ନୂଆଦିଲ୍ଲୀ: ଜାତୀୟ ସୁରକ୍ଷା ପରାମର୍ଶଦାତା (NSA) ଅଜିତ ଡୋଭାଲ ଗୁରୁବାର (୭ ଅଗଷ୍ଟ, ୨୦୨୫) ମସ୍କୋରେ ରୁଷ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କୁ ଭେଟିଛନ୍ତି । ଭାରତ ଏବଂ ରୁଷ ମଧ୍ୟରେ ଶକ୍ତି ଓ ପ୍ରତିରକ୍ଷା ସହଯୋଗକୁ ମଜଭୁତ କରିବା ଲକ୍ଷ୍ୟରେ ଏହି ବୈଠକ ହୋଇଛି । ଡୋଭାଲ ବୁଧବାର ମସ୍କୋରେ ପହଞ୍ଚିଥିଲେ । ଏହା ପରେ ଅଜିତ ଡୋଭାଲ୍ ସୂଚନା ଦେଇଥିଲେ ଯେ, ରୁଷ ରାଷ୍ଟ୍ରପତି ପୁଟିନ ଚଳିତ ବର୍ଷ ଶେଷ ଭାଗରେ ଭାରତ ଗସ୍ତ କରିପାରନ୍ତି ।
ଏନଏସ୍ଏ ଡୋଭାଲ କହିଛନ୍ତି, ‘ଆମ ଭିତରେ ଗୋଟିଏ ସ୍ୱତନ୍ତ୍ର ଓ ଦୀର୍ଘ ସମୟର ସମ୍ପର୍କ ରହିଛି। ଆମେ ଏହି ସମ୍ପର୍କକୁ ସମ୍ମାନ କରୁ। ଆମେ ଗୋଟିଏ ଉଚ୍ଚସ୍ତରୀୟ ଆଲୋଚନା କରିଥିଲୁ। ରାଷ୍ଟ୍ରପତି ପୁଟିନଙ୍କ ଭାରତ ଗସ୍ତକୁ ନେଇ ଆମେ ବେଶ ଉତ୍ସାହିତ। ମୁଁ ଭାବୁଛି ଗସ୍ତର ତାରିଖ ଏବେ ଠାରୁ ପ୍ରାୟ ସ୍ଥିର ହୋଇଯିବ।’ ପୁଟିନଙ୍କ ଭାରତ ଗସ୍ତ ସମ୍ପର୍କରେ ଡୋଭାଲ ସୂଚନା ଦେଇଥିଲେ ହେଁ ମସ୍କୋ ପକ୍ଷରୁ ଏଯାଏ କିଛି ବି ପ୍ରତିକ୍ରିୟା ଆସି ନାହିଁ।
ଅଜିତ ଡୋଭାଲ ରୁଷ ସୁରକ୍ଷା ପରିଷଦ ସଚିବ ସର୍ଗେଇ ଶୋଇଗୁଙ୍କୁ ମଧ୍ୟ ଭେଟିଛନ୍ତି । ଏହି ଅବସରରେ ଶୋଇଗୁ କହିଛନ୍ତି ଯେ, ଭାରତ ଏବଂ ରୁଷ ମଧ୍ୟରେ ମଜଭୁତ ବନ୍ଧୁତ୍ୱପୂର୍ଣ୍ଣ ସମ୍ପର୍କ ରହିଛି। ରାଷ୍ଟ୍ରପତି ପୁଟିନ ଏବଂ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ମଧ୍ୟରେ ଉଚ୍ଚସ୍ତରୀୟ ଆଲୋଚନା କରିବା ଦୁଇ ଦେଶ ପାଇଁ ଜରୁରୀ । ଶୋଇଗୁ କହିଛନ୍ତି ଯେ, ଭାରତ ସହିତ ସ୍ୱତନ୍ତ୍ର ରଣନୈତିକ ସହଭାଗୀତାକୁ ପ୍ରତ୍ୟେକ କ୍ଷେତ୍ରରେ ସୁଦୃଢ଼ କରିବା ମସ୍କୋ ପାଇଁ ସବୁଠାରୁ ଗୁରୁତ୍ୱପୂର୍ଣ୍ଣ ।
ଉଭୟ ଦେଶ ଆଧୁନିକ ସମୟର ଚ୍ୟାଲେଞ୍ଜ ଏବଂ ବିପଦର ମିଳିତ ମୁକାବିଲା କରିବାକୁ ପ୍ରତିବଦ୍ଧ । ଭାରତ ଏବଂ ରୁଷ ଅନେକ ଦଶନ୍ଧି ଧରି ସୁରକ୍ଷା, ପ୍ରତିରକ୍ଷା, ଶକ୍ତି ଏବଂ ପ୍ରଯୁକ୍ତିବିଦ୍ୟା କ୍ଷେତ୍ରରେ ପରସ୍ପର ସହିତ ରଣନୈତିକ ଭାବରେ ଜଡିତ ବୋଲି ସର୍ଗେଇ ଶୋଇଗୁ କହିଛନ୍ତି ।
