କଟକ: ବିଶିଷ୍ଟ ସାହିତ୍ୟିକ ଶୈଳଜ ରବି ପାଇବେ ‘ସାହିତ୍ୟ ଭାରତୀ ସମ୍ମାନ’ । ୨୦୨୪ ପାଇଁ ଶୈଳଜ ରବିଙ୍କୁ ମିଳିବ ଏହି ସମ୍ମାନ । ତେବେ ଶୈଳଜ ରବିଙ୍କୁ ଉପଢୌକନ ଦେଇ ସମ୍ମାନିତ କରାଯିବାକୁ ଥିବା ବେଳେ ପୁରସ୍କାର ରାଶି ବାବଦରେ ତାଙ୍କୁ ୧ ଲକ୍ଷ ଟଙ୍କା ପ୍ରଦାନ କରାଯିବ । ୨୦୨୪ ବର୍ଷ ପାଇଁ ସମ୍ମାନଜନକ ପୁରସ୍କାର ‘ସାହିତ୍ୟ ଭାରତୀ ସମ୍ମାନ’ ପାଇବେ ଶୈଳଜ ରବି ।  ସାହିତ୍ୟ ଭାରତୀ ସମ୍ମାନ ପ୍ରତିବର୍ଷ ଗଙ୍ଗାଧର ରଥ ଫାଉଣ୍ଡେସନ ତରଫରୁ ସାହିତ୍ୟ କୃତି ପାଇଁ ସାରସ୍ୱତ ବ୍ୟକ୍ତିବିଶେଷଙ୍କୁ ପ୍ରଦାନ କରାଯାଏ । ଏହି ପୁରସ୍କାର ୧୯୯୫ ମସିହାରୁ ପ୍ରଦାନ କରାଯାଉଛି । ପୁରସ୍କାରରେ କୋଣାର୍କ ମନ୍ଦିରର ଏକ ରୌପ୍ୟ ପ୍ରତିମୂର୍ତ୍ତୀ ସହିତ ଏକ ଲକ୍ଷ ଟଙ୍କା ପ୍ରଦାନ କରାଯିବାର ପରମ୍ପରା ରହିଛି ।

ରବୀନ୍ଦ୍ରନାଥ ସାହୁ, ଶୈଳଜ ରବି ଭାବେ ଜଣାଶୁଣା  । ସେ ଜଣେ ଓଡ଼ିଆ ସାହିତ୍ୟିକ ଓ ସର୍ବୋଦୟ କର୍ମୀ । ସେ ଓଡ଼ିଆରେ କବିତା ଓ ନନ୍ଦନତତ୍ତ୍ୱ, ଲୋକବିଦ୍ୟା, ସାହିତ୍ୟତତ୍ତ୍ୱ ଓ କଳା ସଂପର୍କିତ ତୁଳନାତ୍ମକ ଓ ଆନ୍ତର୍ବିଦ୍ୟାଭିତ୍ତିକ ପ୍ରବନ୍ଧ ଆଦି ରଚନା କରିଛନ୍ତି । ସେ ୨୦୦୨ ମସିହାରେ ଓଡ଼ିଶା ସାହିତ୍ୟ ଏକାଡେମୀ ପୁରସ୍କାର ପାଇ ପ୍ରତ୍ୟାଖାନ କରିଥିଲେ । ସେ ଓଡ଼ିଆରେ ଐକତାନ ଓ ଇଂରାଜୀରେ Parents & Pedagogues ନାମକ ପତ୍ରିକା ସମ୍ପାଦନା କରିଛନ୍ତି । ଜଣେ ଚିତ୍ରଶିଳ୍ପୀ ଭାବେ ସେ ଅନେକ ପୁସ୍ତକର ପ୍ରଚ୍ଛଦ ଆଙ୍କିଛନ୍ତି । 

ସମ୍ମାନିତ ସାହିତ୍ୟିକ

୧୯୯୫- ମନୋଜ ଦାସ

୧୯୯୬- ସଚ୍ଚିଦାନନ୍ଦ ରାଉତରାୟ

୧୯୯୭- ବେଣୀମାଧବ ପାଢ଼ୀ

୧୯୯୮- ନନ୍ଦିନୀ ଶତପଥୀ

୧୯୯୯ - ଚିତ୍ତରଞ୍ଜନ ଦାସ

୨୦୦୦ - ପଠାଣି ପଟ୍ଟନାୟକ

୨୦୦୧ - ବୀଣାପାଣି ମହାନ୍ତି

୨୦୦୨ - ବ୍ରଜନାଥ ରଥ

୨୦୦୩- ଶାନ୍ତନୁ କୁମାର ଆଚାର୍ଯ୍ୟ

୨୦୦୪- ରାଜେନ୍ଦ୍ର କିଶୋର ପଣ୍ଡା

୨୦୦୫- ମହାପାତ୍ର ନୀଳମଣି ସାହୁ

୨୦୦୬- ରମାକାନ୍ତ ରଥ

୨୦୦୭- ବିଭୂତି ପଟ୍ଟନାୟକ

୨୦୦୮ - ସୌଭାଗ୍ୟ କୁମାର ମିଶ୍ର

୨୦୦୯- କୃଷ୍ଣଚରଣ ବେହେରା

୨୦୧୦- ସୀତାକାନ୍ତ ମହାପାତ୍ର

୨୦୧୧- ଚନ୍ଦ୍ରଶେଖର ରଥ

୨୦୧୨- ଜାନକୀ ବଲ୍ଲଭ ପଟ୍ଟନାୟକ

୨୦୧୩- ପ୍ରତିଭା ଶତପଥୀ

୨୦୧୪- ରବି ସିଂ 

୨୦୧୫- ପ୍ରତିଭା ରାୟ

୨୦୧୬- ରତ୍ନାକର ଚଇନି

୨୦୧୭- ସାତକଡ଼ି ହୋତା

୨୦୧୮ - ଶରତ ଚନ୍ଦ୍ର ପ୍ରଧାନ

୨୦୨୦ - ରମେଶ ପ୍ରସାଦ ପାଣିଗ୍ରାହୀ

୨୦୨୧ - ଦେବଦାସ ଛୋଟରାୟ

(ଉପରୋକ୍ତ ତଥ୍ୟ ସାମଜିକ ଗଣମାଧ୍ୟମରୁ ନିଆଯାଇଛି)

ଗଙ୍ଗାଧର ରଥ ଫାଉଣ୍ଡେସନ ଦ୍ବାରା ଦିଆଯାଉଛି ‘ସାହିତ୍ୟ ଭାରତୀ ସମ୍ମାନ’ । ୧୯୯୫ରୁ ଦୀର୍ଘ ୩୦ ବର୍ଷ ଧରି ଓଡ଼ିଆ ସାହିତ୍ୟକୁ ନୂଆ ଦିଗ ଦେଇଥିବା ବିଶିଷ୍ଟ ସାହିତ୍ୟିକଙ୍କୁ ସମ୍ମାନିତ କରିବା ଲାଗି ନିରନ୍ତର କାର୍ଯ୍ୟ କରିଆସିଛି ଏହି ଫାଉଣ୍ଡେସନ୍‌ ।  ଏଥର ‘ସାହିତ୍ୟ ଭାରତୀ ସମ୍ମାନ’ରେ ସମ୍ମାନିତ ହେବାକୁ ଯାଉଛନ୍ତି ସାହିତ୍ୟିକ ଶୈଳଜ ରବି ।