କଟକ, ୨୪/୦୩: ଭାରତୀୟ କ୍ରିକେଟରଙ୍କୁ ଘରୋଇ କ୍ରିକେଟ ଖେଳିବାକୁ ବିସିସିଆଇ ନିୟମ କରିଛି । କିନ୍ତୁ ଓଡ଼ିଶାର ସିନିୟର କ୍ରିକେଟରମାନେ କଳାହାଣ୍ଡି କପ୍ ଭଳି ରାଜ୍ୟର ମୁଖ୍ୟ ଘରୋଇ ଟୁର୍ଣ୍ଣାମେଣ୍ଟ ଖେଳୁନାହାନ୍ତି । ଓଡ଼ିଶା କ୍ରିକେଟ ଆସୋସିଏସନ୍(ଓସିଏ) ଏଭଳି ନିୟମ ଜାରି କରିଛି । ସିନିୟର ଓ ୨୩ ବର୍ଷରୁ କମ୍ ରାଜ୍ୟ ଦଳର ଖେଳାଳି ମାନେ କଳାହାଣ୍ଡି କପ୍ ନଖେଳି ବିଶ୍ରାମ ନେଉଛନ୍ତି । ବିସିସିଆଇ ସିଜନ୍ ଲାଗି ଖେଳାଳିମାନଙ୍କୁ ନେଇ ଶିବିର ମାଧ୍ୟମରେ ସ୍ୱତନ୍ତ୍ର ପ୍ରଶିକ୍ଷଣ ଦେବାର ବ୍ୟବସ୍ଥା କରିବାକୁ ଓସିଏ ଚିନ୍ତା କରୁଛି । କିନ୍ତୁ ଶିବିର ବଦଳରେ ଅନ୍ଫିଲ୍ଡ କ୍ରିକେଟ ଖେଳିଲେ ଯେ କ୍ରିକେଟରଙ୍କ ଖେଳଶୈଳୀର ଅଧିକ ବିକାଶ ହେବ ଏକଥା ଓସିଏ ଜାଣିରଖିବା ଉଚିତ୍ । ଏହାପରେ ବି ୨୩ବର୍ଷରୁ କମ୍ ଓ ସିନିୟର ଖେଳାଳିଙ୍କୁ କାହିଁକି ବିଶ୍ରାମ ଦିଆଯାଇଛି ତାକୁ ନେଇ ପ୍ରଶ୍ନ ଉଠୁଛି ।
ଅନ୍ୟପକ୍ଷରେ ଚଳିତବର୍ଷ ଓସିଏର ନିର୍ବାଚନୀ ବର୍ଷ । ଅକ୍ଟୋବର ମାସ ବେଳକୁ ନିର୍ବାଚନ ହେବ । ନୂଆ କାର୍ଯ୍ୟକର୍ତ୍ତା ଦାୟିତ୍ୱ ଗ୍ରହଣ କରିବେ। କୁଲିଂ ଅଫ୍ ପିରିୟଡ୍ ବ୍ୟବସ୍ଥା କାର୍ଯ୍ୟକାରୀ ହେଲେ ବର୍ତ୍ତମାନର କାର୍ଯ୍ୟକର୍ତ୍ତା ମଣ୍ଡଳୀ ସମ୍ପୂର୍ଣ୍ଣ ଭାବେ ବଦଳିଯିବେ । ଭୋଟ୍ ଭାଗମାପକୁ ନେଇ ଏଥର ଗଣିତ ଜଟିଳ ରହିଛି । ତେଣୁ ନିର୍ବାଚନ ପୂର୍ବରୁ ଜିଲ୍ଲା ଭୋଟରଙ୍କୁ ସନ୍ତୁଷ୍ଟ କରିବାକୁ ଶେଷ ବାଟ ହେଉଛି ‘କଳାହାଣ୍ଡି କପ୍’ । ଜିଲ୍ଲା ଟିମ୍ରେ ଖେଳାଳିଙ୍କୁ ସାମିଲ୍ କରି ଜିଲ୍ଲା ସଂଘକୁ ମନାଇ ରଖିବାକୁ ଅଧିକ ଗୁରୁତ୍ୱ ଦିଆଯାଉଥିବାର ଦେଖିବାକୁ ମିଳୁଛି । ତେଣୁ ଜିଲ୍ଲା ଭୋଟରଙ୍କୁ ସନ୍ତୁଷ୍ଟ କରିବାକୁ ସିନିୟର ଖେଳାଳିଙ୍କୁ କଳାହାଣ୍ଡି କପ୍ରୁ ବିଶ୍ରାମ ଦେବାକୁ ନୂଆ ନୀତି ଓସିଏ ଜାରି କରିଥିବା ଅଭିଯୋଗ ହେଉଛି ।
ସବୁ ଜିଲ୍ଲାରୁ ଅଧିକରୁ ଅଧିକ ଖେଳାଳି କିଭଳି ଖେଳିବେ ସେ ଦିଗରେ ଗୁରୁତ୍ୱ ଦିଆଯାଉଛି । କିନ୍ତୁ ଇଷ୍ଟ କୋଷ୍ଟ୍ ରେଲୱେ(ଇକୋର୍ଷା) କ୍ଷେତ୍ରରେ ଏ ନିୟମ ଲାଗୁ ହେଉନି । ଯେଉଁଠି ଅନ୍ୟ ଜିଲ୍ଲାରୁ ଖେଳି ଆସୁଥିବା ୨୩ବର୍ଷରୁ କମ୍ ଓ ସିନିୟର ଖେଳାଳି ମାନେ କଳାହାଣ୍ଡି କପ୍ ଖେଳୁନାହାନ୍ତି ସେଠି ଇକୋର୍ଷାର ପେସ୍ ବୋଲର ସୂର୍ଯ୍ୟକାନ୍ତ ପ୍ରଧାନ ଓ ରାଜେଶ ମହାନ୍ତି ଦଳ ତରଫରୁ ପଡିଆକୁ ଓହ୍ଲାଉଛନ୍ତି । ଇକୋର୍ଷା କ୍ଷେତ୍ରରେ ଏଭଳି ନିୟମ କୋହଳ କାହିଁକି ତାକୁ ନେଇ ଆପତ୍ତି ଉଠିଛି ।
