ଭୁବନେଶ୍ୱର,୨୨/୧୧: ବିଦ୍ୟୁତ ଉପଭୋକ୍ତାଙ୍କ ଉପରେ ଗୋଟିଏ ପରେ ଗୋଟିଏ ବୋଝ ବଢ଼ିବାରେ ଲାଗିଛି । ଗତ କିଛି ଦିନ ହେବ ନୂଆ ସ୍ମାର୍ଟ ମିଟର ବାବଦରେ ପ୍ରତି ମାସରେ ୫୦ ଟଙ୍କା ଅତିରିକ୍ତ ଦେୟ ପାଇଁ ବିଜୁଳି ବିଲ୍ରେ ଆସୁଥିଲା । ଏବେ ପୁଣି ପୁରୁଣା ସିକ୍ୟୁରିଟି ଜମା ରାଶି କମ ଥିବା ଦର୍ଶାଇ ୨ ମାସ ହାରାହାରି ଅନୁସାରେ ଅତିରିକ୍ତ ଜମା ରାଶି ଦେବାକୁ ବିଦ୍ୟୁତ ବିତରଣ କମ୍ପାନି ଗ୍ରାହକଙ୍କୁ ନୋଟିସ୍ କରିଛି। ସେମାନଙ୍କୁ ମାତ୍ର ୧ ମାସ ସମୟ ଦିଆଯାଇଛି । ଯଦି ଅତିରିକ୍ତ ସିକ୍ୟୁରିଟି ରାଶି ଜମା ନ କରିବେ, ତେବେ ତାଙ୍କ ବିଦ୍ୟୁତ ସଂଯୋଗ କାଟି ଦିଆଯିବ ବୋଲି ଧମକ ମଧ୍ୟ ଦିଆଯାଇଛି । ଯାହାକୁ ନେଇ ଓଡ଼ିଶା ରାଜ୍ୟ ବିଦ୍ୟୁତ୍ ଉପଭୋକ୍ତା ମହସଂଘ କ୍ଷୋଭ ପ୍ରକାଶ କରିଛି । ମହାସଂଘର ଆବାହକ ରବି ବେହେରା ଏ ନେଇ ମୁଖ୍ୟମନ୍ତ୍ରୀଙ୍କ ହସ୍ତକ୍ଷେପ ଲୋଡ଼ିଛନ୍ତି ।
ନୂଆପଲ୍ଲୀ ଅଞ୍ଚଳର ଶ୍ରୀରାମ ବିହାରର ଜଣେ ବିଦ୍ୟୁତ ଗ୍ରାହକଙ୍କ ସୂଚନା ମୁତାବକ ବିଦ୍ୟୁତ ବିତରଣ କମ୍ପାନି ତାଙ୍କୁ ଏଭଳି ଚିଠି କରିଛି । ସେଥିରେ ଦର୍ଶାଯାଇଛି, କମ୍ପାନି ନିକଟରେ ତାଙ୍କ ସିକ୍ୟୁରିଟି ଜମା ବାବଦରେ ୬୮୨ ଟଙ୍କା ରହିଛି । ହେଲେ ତାଙ୍କର ହାରାହାରି ବିଜୁଳି ବ୍ୟବହାର ଅନୁସାରେ ୨ ମାସକୁ ୩୧୭୨ ଟଙ୍କା ଜମା ରହିବା କଥା । ସେହି ଅନୁସାରେ ତାଙ୍କୁ ୧ ମାସ ମଧ୍ୟରେ ଅତିରିକ୍ତ ୨୪୯୦ ଟଙ୍କା ଜମା କରିବାକୁ କୁହାଯାଇଛି । ଜମା ନ କରିପାରିଲେ ବିଦ୍ୟୁତ ସଂଯୋଗ କାଟି ଦିଆଯିବ ବୋଲି ବିଦ୍ୟୁତ ବଣ୍ଟନ କମ୍ପାନି ପକ୍ଷରୁ ଖୋଲାଖୋଲି ଧମକ ଦିଆଯାଇଛି । ଫଳରେ କେବଳ ସେ ଜଣେ ନୁହନ୍ତି ରାଜ୍ୟର ବହୁ ଘରୋଇ ବିଦ୍ୟୁତ ଉପଭୋକ୍ତାଙ୍କ ମଧ୍ୟରେ ଭାଳେଣି ପଡ଼ିଯାଇଛି । ଏହି ନୋଟିସ୍ ପାଇଲା ପରେ ଗ୍ରାହକମାନେ ବିଦ୍ୟୁତ ଅଫିସକୁ ଦୌଡ଼ି ଦୌଡ଼ି ନୟାନ୍ତ ହେଲେଣି । କିନ୍ତୁ କମ୍ପାନି କର୍ତ୍ତୃପକ୍ଷ ଶୁଣୁନାହାନ୍ତି । ତେଣୁ ଉପଭୋକ୍ତାଙ୍କର ଏହି ସମସ୍ୟା ଉପରେ ତୁରନ୍ତ ହସ୍ତକ୍ଷେପ କରିବାକୁ ଓଡ଼ିଶା ରାଜ୍ୟ ବିଦ୍ୟୁତ୍ ଉପଭୋକ୍ତା ମହାସଂଘ ଦାବି କରିଛି ।
