ଜଗତସିଂହପୁର, ୨୩/୦୩: କିଛି ଦିନର ହଟଚମଟ ଉପରେ ପୂର୍ଣ୍ଣଚ୍ଛେଦ ପଡ଼ିଛି । ଏବଂ ସ୍ଥାନୀୟ ମାର୍କଣ୍ଡପୁର ଅଞ୍ଚଳର ଏକ ପରିବାର ବୋହୂ ରୂପରେ ଜଣେ ଯୁବତୀଙ୍କୁ ଗ୍ରହଣ କରି ନେଇଛନ୍ତି । ଜଗତସିଂହପୁର ପୁଲିସ ଉପସ୍ଥିତିରେ ଏବଂ ତେରିମେରି କାହାନୀ ସ୍ୱେଚ୍ଛାସେବୀ ସଂସ୍ଥାର ହସ୍ତକ୍ଷେପ ପରେ ବିବାଦର ସମାଧାନ ହୋଇଛି ।
ଗତ ଜାନୁଆରୀ ମାସରେ ଜଗତସିଂହପୁର ଥାନାରେ ଫେରାଦ ହୋଇଥିଲେ କେନ୍ଦୁଝର ଜିଲ୍ଲା ବ୍ରାହ୍ମଣୀପାଳ ଅଞ୍ଚଳର ଜଣେ ଯୁବତୀ । ଅଭିଯୋଗ ଥିଲା, ମାର୍କଣ୍ଡପୁର ଅଞ୍ଚଳର ଜଣେ ଓଏଏସ୍ ଅଫିସର ଗତ କିଛି ବର୍ଷ ତଳେ ତାଙ୍କୁ ବିବାହ କରିଥିଲେ । ଉଭୟ ପରସ୍ପରକୁ ଭଲପାଇ ବିବାହ ବନ୍ଧନରେ ଆବଦ୍ଧ ହୋଇଥିଲେ । ବିବାହ ସମୟରେ ଅବଶ୍ୟ ଏହି ଯୁବକ ଓଏଏସ୍ ପାଇନଥିଲେ । କିନ୍ତୁ ସଂପୃକ୍ତ ଯୁବକ ତାଙ୍କ ସହ ଶାରୀରିକ ସଂପର୍କ ରଖିଥିଲେ । ତିନି ଥର ବଳପୂର୍ବକ ଗର୍ଭ ନଷ୍ଟ କରିଛନ୍ତି । ବିବାହ କରିବା ସତ୍ତେ୍ୱ ଏବଂ ଓଏଏସ୍ ଅଫିସର ହେବା ପରେ ନିଜର ଘରେ ପୂରାଉ ନାହାଁନ୍ତି । ଏଣେ ବିବାହ କରିଥିବା ଜଣାପଡ଼ିବା ପରେ ଉଭୟ ପରିବାର ଶାନ୍ତିରେ ରଖାଇ ଦେଉ ନାହାନ୍ତି । ଏମିତିକି ବାପା ଓ ସାବତ ମା’ ମୋର ଶାଶୂ, ଶ୍ୱଶୁରଙ୍କଠାରୁ କିଛି ଟଙ୍କା ନେଇଛନ୍ତି । ସାବତ ମା’ ମଧ୍ୟ ମାରଧର କରନ୍ତି ବୋଲି ଜଗତସିଂହପୁର ଥାନାକୁ ଲିଖିତ ଭାବେ ଜଣାଇଥିଲେ ସଂପୃକ୍ତା ୨୨ ବର୍ଷୀୟା ଅଭିଯୋଗକାରିଣୀ ।
ଶନିବାର ନ୍ୟାୟ ନିମନ୍ତେ ପୀଡ଼ିତା ଯୁବତୀ ଜଗତସିଂହପୁର ଥାନାରେ ପହଞ୍ଚିଥିଲେ । ପୁଲିସ ଯୁବତୀଙ୍କ ଦାବି ଅନୁସାରେ ତାଙ୍କ ଶାଶୁ, ଶ୍ୱଶୁର ଓ ବନ୍ଧୁ ପରିଜନଙ୍କୁ ଡକାଇଥିଲେ । ଶେଷରେ ଉକ୍ତ ଘଟଣାର ସମାଧାନ ହୋଇଥିଲା । ଏବଂ ଓଏଏସ୍ ଚାକିରି ପାଇ ଅନ୍ୟ ଜିଲ୍ଲାରେ ପୁଅ ତାଲିମରେ ଥିବାରୁ ବର୍ତ୍ତମାନ ସମୟରେ ଯୁବତୀ ତଥା ବୋହୂ ମାର୍କଣ୍ଡପୁର ଘରେ ରହିବାକୁ ନିଷ୍ପତ୍ତି ହୋଇଥିଲା ।
ପୁଲିସ ସୂଚନା ମୁତାବକ, ଯୁବତୀଙ୍କ ଦାବି ରହିଥିଲା ଶାଶୁ, ଶ୍ୱଶୁର ତାଙ୍କ ବୋହୂ ଭାବେ ଗ୍ରହଣ କରିନିଅନ୍ତୁ । ଏହା ପୂର୍ବରୁ ମଧ୍ୟ ଯୁବତୀ ଜଣଙ୍କ ଜଗତସିଂହପୁର ଥାନାରେ ମୌଖିକ ଅଭିଯୋଗ ଆଣିଥିଲେ । ସେତେବେଳେ ଉଭୟ ପକ୍ଷଙ୍କ ଭିତରେ ଆପୋଷ ସମାଧାନ ହୋଇଥିଲା । ପରେ ଯୁବତୀ ଯାଜପୁର ଜିଲ୍ଲାର ଏକ କୋର୍ଟଙ୍କ ଦ୍ୱାରସ୍ଥ ହୋଇଥିଲେ, ଯାହାକି ବିଚାରଧିନ ରହିଛି । ଏବଂ ଗତ ଜାନୁଆରୀ ମାସରେ ପୁଣି ଏକ ଏତଲା ଜଗତସିଂହପୁର ଥାନାକୁ ପ୍ରଦାନ କରିଥିଲେ ।
