ନୂଆଦିଲ୍ଲୀ: ଆମେରିକାର ଘରୋଇ ମହାକାଶ ଅଭିଯାନକୁ ଶକ୍ତ ଆଘାତ ଲାଗିଛି । ପୃଥିବୀ ପୃଷ୍ଠରୁ ୩ ଲକ୍ଷ କିଲୋମିଟର ଉଚ୍ଚକୁ ଯିବା ପରେ ସ୍ପେଶକ୍ରାଫ୍ଟ ସହ ଯୋଗାଯୋଗ ବିଚ୍ଛିନ୍ନ ହୋଇଯାଇଛି । ମହାକାଶ ଗବେଷଣା କ୍ଷେତ୍ରରେ ମାଇଲ ଷ୍ଟୋନ୍ ସ୍ଥାପନ କରିବାକୁ ଆରମ୍ଭ ହୋଇଥିବା ଏହି ଅଭିଯାନ ବିଫଳ ହୋଇଥିବାରୁ ବୈଜ୍ଞାନିକ ନିରାଶ ହୋଇଛନ୍ତି । ମହାକାଶ ଗବେଷଣାର ସୀମାକୁ ଆଗକୁ ବଢ଼ାଇବା ପାଇଁ ଡିଜାଇନ୍ କରାଯାଇଥିବା ଏକ ଘରୋଇ ମହାକାଶ ମିଶନ୍ ଉତକ୍ଷେପଣର କିଛି ଘଣ୍ଟା ପରେ ବଡ଼ ଯାନ୍ତ୍ରିକ ବିଫଳତାର ସମ୍ମୁଖୀନ ହୋଇଛି । ଆଷ୍ଟ୍ରୋଫୋର୍ଜ ଦ୍ୱାରା ପରିଚାଳିତ ଓଡିନ୍ ମହାକାଶଯାନ ଭବିଷ୍ୟତର ଗ୍ରହାଣୁରେ ଖନନ କାର୍ଯ୍ୟ ପାଇଁ ପଥ ପ୍ରସ୍ତୁତ କରିବାକୁ ନିଜର ଯାତ୍ରା ଆରମ୍ଭ କରିଥିଲା । କିନ୍ତୁ ଏକ ଅପ୍ରତ୍ୟାଶିତ ତ୍ରୁଟି ଯୋଗୁଁ ପୃଥିବୀଠାରୁ ୩ ଲକ୍ଷ କିଲୋମିଟର ଦୂରରେ ହଜିଯାଇଛି ଏହି ସ୍ପେଶକ୍ରାଫ୍ଟ ।
ଏବେ ଏହି ମହାକାଶଯାନ ସହ ଯୋଗାଯୋଗ ସ୍ଥାପନ ହୋଇପାରୁ ନାହିଁ । ଫେବୃଆରୀ ୨୬ ତାରିଖରେ ସ୍ପେସଏକ୍ସର ଫାଲକନ୍ ୯ ରକେଟ୍ ମାଧ୍ୟମରେ ଉତକ୍ଷେପଣ କରାଯାଇଥିବା ଓଡିନ୍ ଆଷ୍ଟରଏଡ୍ ୨୦୨୨ OB5 ଅଭିମୁଖେ ଯାତ୍ରା ଭରିଥିଲା । ମହାକାଶଯାନର ଲକ୍ଷ୍ୟ ଥିଲା, ଗ୍ରହାଣୁର ପ୍ରତିଛବି କଏଦ କରିବା । ଏହା ଦ୍ବାରା ଆଷ୍ଟ୍ରୋଫୋର୍ଜନର ପରବର୍ତ୍ତୀ ମିଶନ ଭେଷ୍ଟ୍ରି ପାଇଁ ଏହା ସହାୟକ ହୋଇଥାନ୍ତା । ଭେଷ୍ଟ୍ରି ମିଶନ୍ ସାହାଯ୍ୟରେ ଆଷ୍ଟ୍ରଏଡ୍ରୁ ପ୍ଲାଟିନମ୍ ଶ୍ରେଣୀର ଖଣିଜ ଖନନ କରିବାକୁ ଲକ୍ଷ୍ୟ ରଖାଯାଇଛି ।
ସବୁକିଛି ସୁରୁଖୁରୁରେ ଚାଲୁଥିବା ପରି ମନେ ହେଉଥିଲା । ଫାଲକନ୍ ୯ରୁ ଅଲଗା ହେବାର କିଛି ସମୟ ପରେ, ଓଡିନ୍ ସହିତ ଯୋଗାଯୋଗ ବିଚ୍ଛିନ୍ନ ହୋଇଯାଇଥିଲା । ପ୍ରଥମ ଚାରି ଘଣ୍ଟା ପାଇଁ, କୌଣସି ନିର୍ଦ୍ଦେଶ ମିଳିଲା ନାହିଁ ଏବଂ କୌଣସି ତଥ୍ୟ ପ୍ରେରଣ ହୋଇପାରି ନଥିଳା । ଯେତେବେଳେ ଆଷ୍ଟ୍ରୋଫୋର୍ଜ ଇଞ୍ଜିନିୟରମାନେ ମହାକାଶ ଯାନର ପାୱାର ଆମ୍ପ୍ଲିଫାୟର କାମ କରୁଛି କି ନାହିଁ ତାହା ନିର୍ଣ୍ଣୟ କରିବାକୁ ଚେଷ୍ଟା କଲେ, ପରିସ୍ଥିତି ଆହୁରି ଖରାପ ହୋଇଗଲା । ତା’ପରେ AmSat ଏକ ଆମେଚର ସାଟେଲାଇଟ୍ ନେଟୱାର୍କ ଓଡିନ୍ ଠାରୁ ଏକ ୧୩-ସେକେଣ୍ଡର ସିଗନାଲ ପାଇଥିଲା । ଏଥିରୁ ପ୍ରମାଣ ମିଳିଲା ଯେ, ମହାକାଶଯାନଟି ଏପର୍ଯ୍ୟନ୍ତ କାର୍ଯ୍ୟକ୍ଷମ ଅଛି ଏବଂ ଏହାର ସୌର ପ୍ୟାନେଲଗୁଡ଼ିକ ଚାର୍ଜ ହେଉଛି । କିନ୍ତୁ କିଛି ସମୟ ପରେ ଏହି ସିଗନାଲ୍ ବି ମିଳିନଥିଲା । ଆଷ୍ଟ୍ରୋଫୋର୍ଜ ତଥ୍ୟ ବିଶ୍ଳେଷଣ କରିବା ବେଳକୁ, ମହାକାଶଯାନ ସହ ଯୋଗାଯୋଗ ସଂପୂର୍ଣ୍ଣ ବିଛିନ୍ନ ହୋଇଯାଇଥିଲା ।
ଯୋଗାଯୋଗ ବିଚ୍ଛିନ୍ନ ହେବା ପରେ ଓଡିନ୍ ମହାକାଶଯାନ ଏବେ ଆହୁରି ଦୂରକୁ ଚାଲିଯାଇଛି ବୋଲି କୁହାଯାଉଛି । ଆଷ୍ଟ୍ରୋଫୋର୍ଜ ଏବେ ବି ଯୋଗାଯୋଗ କରିବାକୁ ଚେଷ୍ଟା କରୁଛି । ବୈଜ୍ଞାନିକମାନେ ଆଶା କରୁଛନ୍ତି ଯେ, ମହାକାଶଯାନ ଘୂର୍ଣ୍ଣନ ହେବା ସହିତ ଶେଷରେ ଶକ୍ତି ହାସଲ କରିବା ସହ ପୁଣି ଥରେ ଯୋଗାଯୋଗ ସ୍ଥାପନ ହୋଇପାରେ । ଦୁଃଖଦ ହୁଏତ ଏହି ମହତ୍ୱାକାଂକ୍ଷୀ ମିଶନ ବିଫଳତାରେ ଶେଷ ହୋଇପାରେ ତଥାପି ଆଷ୍ଟ୍ରୋଫୋର୍ଜର ଗ୍ରହାଣୁରେ ଖନନ ସ୍ୱପ୍ନ ଶେଷ ହୋଇନାହିଁ ।
