ଭୁବନେଶ୍ୱର,୧୬/୦୫: ମୋଦିଙ୍କ ଜନପଥ ରୋଡ୍ ସୋ’କୁ କାଉଣ୍ଟର କରିବାକୁ ଗୁରୁବାର ମେଗା ରୋଡ୍ ସୋ’ କରିବେ ନବୀନ । ଲୋକଙ୍କ ଭୋଟ୍ ଯେମିତି ଏ ପାଖ ସେ ପାଖ ନ ହେବ ସେଥିପାଇଁ ବଡ଼ ଯୋଜନା ହୋଇଛି । ରୋଡ୍ ସୋ’ ଜରିଆରେ ନିଜ ଦମ୍ ଦେଖାଇବାକୁ ବିଜେଡି ଜୋର୍ଦାର ପ୍ରସ୍ତୁତି କରିଛି । ସବୁ ଛକରେ ହୁଳହୁଳି ଓ ଫୁଲ ପକାଇ ନବୀନଙ୍କୁ ସ୍ୱାଗତ କରାଯିବ ।
ସନ୍ଧ୍ୟା ସାଢ଼େ ୬ଟାରେ ପ୍ରଥମେ ଗଙ୍ଗନଗର ଛକରୁ ରୋଡ୍ ସୋ’ ବାହାରିବ । ଜନସଭାକୁ ସମ୍ବୋଧିତ କରିବା ସହ ଏଲଆଇସି ଛକ ଓ ଗୋପବନ୍ଧୁ ଛକ ହୋଇ ଆଗକୁ ବଢ଼ିବେ । ୬ଟା ୫୦ରେ ରୋଡ୍ ସୋ’ ଡିଏଭି ସ୍କୁଲ ଛକରେ ପହଞ୍ଚିବ । ସେଠାରେ ଲୋକଙ୍କ ସମାବେଶକୁ ସମ୍ବୋଧିତ କରିବେ । ଏହାପରେ ରୋଡ୍ ସୋ’ ଏଚଡିଏଫ୍ସି ବ୍ୟାଙ୍କ ଛକ, ବାଲୁଙ୍କେଶ୍ୱର ମନ୍ଦିର ଓ ମମତାଜ ଅଲ୍ଲୀ ସ୍କୁଲ ହୋଇ ଶ୍ରୀକୃଷ୍ଣ କ୍ଲବ୍ ଛକରେ ପହଞ୍ଚିବ । ସେଠାରେ ନବୀନ ଲୋକଙ୍କ ଉଦ୍ଦେଶ୍ୟରେ ଉଦ୍ବୋଧନ ଦେବେ । ଏଠାରୁ କଳିଙ୍ଗ ଷ୍ଟାଡିୟମ ଛକକୁ ଯିବ ରୋଡ୍ ସୋ’ ।
କଳିଙ୍ଗ ଷ୍ଟାଡିୟମ ଛକରେ ଜନସଭାକୁ ସମ୍ବୋଧିତ କରିବେ । ସେଠାରୁ ବାୟା ବାବା ମଠ ଲେନ୍ ହୋଇ ନିକୋ ପାର୍କ ଛକକୁ ଯିବେ । ବାୟା ବାବା ମଠ ଲେନ୍ରେ ଲୋକଙ୍କ ସମାଗମରେ ବକ୍ତବ୍ୟ ଦେବେ । ପରେ ରୂପାଲି ଛକ ଦେଇ ସତ୍ୟନଗର ଯିବେ । ସତ୍ୟନଗରରେ ଜନସଭାରେ ବକ୍ତବ୍ୟ ରଖିବେ । ଶ୍ରୀୟା ଛକ, ମାଷ୍ଟରକ୍ୟାଣ୍ଟିନ୍ ଓ ରାଜମହଲ ହୋଇ ସାଢ଼େ ୭ଟାରେ ଶିଶୁଭବନ ଛକରେ ପହଞ୍ଚିବେ । ଏଠାରେ ଲୋକଙ୍କୁ ଉଦ୍ବୋଧନ ଦେବେ ।
ନବୀନଙ୍କ ରୋଡ୍ ସୋ ପାଇଁ ବିଜେଡି ପକ୍ଷରୁ ବ୍ୟାପକ ପ୍ରସ୍ତୁତି କରାଯାଇଛି । ଏହାକୁ ସଫଳ କରିବାକୁ ତିନି ବିଧାୟକଙ୍କୁ ଦାୟିତ୍ୱ ଦିଆଯାଇଛି । ମଧ୍ୟ ନିର୍ବାଚନମଣ୍ଡଳୀର ଅଧିକାଂଶ ୱାର୍ଡ ଓ ଅଞ୍ଚଳ ଦେଇ ନବୀନଙ୍କ ରୋଡ୍ ସୋ’ ଯିବ । ଏଥିପାଇଁ ଲୋକଙ୍କୁ ଏକାଠି କରି ଶକ୍ତି ପ୍ରଦର୍ଶନ ପାଇଁ ମଧ୍ୟ ବିଧାୟକ ଅନନ୍ତ ନାରାୟଣ ଜେନା ଲାଗି ପଡ଼ିଛନ୍ତି । ସବୁ ୱାର୍ଡରୁ ଲୋକଙ୍କୁ ଆଣି ମୁଖ୍ୟମନ୍ତ୍ରୀଙ୍କୁ ସ୍ୱାଗତ କରିବାକୁ ସବୁ କର୍ପୋରେଟରଙ୍କୁ ଦାୟିତ୍ୱ ବଣ୍ଟାଯାଇଛି । ବାଜା ବଜାଇ ଓ ଫୁଲ ପକାଇ ମୁଖ୍ୟମନ୍ତ୍ରୀଙ୍କ ବସ୍କୁ ପାଛୋଟି ଆଣିବେ ।
କିଛି ଗଳି ଅଞ୍ଚଳ ଦେଇ ବସ୍ ଯିବାର ଥିବାରୁ ରାତିଅଧିଆ ଡେମୋ କରିଛି ପୁଲିସ । ନିଜେ ଡିସିପି ଉପସ୍ଥିତ ରହି ଡେମୋ କରିଛନ୍ତି । ସୁରକ୍ଷା ବ୍ୟବସ୍ଥା କଡ଼ାକଡ଼ି କରାଯାଇଛି । ଏଥିପାଇଁ ବ୍ୟାପକ ବନ୍ଦୋବସ୍ତ ହୋଇଛି । ୧୦ ପ୍ଲାଟୁନ ପୁଲିସ ଫୋର୍ସ ନିୟୋଜିତ ହେବେ । କିଛି ସ୍ଥାନରେ ବ୍ୟାରିକେଡ୍ କରାଯିବ ।
