାଳନ କରାଯିବ। ଏହି ତିଥିକୁ ପ୍ରତିଷ୍ଠା ଦ୍ୱାଦଶୀ ଭାବେ ପାଳନ କରାଯିବ। ୨୦୨୫ରେ ଏହି ତିଥି ୧୧ ଜାନୁଆରୀରେ ହେବ। ଶ୍ରୀରାମ ଜନ୍ମଭୂମୀ ତୀର୍ଥ କ୍ଷେତ୍ରର ବୈଠକରେ ଅହୁରି ଅନେକ ନିଷ୍ପତ୍ତି ମଧ୍ୟ ନିଆଯାଇଛି।
