ମୁମ୍ବାଇ, ୩୦/୧୦ : ରବୀନା ଟଣ୍ଡନଙ୍କ ଝିଅ ରାଶା ଥଡାନୀଙ୍କ ବଲିଉଡ଼ ଡେବ୍ୟୁ । ତାଙ୍କର ପ୍ରଥମ ଫିଲ୍ମର ଟାଇଟେଲ ଘୋଷଣା ହୋଇଯାଇଛି । ରାଶାଙ୍କ ଡେବ୍ୟୁ ନେଇ ବହୁ ଦିନରୁ ଲାଗି ରହିଥିଲା ଚର୍ଚ୍ଚା । ଏହି ଫିଲ୍ମରେ ରାଶାଙ୍କ ସହ ଅଜୟ ଦେବଗନଙ୍କ ଭଣଜା ଅମନ ଦେବଗନ ଦେଖାଦେବେ । ରାଶାଙ୍କ ଭଳି ଅମନ ବି ଏହି ଫିଲ୍ମରୁ ବଲିଉଡ଼ରେ ଏଣ୍ଟ୍ରି କରିବାକୁ ଯାଉଛନ୍ତି ।
ଅଜୟ ଦେବଗନ ନିଜ ଇନଷ୍ଟାଗ୍ରାମରେ ରାଶା ଥଡାନୀ ଏବଂ ଅମନ ଦେବଗନଙ୍କ ଫିଲ୍ମର ଟାଇଟେଲ ପୋଷ୍ଟର ଶେୟାର କରିଛନ୍ତି । ଫିଲ୍ମର ନାଁ ରହିଛି ‘ଆଜାଦ’ । ଅଜୟ ବି ଏଥିରେ ବିଶେଷ ଭୂମିକାରେ ନଜର ଆସିବେ । ’ଆଜାଦ’ ଏକ ଆଡ଼ଭେଞ୍ଚର ଫିଲ୍ମ ଅଟେ ଯାହାକୁ ଅଭିଷେକ କପୁର ନିର୍ଦ୍ଦେଶନା ଏବଂ କୋ-ପ୍ରଡ୍ୟୁସ କରୁଛନ୍ତି । ଅଭିଷେକ କପୁର କାଇ ପୋ ଚେ, କେଦାରନାଥ, ରକ ଅନ ଏବଂ ଚଣ୍ଡିଗଡ଼ କରେ ଆଶିକ ଭଳି ଫିଲ୍ମ ଲାଗି ପ୍ରସିଦ୍ଧ ଅଟନ୍ତି । ସେହିଭଳି ରନୀ ସ୍କ୍ରୁଓ୍ବାଲା ଏବଂ ପ୍ରଜ୍ଞା କପୁର ‘ଆଜାଦ’ର ପ୍ରଡ୍ୟୁସର ଅଟନ୍ତି ।
ରାଶା ଥଡାନୀ ଏବଂ ଅମନ ଦେବଗନ ଷ୍ଟାରର ଫିଲ୍ମ ‘ଆଜାଦ’ର ପ୍ରଥମ ଟିଜର ଦିଓ୍ବାଲୀରେ ରିଲିଜ ହେଉଥିବା ଫିଲ୍ମ ‘ସିଙ୍ଘମ ଏଗେନ‘ ଏବଂ ‘ଭୁଲ ଭୁଲେୟା ୩’ ସହ ଫିଲ୍ମ ହଲରେ ଦେଖାଯିବ । ଏହି ସୂଚନା ନିଜେ ଅଜୟ ଦେବଗନ ଦେଇଛନ୍ତି । ସେହିଭଳି ଫିଲ୍ମର ରିଲିଜ ଡେଟର କଥା ଯଦି ଆମେ କହିବା ତ ଆଗାମୀ ବର୍ଷ ଜାନୁଆରୀରେ ଫିଲ୍ମ ହଲକୁ ଆସିବ । ମାତ୍ର ଏବେ ମେକର୍ସ ଫିଲ୍ମର ରିଲିଜ ଡେଟର ଘୋଷଣା କରିନାହାନ୍ତି ।
