ମୁମ୍ବାଇ,୨୪/୧୨: ଆସନ୍ତା ବର୍ଷ ଫେବ୍ରୁଆରୀ ପହିଲାରେ ସାଧାରଣ ବଜେଟ୍ ୨୦୨୫-୨୬ ଉପସ୍ଥାପନ ହେବ । ଏହା ଶନିବାର ପଡୁଥିବା ସତ୍ତେ୍ୱ ପୁଞ୍ଜି ବଜାର ଖୋଲା ରହିବ । ଉକ୍ତ ଦିନ ଅର୍ଥମନ୍ତ୍ରୀ ନିର୍ମଳା ସୀତାରମଣ ନିଜର ଅଷ୍ଟମ କେନ୍ଦ୍ରୀୟ ବଜେଟ୍କୁ ଆଗତ କରିବେ ।
ବମ୍ବେ ଷ୍ଟକ୍ ଏକ୍ସଚେଞ୍ଜ(ବିଏସ୍ଇ) ସୂଚକାଙ୍କ ସେନ୍ସେକ୍ସ ଏବଂ ନ୍ୟାସ୍ନାଲ ଷ୍ଟକ୍ ଏକ୍ସଚେଞ୍ଜ(ଏନ୍ଏସ୍ଇ) ନିଫ୍ଟି ଉଭୟ ସୂଚକାଙ୍କ ସାଧାରଣ କାରବାର ଦିବସ ଭଳି ଉକ୍ତ ଦିନ ସକାଳ ୯ଟା ୧୫ରୁ ଅପରାହ୍ନ ୩.୩୦ ଯାଏ ଖୋଲା ରହିବ । କମୋଡିଟି ଡେରିଭେଟିଭ୍ ସେଗ୍ମେଣ୍ଟ ବି ଫେବ୍ରୁଆରୀ ୧ ସକାଳେ କାରବାର ପାଇଁ ଖୋଲା ରହିବ ।
ଭାରତରେ ସାଧାରଣତଃ ଶନିବାର ଏବଂ ରବିବାର ଷ୍ଟକ୍ ବଜାର ବନ୍ଦ ରହିଥାଏ । ତେବେ କିଛି ସ୍ୱତନ୍ତ୍ର ଦିନରେ ସ୍ପେସିଆଲ ଟ୍ରେଡିଂ ସେସନ୍ର ଆୟୋଜନ କରାଯାଇଥାଏ । ଏହା ପୂର୍ବରୁ ୨୦୨୦ ଫେବ୍ରୁଆରୀ ୧ ବଜେଟ୍ ଦିନ ଶନିବାର ପଡ଼ିଥିଲା । ଉକ୍ତ ଦିନ ବଜାର ଖୋଲା ରହିଥିଲା । ସେହିଭଳି ୨୦୧୫ ଫେବ୍ରୁଆରୀ ୨୮ ବଜେଟ୍ ଦିନ ବି ଶନିବାର ପଡ଼ିଥିବାରୁ ଉକ୍ତ ଦିନ ବଜାର ଖୋଲାଥିଲା ।
ସପ୍ତାହର ପ୍ରଥମ ଦିନ ଅର୍ଥାତ୍ ଆଜି ସେନ୍ସେକ୍ସ ୪୯୮ ପଏଣ୍ଟ୍ର ବୃଦ୍ଧି ସହିତ ୭୮,୫୪୦ ପଏଣ୍ଟରେ ବନ୍ଦ ହୋଇଛି । ନିଫ୍ଟି ୧୬୫ ପଏଣ୍ଟ ବଢ଼ି ୨୩,୭୫୩ ପଏଣ୍ଟରେ ବନ୍ଦ ହୋଇଛି । ବିଏସ୍ଇ ସ୍ମଲ୍କ୍ୟାପ୍ ୩୩୧ ପଏଣ୍ଟ ଖସି ୫୪,୮୧୭ ପଏଣ୍ଟରେ ବନ୍ଦ ହୋଇଛି । ସେନ୍ସେକ୍ସର ୩୦ ସେୟାର ମଧ୍ୟରୁ ୨୦ଟିରେ ବୃଦ୍ଧି ଏବଂ ୧୦ଟିରେ ହ୍ରାସ ଘଟିଛି । ନିଫ୍ଟିର ୫୦ ସେୟାର ମଧ୍ୟରୁ ୩୨ଟିରେ ବୃଦ୍ଧି ଏବଂ ୧୮ଟିରେ ହ୍ରାସ ଘଟିଛି । ରିୟଲିଟି କ୍ଷେତ୍ର ସବୁଠୁ ଅଧିକ ୧.୪୭% ବୃଦ୍ଧି ସହିତ ବନ୍ଦ ହୋଇଥିବା ଜଣାପଡ଼ିଛି ।
