ଭୁବନେଶ୍ୱର ୨୯/୦୬: ଯାଜପୁରର କୋରେଇ ଆସନରୁ ବିଧାୟକ ଭାବେ ନିର୍ବାଚିତ ହେବା ପରେ ସିନେମାରେ ଆଉ ବିଶେଷ ଦେଖିବାକୁ ମିଳୁ ନାହାନ୍ତି ଆକାଶ ଦାସ ନାୟକ । କିନ୍ତୁ ଆକାଶଙ୍କ ପ୍ରଶଂସକଙ୍କ ପାଇଁ ଗୋଟିଏ ଖୁସି ଖବର ଯେ, ବେଶ୍ କିଛି ଦିନର ବିରତି ପରେ ରୁପେଲି ପରଦାକୁ ଫେରୁଛନ୍ତି ଆକାଶ । ଆକାଶଙ୍କ ଅପ୍କମିଂ ଫିଲ୍ମର ନାଁ ରହିଛି ‘ଜୟହିନ୍ଦ୍’ । ସୁଟିଂ ଶେଷ ହେବା ପରେ ବର୍ତ୍ତମାନ ଏ ଫିଲ୍ମର ପୋଷ୍ଟ ପ୍ରଡକ୍ସନ କାମ ଚାଲିଛି । ଖୁବ୍ ଶୀଘ୍ର ଫିଲ୍ମଟି ସିନେମାଘରକୁ ଆସିବ ।
ଶୁଭଶ୍ରୀ ଫିଲ୍ମସ୍ ବ୍ୟାନରରେ ନିର୍ମାଣାଧୀନ ଏହି ଚଳଚ୍ଚିତ୍ରର ପ୍ରଯୋଜନା କରିଛନ୍ତୁ ଶୁଭଶ୍ରୀ ମଙ୍ଗରାଜ। ନିର୍ଦ୍ଦେଶନା ଦେଇଛନ୍ତି ଅଭିଷେକ ତ୍ରିପାଠୀ । ଅଙ୍କିତ, ଅନନ୍ୟା, ଅନୁ ଚୌଧୁରୀ, କେକେ ଓ ରାଜା ଫିଲ୍ମର ଗୁରୁତ୍ୱପୂର୍ଣ୍ଣ ଚରିତ୍ରରେ ନଜର ଆସିବେ । ଫିଲ୍ମର କାହାଣୀ ମୌଳିକ ଓ ବର୍ତ୍ତମାନ ସମୟର ଘଟଣା ଉପରେ ଆଧାରିତ ବୋଲି ପ୍ରଯୋଜନା ସଂସ୍ଥା ପକ୍ଷରୁ କୁହାଯାଇଛି । ସୂଚନାଯୋଗ୍ୟ, ‘କଳିଙ୍ଗ ପୁତ୍ର’ରୁ ଓଲିଉଡରେ ଅଭିନୟ ଯାତ୍ରା ଆରମ୍ଭ କରିଥିବା ଆକାଶ ‘ସତ୍ୟମେବ ଜୟତେ’, ‘ଶତ୍ରୁ ସଂହାର’, ‘ଶୁଭ ବିବାହ’, ‘ଆଲୋ ମୋର କଣ୍ଢେଇ’, ‘ଶପଥ’, ‘ଧର୍ମ’, ‘ହରି ଓମ୍ ହରି’, ‘ଅଗସ୍ତ୍ୟ’ ଓ ‘ଜଷ୍ଟ ମୋହବତ୍’ ସିନେମାରେ ଅଭିନୟ କରିଛନ୍ତି । ଶେଷଥର ପାଇଁ ସେ ‘ମହାବାହୁ’ ଚଳଚ୍ଚିତ୍ରରେ ଦେଖିବାକୁ ମିଳିଥିଲେ ।
