ଭୁବନେଶ୍ୱର,୦୭/୦୩: ରଣହୁଙ୍କାର ଛାଡ଼ିବ ବିଜୁ ଜନତା ଦଳ । ବିଜୁବାବୁଙ୍କୁ ପ୍ରସଙ୍ଗ କରି ସରକାରଙ୍କୁ ଘେରିବ । ଧାନ ମଣ୍ଡିରେ ଅବ୍ୟବସ୍ଥା, ଆଇନଶୃଙ୍ଖଳା, ପଞ୍ଚାୟତିରାଜ ଦିବସରେ ବିଜୁ ବାବୁଙ୍କ ଜୟନ୍ତୀ ପାଳନ ନକରିବା ଆଦି ପ୍ରସଙ୍ଗରେ ଶାଣିତ ଆକ୍ରମଣ କରିବ । ଶାସକ ବିଜେପି ବି ପାଲଟା ଆକ୍ରମଣ କରିବ । ଆତ୍ମରକ୍ଷା ବଦଳରେ ଦଳ ପୂରା ଆକ୍ରମଣ ମୁଦ୍ରାରେ ରହିବ । ୨୪ ବର୍ଷରେ ବିଜୁଙ୍କ ପାଇଁ କ’ଣ କରିଛ ବୋଲି ପ୍ରଶ୍ନ କରି ବିଜେଡିକୁ କାଠଗଡ଼ାରେ ଛିଡ଼ା କରାଇବ । କଂଗ୍ରେସ ମଧ୍ୟ ବିଜୁ, ମହିଳା ହିଂସା ଓ ଚାଷୀ ପ୍ରସଙ୍ଗରେ ସରକାରଙ୍କୁ ମାଗିବ ଜବାବ ।
ଆଜିଠୁ ଆରମ୍ଭ ହେବ ବିଧାନସଭା ବଜେଟ୍ ଅଧିବେଶନର ଦ୍ୱିତୀୟ ପର୍ଯ୍ୟାୟ । କାର୍ଯ୍ୟସୂଚୀ ଅନୁଯାୟୀ ଏହା ଏପ୍ରିଲ୍ ୫ ପର୍ଯ୍ୟନ୍ତ ଚାଲିବ । ଏହି ଅଧିବେଶନ କାଳରେ ଖର୍ଚ୍ଚଦାବି ନେଇ ଆଲୋଚନା ସହିତ ବ୍ୟୟ ମଞ୍ଜୁରୀ ବିଧେୟକ ପାରିତ ହେବାର କାର୍ଯ୍ୟକ୍ରମ ରହିଛି । ବିଜୁଙ୍କୁ ନେଇ ରାଜ୍ୟ ରାଜନୀତି ଏବେ ତତଲା ରହିଛି । ବିଜୁ ଜୟନ୍ତୀରେ ୩୦ ବର୍ଷ ହେବ ପଞ୍ଚାୟତିରାଜ ଦିବସ ପାଳିତ ହୋଇ ଆସୁଥିଲା । ମାତ୍ର ହଠାତ୍ ରାଜ୍ୟ ସରକାର ଏହାକୁ ବନ୍ଦ କରି ଏପ୍ରିଲ ୨୪କୁ ଘୁଞ୍ଚାଇ ଦେଇଛନ୍ତି । ସରକାରୀ ଛୁଟି ବି ବାତିଲ କରାଗଲା । ଏହାକୁ ନେଇ ବିଜୁ ଜନତା ଦଳ ରାଗରେ ନିଆଁବାଣ । ଶାସକ ବିଜେପି ଓ ବିରୋଧୀ ବିଜେଡି ଏବେ ମୁହାଁମୁହିଁ ଅବସ୍ଥାରେ ଅଛନ୍ତି ।
ଶଙ୍ଖ ଭବନରେ ବିଜୁ ଜୟନ୍ତୀରେ ଶ୍ରଦ୍ଧାଞ୍ଜଳି ଜଣାଇ ଦଳର ସଭାପତି ତଥା ବିରୋଧୀ ଦଳ ନେତା ନବୀନ ପଟ୍ଟନାୟକ ରାଜ୍ୟ ସରକାରଙ୍କୁ କଠୋର ସମାଲୋଚନା କରିଛନ୍ତି । ସରକାର ଆସିବ ଓ ଯିବ । ବିଜୁ ବାବୁ କିନ୍ତୁ ସବୁଦିନ ପାଇଁ ଆମ ସମସ୍ତଙ୍କ ହୃଦୟରେ ଅଛନ୍ତି । ପଞ୍ଚାୟତିରାଜ ଦିବସ ବନ୍ଦ କରି କ’ଣ ବିଜୁଙ୍କ ଲିଗାସୀ ବନ୍ଦ କରିପାରିବ? ସରକାରକୁ ଏମିତି ପାଲଟା ପ୍ରଶ୍ନ କରିଛନ୍ତି ନବୀନ । ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ରାଜ୍ୟସ୍ତରୀୟ ବିଜୁ ଜୟନ୍ତୀରେ ବିଜେଡିକୁ କାଠଗଡ଼ାରେ ଛିଡ଼ା କରାଇ କହିଛନ୍ତି, ୨୪ ବର୍ଷରେ କ’ଣ କରିଛ? ବିଜୁଙ୍କ ସ୍ୱପ୍ନ ସାକାର କରିବାକୁ ଆମ ସରକାର କାମ ଆରମ୍ଭ କରିଛି । ତୁମେ ଖାଲି ଭୋଟବ୍ୟାଙ୍କ ରାଜନୀତି ପାଇଁ ବିଜୁଙ୍କ ନାଁ ନେଉଥିଲ । ପଞ୍ଚାୟତିରାଜ ଦିବସ ତାରିଖ ବଦଳାଇବା ପ୍ରତିବାଦରେ ସାରା ରାଜ୍ୟରେ ବିଜେଡି ଗୁରୁବାର ଆନ୍ଦୋଳନକୁ ଓହ୍ଳାଇଥିଲା । ବିଜେଡି ଓ ବିଜେପି ନେତାଙ୍କ ମଧ୍ୟରେ ଆକ୍ଷେପ, ପ୍ରତିଆକ୍ଷେପ ବଢ଼ି ଚାଲିଛି । ବିଧାନସଭାରେ ଏହାର ପ୍ରତିଫଳନ ଦେଖିବାକୁ ମିଳିବ ।
କଂଗ୍ରେସ ମଧ୍ୟ ସରକାରଙ୍କୁ ବିଭିନ୍ନ ପ୍ରସଙ୍ଗରେ ଘେରାବନ୍ଦୀ କରିବ । ଭକ୍ତ ଚରଣ ଦାସ ଦଳର ନୂଆ ପିସିସି ସଭାପତି ହେବା ପରେ କଂଗ୍ରେସ ଏବେ ଆକ୍ସନ ମୋଡ୍ରେ । ୮ ମାସରେ ୧୬୦୦ ମହିଳା ବିରୋଧୀ ହିଂସା ଓ ୫୪ ଗଣ ବଳାତ୍କାର ପ୍ରସଙ୍ଗରେ ଦଳ ସରକାରଙ୍କୁ ଜବାବ ମାଗିବ । କଳା ତାଲିକାଭୁକ୍ତ ସଂସ୍ଥାକୁ ଅଗ୍ନିଶମ ଷ୍ଟେସନ ଅଫିସର, ପୁଲିସ ଏସଆଇ ଓ ସହକାରୀ ଜେଲର ପରୀକ୍ଷା ପରିଚାଳନା ଭାର ଦେଇ ସରକାର ଚାକିରି ବିକ୍ରିରେ ମାତିଛନ୍ତି ବୋଲି ଅଭିଯୋଗ ଆଣିବ ଦଳ । ଏହାଛଡ଼ା ଧାନମଣ୍ଡିରେ ଚାଷୀ ଶୋଷଣ, ଇ କେୱାଇସି ଆଳରେ ସରକାର ଲକ୍ଷ ଲକ୍ଷ ଗରିବ ପରିବାରର ରାସନ କାର୍ଡ କାଟୁଥିବାରୁ ଦଳ ଏହାକୁ ଅସ୍ତ୍ର କରି ଜୋରଦାର ଆକ୍ରମଣ କରିବାକୁ ସ୍ଥିର କରିଛି । ତାଜା ପ୍ରସଙ୍ଗକୁ ଧରି ବଜେଟ୍ ଅଧିବେଶନର ଦ୍ୱିତୀୟ ପର୍ଯ୍ୟାୟ ବେଶ ସରଗରମ ହେବ ।
ବିଧାନସଭା କାର୍ଯ୍ୟସୂଚୀ ଅନୁଯାୟୀ, ମାର୍ଚ୍ଚ ୭ରେ ବିଭିନ୍ନ ବିଭାଗୀୟ ଷ୍ଟାଣ୍ଡିଂ କମିଟିର ରିପୋର୍ଟ ଗୃହରେ ଉପସ୍ଥାପନ ହେବ । ୧୦ ତାରିଖରୁ ୨୮ ଯାଏଁ ବଜେଟ୍ ଉପରେ ଆଲୋଚନା ହେବ । ମାର୍ଚ୍ଚ ୨୯ରେ ବ୍ୟୟମଞ୍ଜୁରୀ ବିଲ୍ ପାରିତ ହେବ ।
ଉଲ୍ଲେଖଯୋଗ୍ୟ, ସପ୍ତଦଶ ବିଧାନସଭାର ପ୍ରଥମ ପର୍ଯ୍ୟାୟ ବଜେଟ ଅଧିବେଶନ ଫେବ୍ରୁଆରୀ ୧୩ରୁ ୨୧ ତାରିଖ ପର୍ଯ୍ୟନ୍ତ ଚାଲିଥିଲା । ଏହି ସମୟରେ ସରକାର ୨୦୨୫-୨୬ ଆର୍ଥିକ ବର୍ଷ ପାଇଁ ୨ ଲକ୍ଷ ୯୦ ହଜାର କୋଟି ଟଙ୍କାର ବଜେଟ ଉପସ୍ଥାପନ କରିଥିଲେ ।
